ទាយាទស្ថាបនិក Red Bull ក្លាយជាមហាសេដ្ឋីមានបំផុតនៅអឺរ៉ុប ក្រោយទទួលមរតកជិត ១៦ពាន់់លានដុល្លារ

បណ្ដាញព័ត៌មានពី Bloomberg បានរាយការណ៍ថា ស្ថាបនិកក្រុមហ៊ុនភេសជ្ជៈ Red Bull បានផ្ទេរភាគហ៊ុនជិតពាក់កណ្តាលរបស់ខ្លួនទៅឱ្យកូនប្រុស ដែលជាអ្នកស្នងមរតកតែម្នាក់គត់នៅក្នុងត្រកូល Mateschitz ។

លោក Mark Mateschitz ជាកូនប្រុសតែមួយគត់របស់លោក Dietrich Mateschitz ដែលជាអតីតប្រធាន និងជាស្ថាបនិកក្រុមហ៊ុន Red Bull បានទទួលភាគហ៊ុនចំនួន ៤៩% នៃក្រុមហ៊ុន Red Bull Group ដែលភាគហ៊ុននេះមានតម្លៃជាសាច់ប្រាក់ចំនួន ១៥.៧ពាន់លានដុល្លារអាមេរិក។ ការប្រកាសផ្ទេរនេះ បានបង្កើនទ្រព្យសម្បត្តិរបស់ Mark ឱ្យឡើងលើស ១៦.៤ពាន់លានដុល្លារអាមេរិក ក្លាយជាមហាសេដ្ឋីមានបំផុតនៅអឺរ៉ុប ត្រឹមវ័យ ៣០ឆ្នាំ។

យោងតាមរបាយការណ៍ពី ​​Bloomberg Billionaires Index មរតករបស់ឪពុកដែលបានផ្ទេរទៅកូនប្រុស មិនត្រឹមតែធ្វើឱ្យ Mark Mateschit ក្លាយជាអ្នកមានបំផុតនៅអឺរ៉ុបប៉ុណ្ណោះទេ លោកក៏ជាក្លាយអ្នកមានបំផុតនៅក្នុងប្រទេសអូទ្រីសផងដែរ ថែមទាំងជាប់ចំណាត់ថ្នាក់មហាសេដ្ឋីទី ៩០ របស់ពិភពលោកទៀតផង។

គួរបញ្ជាក់ថា Mark Mateschitz កើតនិងធំធាត់នៅប្រទេសអូទ្រីស ដែលលោកជាកូនទោលនៅ​ក្នុង​គ្រួសារ។ តាំងពីតូចមក Mark បានទទួលឥទ្ធិពលពីឪពុក ដូច្នេះទើបក្នុងឆ្នាំ ២០១៨ លោកបានបង្កើតក្រុមហ៊ុនភេសជ្ជៈផ្ទាល់ខ្លួនមួយ ដោយក្រុមហ៊ុនរបស់លោកមានឯកទេសផលិតស្រាបៀរ និងទឹកក្រូច។ ក្រៅពីនេះ Mark ក៏ជាពាណិជ្ជករអចលនទ្រព្យផងដែរ៕

ប្រែសម្រួល៖ សន្យា

ចុចអាន៖ មហាសេដ្ឋីទី៦ លើពិភពលោក សុខចិត្តយកទ្រព្យសម្បត្តិបរិច្ចាគ មិនផ្ទេរមរតកឱ្យកូនដាច់ខាត

ចុចអាន៖ ពីក្មេងពិការ ក្លាយជា YouTuber រកចំណូលបានរាប់លាន រហូតជាប់ឈ្មោះជាសេដ្ឋីនីវ័យក្មេង