កម្រឃើញ សត្វ ៧ ប្រភេទមានពណ៌ផ្កាឈូក គួរជាទីប្លែកភ្នែក

ជាធម្មតា មិនថាសត្វកម្រឬសត្វទូទៅនោះទេមិនសូវជាមានពណ៌ផ្កាឈូកឡើយ ភាគច្រើនមានពណ៌ខ្មៅ ត្នោត ឬពណ៌សជាដើម។ ហេតុដូចនេះហើយ ទើបធ្វើឲ្យសត្វពណ៌ផ្កាឈូកក្លាយជាទីចាប់អារម្មណ៍ សម្រាប់មនុស្សដូចខាងក្រោម៖

១. Roseate Spoonbill

សត្វបក្សីនេះបានពណ៌ផ្កាឈូកពីអាហារប្រចាំថ្ងៃរបស់វា (ក្ដាមនិងបង្គា) ប៉ុន្តែសម្រស់ពណ៌ផ្កាឈូកមិនបានផ្ដល់ផលល្អដល់សត្វបក្សីនោះឡើយ ក្នុងកំឡុងពេលឆ្នាំ១៩០០ គេយកវាធ្វើជាផ្លិតសម្រាប់មនុស្សស្រីប្រើប្រាស់។ នាពេលបច្ចុប្បន្ន សត្វបក្សីនេះត្រូវទទួលការការពារយ៉ាងពេញលេញនិងមានសុវត្ថិភាពនៅក្នុងរដ្ឋផ្លរីដា ដោយគ្មានក្ដីបារម្ភចំពោះរឿងដាច់ពូជ។

២. សេះសមុទ្រ Bargibant’s Pygmy 

សេះសមុទ្រ Bargibant’s Pygmy រស់នៅលើស្លាបផ្កាថ្ម និងជាសត្វពូកែលាក់ខ្លួនបន្លំជាមួយផ្កាថ្ម។ វាត្រូវបានគេរកឃើញពេលកំពុងសិក្សាពីផ្កាថ្មក្នុងឡាបូពិសោធន៍មួយ សេះនោះគឺជាពូជ Syngnathidae មានប្រវែងពីកន្លះទៅមួយអ៉ីញប៉ុណ្ណោះ។

៣. កណ្ដូបអ័រគីដេ

សត្វកណ្ដូបនេះមានរូបរាងស្រដៀងផ្កា និងមានសមត្ថភាពទាក់ទាញសត្វល្អិតជាងផ្កាមែនទែនទៅទៀត។

៤. ផ្កាយសមុទ្រ

នៅលើលោកមានផ្កាយសមុទ្រសរុបប្រមាណ ២០០០ប្រភេទ មានច្រើនពណ៌បូករួមទាំងពណ៌ផ្កាឈូកផងដែរ។ ពណ៌ផ្កាឈូករបស់វាជួយបណ្ដេញសត្រូវនិងលាក់ខ្លួនយ៉ាងមានប្រសិទ្ធិភាព។

៥. ដូហ្វីនទន្លេអាម៉ាហ្សូន

គេស្គាល់វាថា boutu, boto, ឬ bufeo ដែលជាត្រីដូហ្វីនទឹកសាបធំបំផុត ហើយប្រែពណ៌ផ្កាឈូកពេលវាចម្រើនវ័យ។ ក្នុងឆ្នាំ ២០១៨ ដូហ្វីនទន្លេអាម៉ាហ្សូនត្រូវដាក់បញ្ចូលក្នុងបញ្ជី IUCN ដោយសារតែបញ្ហា ប្រើពួកគេធ្វើជានុយ នេសាទដោយប្រើឧបករណ៍ផ្ទុះ និងការបំពុលទន្លេដើម្បីរុករករ៉ែ។

៦. Axolotl

អ្នកខ្លះហៅវាថា “ត្រីម៉ិចស៉ិកចេះដើរ” ក្រៅពីពណ៌ផ្កាឈូកពួកវាមានពណ៌ស ខ្មៅ លឿង និងបៃតង។ មិនត្រឹមតែគួរឲ្យស្រលាញ់ប៉ុណ្ណោះទេ ពួកវាមានសមត្ថភាពបង្កើតនិងព្យាបាលអវៈយវៈដែលបាត់បង់ទៅបានទៀតផង។

៧. បង្កងសក់ពណ៌ផ្កាឈូក

ការពិតទៅវាមិនមែនជាបង្កងទេ សត្វល្អិតទំហំកន្លះអ៉ីញនេះស្ថិតក្នុងអម្បូរ Anomurans មានពណ៌ផ្កាឈូកដើម្បីលាក់ខ្លួនក្នុង giant barrel sponges ដែលជាផ្ទះរបស់វា៕

ប្រែសម្រួលដោយ៖ វារី

ចុចអាន៖ សត្វ ១០ ប្រភេទ មិនគួរឲ្យជឿថាមានក្នុងជីវិតពិត