រាល់ឆ្នាំ ឱ្យតែដល់ថ្ងៃទី៣០-៣១ អ្នករស់នៅទីក្រុងភ្នំពេញភាគច្រើន តែងរូតរះចេញដំណើរកម្សាន្ត​តាមបណ្តាខេត្ត និងរមណីយដ្ឋាន​​ជិតឆ្ងាយ ជួបជុំញាតិមិត្ត ឬមនុស្សជាទីស្រឡាញ់ ពិសេសតំបន់សមុទ្រ ព្រោះទីនោះ គឺតែងមានរៀបចំ​ពិធីបុណ្យឆ្លងឆ្នាំ មិនដែលអាក់ខានឡើយ។ ចុះអ្នកនៅភ្នំពេញ អាចឆ្លងឆ្នាំនៅណាបាន?​

អ៊ីចឹង មិនបាច់ស្តាយអត់បានទៅឆ្លងឆ្នាំសមុទ្រអីទេ ត្រឹមតែរាជធានីភ្នំពេញ ក៏អាចឱ្យលោកអ្នកសប្បាយមួយអស់ដៃបានដែរ។​ ខាងក្រោមនេះ កម្ពុជាថ្មី នឹងណែនាំការនិយម ៣បែប ដែលអ្នកនៅភ្នំពេញ ច្រើនមកកម្សាន្តពេលឆ្លងឆ្នាំ។

១. ឆ្លងឆ្នាំតាមកន្លែងសាធារណៈ

– រង្វង់មូលនាងមច្ឆា
ដោយសារតែទីនេះ ជាតំបន់រៀបចំថ្មី មិនទាន់មានសំណង់អគារកកកុញ និងមានទីធ្លាធំទូលាយទៀតនោះ ជាហេតុដែល បណ្តាលចិត្តឱ្យអ្នករស់នៅទីក្រុង យកជាទីតាំងជួបជុំបែបពិចនិក តាមលក្ខណៈគ្រួសារ ឬមិត្តភក្តិរៀងៗខ្លួន។ ទីតាំងមួយ នេះ នៅជាប់នឹងមណ្ឌលសន្និបាត និងពិព័រណ៍អន្តរជាតិជ្រោយចង្វារ OCIC Hall មិនត្រឹមតែសម្រាប់ឱកាសនេះប៉ុណ្ណោះទេ អ្នកខ្លះ​ក៏មកកម្សាន្តបែបនេះ ម្តងម្កាល ថ្ងៃបុណ្យទាន ឬថ្ងៃសម្រាក។

– កោះពេជ្រ
មិនជាខុសគ្នា នឹងទីតាំងខាងលើប៉ុន្មានទេ កោះពេជ្រ ជាទីពេញនិយមយូរណាស់មកហើយ សម្រាប់អ្នករស់នៅទីក្រុង ជាមួយនឹងការជួបជុំប្រភេទនេះ។ អ្នកដែលមកកម្សាន្តទីនេះ ច្រើនតែទិញអាហារស្រាប់ៗ មកក្រាលកន្ទេលអង្គុយ ទទួលទានជុំគ្នា សប្បាយក្អាកក្អាយរហូតដល់ឆ្លងឆ្នាំ។ ឆ្នាំខ្លះ ទីនេះ​ក៏មានការរៀបចំកម្មវិធី និងព្រឹត្តិការណ៍ខ្លះផងដែរ។

លើសពីនេះ លោកអ្នកនៅអាចជ្រើសទីតាំងឆ្លងឆ្នាំនៅតាមភោជនីយដ្ឋាន Sky Bar ឬកន្លែងផ្សេងៗក្នុងតំបន់កោះពេជ្រ នេះទៀតផង។ ជាក់ស្តែងរួមមានដូចជា ដឹអេលីហ្សេកោះពេជ្រ (The Elysee Leasing) មានរៀបចំការលក់អាហារ ភេសជ្ជៈ វត្ថុអនុស្សាវរីយ៍ សៀវភៅ ការផ្សព្វផ្សាយសេវាកម្មជាច្រើនទៀត ពិសេសមានការប្រគុំតន្រ្តីកម្សាន្តទៀតផង។

– វិមានឈ្នះឈ្នះ
ឆ្លងតែស្ពានព្រែកព្នៅបន្តិច យើងនឹងទៅដល់ទីតាំងដ៏ពេញនិយមមួយផ្សេងទៀត នៃទឹកដីត្រើយម្ខាងទៀត ដែលមាន សំណង់ល្បីល្បាញថ្មី២ គឺវិមានឈ្នះឈ្នះ និងពហុកីឡដ្ឋានមរតកតេជោ នៅទល់មុខគ្នានោះ។ ទីតាំងនេះ ជាកន្លែងពេញ និយមរាល់ចុងសប្តាហ៍ ដែលអាចឱ្យយើងសម្រាកលំហែកាយតាមបែបពិចនិកដូចគ្នា ដោយសារតែមានទីធ្លាធំទូលាយ។
លើសពីនេះ លោកអ្នកក៏អាចកម្សាន្តអារម្មណ៍លក្ខណៈបែបនេះ នៅតាមទីតាំងដីទំនេរជាច្រើនកន្លែងទៀត ក្នុងបរិវេណ ក្បែរនោះ។

២. ឆ្លងឆ្នាំតាម Sky Bar ឬ Club
គោលដៅដំបូងបង្អស់របស់យុវវ័យ គឺមិនសូវជារំលងកន្លែងកម្សាន្តប្រភេទនេះឡើយ ព្រោះក្រៅពីការជួបជុំមិត្តភក្តិ នៅអាច ទទួលទាន រាំលេង និងការកម្សាន្តផ្សេងៗទៀតផង។ ជាក់ស្តែង នៅតាមភោជនីយដ្ឋាន Sky Bar មួយចំនួនខាងក្រោម នេះ គឺមានរៀបចំព្រឹត្តិការណ៍

– Scenery Sky Bar & Restaurant
អ្នកមានគម្រោងឆ្លងឆ្នាំនៅភ្នំពេញ មិនពិបាករកកន្លែងសោយសុខនោះទេ ឆ្នាំនេះ Scenery Sky Bar បានរៀបចំកម្មវិធី Count Down ពិបាកបំភ្លេចជាមួយនឹងកន្លែងដ៏ទូលាយ បរិយាកាសដ៏ស្រស់ស្រាយ អាចទស្សនាកាំជ្រួចពីដំបូលអគារជាន់ទី២៦ និងគយគន់ទេសភាពទីក្រុងជាប់មាត់ទន្លេ សម្រាប់ចំនួនមនុស្សកំណត់ ត្រឹមតែ ២០០នាក់ប៉ុណ្ណោះ។ សម្រាប់ទីតាំង គឺស្ថិតនៅជិតរង្វង់មូលស្ពានជ្រោយចង្វារ ទល់មុខសកលវិទ្យាល័យន័រតុន។

– V-Friend Russeykeo
អ្នកត្រើយខាងជើង មិនចាំបាច់ចូលកណ្តាលក្រុង នាំតែកកកុញអីនោះទេ កន្លែងនេះក៏អេមដែរ ជាប់មាត់ទន្លេតែម្តង។ មកទីនេះ មិនត្រឹមតែអាចស្រង់ក្លិនទឹកទន្លេ ថែមទាំងអាចកម្សាន្តអារម្មណ៍ដោយការស្តាប់តន្រ្តី ទទួលទានអាហារ បានមើលកាំជ្រួចជាមួយគ្នាហើយ បានកូនកាំជ្រួចដុតលេងរួមគ្នាទៀតផង។

– Rukkha Sky Bar & Tapas
មិនបាច់ឆ្លងស្ពាន មិនពិបាករក នៅប្របនឹងដងទន្លេហើយ បញ្ឆិតមុខនឹងសណ្ឋាគារសុខាទៀត។​ មកឆ្លងឆ្នាំនៅទីនេះ បានមើលទេសភាពត្រើយម្ខាងនាពេលរាត្រីដ៏ស្រស់ស្អាតហើយ បានកាន់ដៃឬកាន់ដបមើលកាំជ្រួចទៀត។ បើនិយាយ ពីការកម្សាន្ត មិនជាខុសគ្នាពីភោជនីយដ្ឋាន Sky Bar ដទៃទៀតនោះទេ យើងអាចអង្គុយទទួលទានជួបជុំ ស្តាប់តន្រ្តី ទស្សនាចរាចរណ៍លើដងទន្លេ បានកៀកៗភ្នែកតែម្តង ពីអាគារកម្ពស់សមល្មមនេះ។

៣. ដំណើរកម្សាន្តតាមដងទន្លេ
សម្រាប់អ្នកចង់ប្តូរបរិយាកាស មកបណ្តែតកាយាលើទឹក ក៏ឡូយម៉្យាងដែរ។ លោកអ្នក អាចជួលទូកកម្សាន្តលក្ខណៈក្រុមធំ ឬកក់កន្លែងកម្សាន្តគ្នា ៤-៥ នាក់ ទទួលអាហារ និងភេសជ្ជៈ រីករាយអបអរពីលើផ្ទៃទឹក ជាមួយនឹងហ្វូងមច្ចាតែម្តង។

ចំណែកឯការជួលទូកលក្ខណៈបែបណា គឺអាស្រ័យតាមចំណង់ចំណូលចិត្តផ្ទាល់ខ្លួន ដូច្នេះលោកអ្នកអាចរើសការកម្សាន្ត​តាមការចង់បាន។

អត្ថបទដោយ៖ សុធាវី