លោក Michael Skvarla នាយកនៃមន្ទីរពិសោធន៍កំណត់អត្តសញ្ញាណសត្វល្អិតនៅសាកលវិទ្យាល័យ Penn State ទើបតែដឹងច្បាស់ថាសត្វល្អិតដែលគាត់ជួបប្រទះក្នុងហាងលក់គ្រឿងទេសនៅរដ្ឋអាកាន់សាស តាមពិតជាសត្វល្អិតពូជម្រមានវត្តមានតាំងពីសម័យជូរ៉ាសិកសោះ ។

ពេលលោក Skvarla ទៅទិញទឹកដោះគោនៅ Walmart សាខារដ្ឋអាកាន់សាស ១១ ឆ្នាំមុន គាត់ប្រទះឃើញសត្វល្អិតដ៏ធំមួយនៅក្បែរហាង លោកសាស្ត្រាចារ្យក៏ចាប់វាទុកព្រោះមើលទៅសត្វនោះប្លែកគួរឲ្យចាប់អារម្មណ៍ ប៉ុន្តែគាត់ស្មានថាវាជាសត្វកម្រធម្មតា ។

ថ្មីៗនេះទើបលោកដឹងថាវាជាសត្វ lacewing យក្សពូជ Polystoechotes punctata ដែលមានកំណើតកាលពី ១៥០ លានឆ្នាំមុន ដោយសារការស្រាវជ្រាវ​អំឡុង​ពេល​វគ្គសិក្សា​មន្ទីរពិសោធន៍​អនឡាញ ។

របកគំហើញនេះត្រូវបានគេកត់ត្រាទុកជាលើកទីមួយនៅរដ្ឋ Arkansas ហើយក៏ជាលើកដំបូងនៅអាមេរិកខាងជើងក្នុងរយៈពេល ៥០ ឆ្នាំផងដែរ ។

អ្នកស្រាវជ្រាវមិនទាន់ប្រាកដថាវាដាច់ពូជនៅឡើយទេ ទោះបីជាយ៉ាងណាក៏ដោយវាបានបាត់ខ្លួនយ៉ាងអាថ៌កំបាំងពីភាគខាងកើតសហរដ្ឋអាមេរិក ៕

ប្រែសម្រួល ៖ វារី

ចុចអាន ៖ រឿង ៨ យ៉ាង ពីសត្វអំពិលអំពែកគូទភ្លឺ