ហេតុផល ៦ យ៉ាង យើងមិនគួរទិញកាបូបក្លែងក្លាយ ឬ Top Grade

នៅក្នុងទីផ្សារមានលក់កាបូបក្លែងក្លាយជាច្រើនដូចជាម៉ាក LV Gucci Dior និង Chanel ជាដើម ថែមទាំងមានប្រភេទគុណភាពសម្រាប់ជ្រើសរើសតាមទឹកប្រាក់ទៀតផង ។ ប៉ុន្តែអ្នកត្រូវដឹងពីហេតុផល ៦ យ៉ាងនេះដែលយើងមិនគួរទិញកាបូបក្លែងក្លាយប្រើសោះ ៖

១. គុណភាព

កាបូបពិតធ្វើពីស្បែកសត្វតួយ៉ាងដូចជា ស្បែកគោ ស្បែកពពែ ស្បែកពស់ថ្លាន់ ស្បែកក្រពា និងស្បែកសត្វផ្សេងៗ ហើយសម្ភារៈទាំងប៉ុន្មានដែលបានរៀបរាប់សុទ្ធតែអាចមានអាយុកាលរាប់សិបឆ្នាំតកូនតចៅបើសិនម្ចាស់មើលថែបានល្អ ។ ផ្ទុយទៅវិញរបស់ក្លែងក្លាយដែលធ្វើពីសម្ភារៈថោកៗមិនអាចស្អាតបានយូរឡើយ វានឹងរបក រហែក ឬប្រេះមិនខាន ។

២. ប៉ះពាល់សុខភាព

មិនត្រឹមតែការផលិតមិនម៉ត់ចត់ប៉ុណ្ណោះទេ កាបូបក្លែងក្លាយភាគច្រើនមានសារធាតុគីមីដែលអាចពុលដល់អ្នកប្រើផងដែរ ជាក់ស្ដែងសារធាតុទាំងនោះមាននៅក្នុងពណ៌ជ្រលក់កាបូបតែម្ដង ។

៣. បំពុលបរិស្ថាន

ដោយសារគុណភាពអន់កាបូបក្លែងក្លាយត្រូវអ្នកប្រើប្រាស់បោះវាចោលក្រោយប្រើមិនយូរប៉ុន្មាន សូម្បីដំណើរការផលិតក៏ពោរពេញដោយសារធាតុពុលនិងកាកសំណល់ដែរ ។

៤. របស់ពិតសក្ដិសមនឹងតម្លៃ 

ការទិញរបស់ពិតក្នុងតម្លៃខ្ពស់អាចជួយសន្សំប្រាក់របស់អ្នកទៅវិញទេ ព្រោះយើងអាចប្រើវាបានមួយជីវិតឬតជំនាន់ពឹងផ្អែកលើគុណភាពដ៏ប្រណិតរបស់វា ។

៥. បាត់បង់គុណតម្លៃនៃការច្នៃប្រឌិត

កាបូបប្រណិតនីមួយៗឆ្លងកាត់ការផលិតដ៏ម៉ត់ចត់ និងអ្នកច្នៃម៉ូដដ៏ប៉ិនប្រសប់ ប៉ុន្តែរបស់ក្លែងក្លាយដែលកំពុងចរាចរណ៍ក្នុងទីផ្សារធ្វើឲ្យពួកគេបាត់បង់អតិថិជននិងការចាប់អារម្មណ៍គួរឲ្យកត់សម្គាល់ ។

៦. ការទិញកាបូបពិតជាការវិនិយោគ

កាបូបខ្លះដែលមានតម្លៃរាប់ម៉ឺនរាប់សែនដុល្លារគឺជាការវិនិយោគដ៏ល្អបំផុត ជួនកាលម្ចាស់អាចដាក់ដេញថ្លៃចំណេញទ្វេគុណឯណោះ ។

ទោះបីអ្នកមិនមានសមត្ថភាពជាវកាបូបតម្លៃថ្លៃកប់ពពកក៏ដោយ អ្នកគប្បីប្រើប្រាស់កាបូបពិតម៉ាកធម្មតាក៏ជាជម្រើសប្រសើរជាងរបស់ក្លែងក្លាយដែរ ៕

ប្រែសម្រួល ៖​ វារី

ចុចអាន ៖ ៥ តិចនិក ថែរក្សាកាបូបប្រណិតឲ្យនៅគង់វង្ស ប្រើដល់កូនចៅជំនាន់ក្រោយ