ទស្សនៈអវិជ្ជមានពីលុយ បង្អាក់មនុស្សមិនឲ្យខំរកប្រាក់

លុយ នៅតែជាប្រធានបទក្ដៅដែលលើកជជែកមិនដាច់ស្រេច។ អ្នកខ្លះថា លុយជាប្រភពនៃសុភមង្គល រីឯអ្នកខ្លះទៀតថាជាដើមចមនៃសកម្មភាពអាក្រក់។ មិនមែនមានមតិណាមួយខុសឬត្រូវចំពោះរឿងនេះទេ ព្រោះការលើកឡើងទាំងអស់សុទ្ធតែមានហេតុផលសមស្របរៀងខ្លួន។

យ៉ាងណាមិញ ការយល់ឃើញខ្លះអំពីលុយអាចជះឥទ្ធិពលអវិជ្ជមានចំពោះការរស់នៅប្រចាំថ្ងៃ មិនឲ្យជីវិតទៅមុខដូចគេដូចឯងបាន។ ខាងក្រោមជាគំនិតអវិជ្ជមានអំពីលុយដែលអាចរារាំងយើងមិនឲ្យមានបានដូចអ្នកដទៃ៖

១. លុយជាប្រភពនៃអំពើអាក្រក់

មនុស្សមួយចំនួនយល់ថា លុយជាឬសគល់នាំឲ្យមនុស្សធ្វើអំពើអាក្រក់។ ប៉ុន្ដែការពិត ការស្រឡាញ់លុយងប់ងុលទៅវិញទេ ដែលជាដើមហេតុនៃទង្វើមិនល្អ។ អំពើអាក្រក់ឬល្អ អាស្រ័យលើនិស្ស័យមនុស្ស ព្រោះពួកគេជាអ្នកទទួលខុសត្រូវលើសកម្មភាពរបស់ខ្លួន ​មិនមែនមកពីលុយជាអ្នកកំណត់ឡើយ។

សាកគិតទៅមើល៍! សេដ្ឋីជាច្រើនលើពិភពលោកនេះ សុទ្ធតែជាមនុស្សអាក្រក់ឬយ៉ាងណា? នៅពេលដែលយើងគិតថា លុយគឺជាឬសគល់នៃអំពើអាក្រក់ ទស្សនៈនឹងបង្អាក់ដំណើរក្នុងការស្វែងរកការមានបានសម្រាប់ខ្លួនឯង។

២. លុយមិនមែនជាក្ដីសុខនៃជីវិត

ក្នុងជីវិតជាក់ស្ដែង មនុស្សតែងតែត្រូវការលុយជាប្រចាំថ្ងៃ។ យើងមិនអាចនិយាយថាលុយមិនសំខាន់ទៅកាន់គ្រួសារដែលមានមនុស្សឈឺ ឬ ទៅកាន់មនុស្សដែលកំពុងខ្វះខាតអាហារឡើយ។

ទោះជាយើងយល់យ៉ាងណាចំពោះលុយក៏ដោយ ក៏យើងមិនអាចប្រកែកបានថា លុយបានជួយធ្វើឲ្យជីវិតយើងងាយស្រួល និងមានក្ដីសុខបានទេ។ លុយអាចជួយពេលដែលមានជំងឺ ពេលដែលឃ្លាន និងពេលមានបញ្ហានានា ហើយថែមទាំងជួយឲ្យយើងមានឱកាសក្នុងការធ្វើរឿងជាច្រើនក្នុងជីវិត។

៣. លុយធ្វើឲ្យមនុស្សកំណាញ់

មកទល់នឹងពេលនេះ នៅតែមានបុគ្គលមួយចំនួនយល់ថា ​កាលណាមានបាននឹងធ្វើឲ្យមនុស្សកំណាញ់ ធ្វើអ្វីមួយគិតតែពីលុយជាធំជាដើម។ ប៉ុន្ដែគួរចងចាំរឿងនេះ! ការជួយសង្គ្រោះដល់មនុស្សទូទាំងពិភពលោក ការចូលរួមបរិច្ចាគលើសកម្មភាពសប្បុរសធម៌នានា គឺបានមកពីអ្នកមានចូលរួមច្រើនជាងគេ។ ការយល់ឃើញអវិជ្ជមានមកដាក់ពីមុខ នឹងបិទបាំងនូវឱកាសក្នុងការទទួលបានចំណេះដឹង ក៏ដូចជាបទពិសោធន៍ល្អៗពីពួកអ្នកមាន ដើម្បីអភិវឌ្ឍខ្លួនក្លាយជាបុគ្គលជោគជ័យមួយរូប៕

ប្រែសម្រួល៖ សន្យា

ប្រភព៖ bloomberg

ចុចអាន៖គ្រប់គ្នា​ជានា​យក​ប្រតិបត្តិ ​នៃ​ជីវិត​ខ្លួនឯង កុំ​រស់​ព្រោះ​អ្នកដទៃ​

ចុចអាន៖សិល្បៈ​ជីវិត ដោះស្រាយជាមួយនឹងដំណាក់កាល​បែកបាក់ឬលែងលះ