សកម្មភាពកម្សាន្ត ៣ ត្រូវប្រុងប្រយ័ត្នខ្ពស់ ពេលមានដំណើរកម្សាន្តនៅតំបន់សមុទ្រ ក្នុងខែនេះ

សម្រាប់ដំណើរកម្សាន្ត នៅរដូវភ្លៀងធ្លាក់ជោគជាំអំឡុងខែតុលា អាចជាបញ្ហាចោទបន្តិច សម្រាប់អ្នកនិយមកម្សាន្តតំបន់មាត់សមុទ្រ និងកោះ ដោយសារតែជាពេលវេលាដែលឧស្សាហ៍មានភ្លៀង ខ្យល់ និងរលកធំៗ ជាឧបសគ្គសម្រាប់ទាំងការលេងទឹក និងការជិះទូក។ តែយ៉ាងណា លោកអ្នកនៅតែស្វែងរកកម្សាន្តនៅតំបន់សមុទ្រនេះបាន ដោយទាមទារឱ្យមានការប្រុងប្រយ័ត្នខ្ពស់ និងតាមដានពីស្ថានភាពអាកាសធាតុ មុននឹងសម្រេចចិត្តធ្វើសកម្មភាពកម្សន្តណាមួយ។

ស្វែងយល់ពីការការពារសុវត្ថិភាពបន្ថែម សម្រាប់ដំណើរកម្សាន្តតំបន់សមុទ្រ នៅរដូវភ្លៀងធ្លាក់នេះ៖
១. ពេលលេងទឹក
បើ​សិន​ជា​ចង់​លេង​ទឹក​កម្សាន្ត គប្បីមាន​ការ​ប្រុងប្រយ័ត្ន​ខ្ពស់ អាចលេងបានលុះត្រាតែអាកាសធាតុអំណោយផល និងរលកតូចៗ​ តែប្រសិនជាស្ថានភាពអាកាសធាតុមិនល្អ រលកបោកបក់ធំៗ ពុំគួរលេងឡើយ។

ចំពោះសុវត្ថិភាពនៃការលេងទឹក ត្រូវ​មាន​អាវពោងសុវត្ថិភាព (បើអាច) ហើយកុំចូលទៅកន្លែងជ្រៅ ពិសេសនៅពេលដែលមានរលកបោកបក់ខ្លាំង ព្រោះថានៅពេលកម្លាំងទឹកបោកខ្លាំង នឹងធ្វើឱ្យយើងបាត់ជំហរ​បា​ន​ដោយងាយ។ គួរកត់ចំណាំដែរថា កម្លាំងរលកមិនបានច្រាន យើងទៅច្រាំងភ្លាមៗនោះទេ វាអាចទាញយើងឱ្យចូលទៅកន្លែងកាន់តែជ្រៅ​ ពិបាកសង្គ្រោះ។ លើសពីនេះ ដាច់ខាតកុំលេង​ទឹក​ក្រៅពោងសញ្ញា ដែលអជ្ញាធរដាក់ពង្រាយក្នុងទឹកក្បែរឆ្នេរឱ្យសោះ។ក្រៅពីនេះ ក្នុងអំឡុងពេលដែលអាកាសធាតុមិនអំណោយផល ក៏មិនគួរមុជទឹកមើលជីវៈចម្រុះបាតសមុទ្រនោះដែរ។

២. ការកម្សាន្តដោយជិះទូកក្តោង
រឿងរ៉ាវដ៏សំខាន់ដែលត្រូវយកមកពិចារណានៅពេលជិះទូក គឺទិសដៅ និងកម្លាំងនៃខ្យល់។ ជាទូទៅ ខ្យល់ដែលល្អបំផុតសម្រាប់ការជិះទូកក្តោង គឺខ្យល់ដែលបក់ក្នុងទិសដៅថេរ និងមានកម្លាំងគ្រប់គ្រាន់ដើម្បីរុញទូក ដោយមិនបង្កគ្រោះថ្នាក់ដល់អ្នកជិះ។

៣. ដំណើរកម្សាន្តនៅតំបន់កោះ
ទៅលេងតំបន់កោះ ដោយមិនបានមើលពីការព្យាករណ៍អាកាសធាតុ ដោយប្រថុយៗស្មានៗ​ ជារឿងដែលគ្រោះថ្នាក់បំផុត ព្រោះថា​ការធ្វើដំណើរទៅកាន់តំបន់កោះក្នុងអំឡុងខែនេះ អាចមានបញ្ហាដែលមិនអាចទាយទុកកើតឡើង ពិសេសអំឡុងពេលមានភ្លៀងធ្លាក់ ខ្យល់ខ្លាំង ធ្វើឱ្យរលកធំៗ។ ហេតុនេះ ទាមទារឱ្យមុននឹងធ្វើដំណើរទៅកាន់តំបន់កោះ ដាច់ខាត កុំមើលរំលងសេចក្តីជូនដំណឹង ព្រោះសេចក្តីជូនដំណឹងនេះ ជាមគ្គទេសក៍សុវត្ថិភាពចម្បងទី១ ដែលជួយយើងបានដឹងពីស្ថានភាពគ្រោះថ្នាក់បានមុនពេល និងជួយឱ្យសម្រេចចិត្តបានត្រឹមត្រូវ ពីពេលវេលាដែលអាចទៅលេងតំបន់កោះបាន ឬក៏អត់៕