រដ្ឋបាលខណ្ឌសែនសុខ បន្តស្តារប្រឡាយទួលសំពៅដំណាក់កាលទី២ ប្រវែងជាង១៧០០ម៉ែត្រ ត្រៀមរំដោះជំនន់ទឹកភ្លៀងក្នុងរដូវវស្សា

លោក ចេង មុនីរ៉ា អភិបាលខណ្ឌសែនសុខ និង ក្រុមការងារបច្ចេកទេស កាលពីថ្ងៃទៅ៦ ខែមីនា ២០២៦ បានបន្តចុះពិនិត្យ និង អនុវត្តគម្រោងស្តារប្រឡាយទួលសំពៅដំណាក់កាលទី២ ដែលមានប្រវែងសរុបជាង ១៧០០ ម៉ែត្រ ចាប់ពីភូមិដំណាក់ សង្កាត់គោកឃ្លាង ទៅដល់ស្ពានសង្កាត់ក្រាំងធ្នង់ ក្នុងគោលបំណងបង្កើនសមត្ថភាពបង្ហូរទឹក និងត្រៀមរំដោះជំនន់ទឹកភ្លៀងនារដូវវស្សាខាងមុខ។

តាមការបញ្ជាក់ពីមន្ត្រីពាក់ព័ន្ធ ការស្តារប្រឡាយនេះគឺជាផ្នែកមួយនៃផែនការអភិវឌ្ឍប្រព័ន្ធបង្ហូរទឹកក្នុងតំបន់ ដែលមានគោលដៅធ្វើឱ្យប្រសើរឡើងនូវស្ថានភាពបរិស្ថាន និងកាត់បន្ថយបញ្ហាជំនន់ទឹកនៅតំបន់ជុំវិញ។ ក្នុងដំណើរការស្តារនេះ ក្រុមការងារបានប្រើប្រាស់គ្រឿងចក្រ ដើម្បីជីកយកដី កាកសំណល់ និងសំណល់ផ្សេងៗ ដែលបានស្ទះក្នុងប្រឡាយអស់រយៈពេលយូរ។

ប្រជាពលរដ្ឋរស់នៅតាមបណ្តោយប្រឡាយបានបង្ហាញការគាំទ្រ និងក្តីសង្ឃឹមថា បន្ទាប់ពីការស្តារបញ្ចប់ ប្រឡាយនេះនឹងអាចបង្ហូរទឹកបានល្អប្រសើរ ជួយកាត់បន្ថយការជន់លិចផ្លូវ និងលំនៅដ្ឋាននៅពេលមានភ្លៀងធ្លាក់ខ្លាំង។ ជាពិសេស ក្នុងរដូវវស្សា ដែលជាទូទៅតែងមានបញ្ហាទឹកជំនន់នៅតំបន់មួយចំនួនក្នុងរាជធានីភ្នំពេញ។

មន្ត្រីមូលដ្ឋានបានបញ្ជាក់ថា គម្រោងស្តារប្រឡាយទួលសំពៅនេះ ធ្វើឡើង២ដំណាក់កាល ដែលដំណាក់ទី១ ស្តាររួចរាល់ កាលពីខែធ្នូ ចុងឆ្នាំ២០២៥ និងបានកំពុងបន្តការស្តារដំណាក់កាលពីទី២ ចាប់ពីថ្ងៃទី៣ ខែមីនា ២០២៦ ដល់បច្ចុប្បន្ន។

សូមបញ្ជាក់ផងដែរថា ការស្តារប្រឡាយទួលសំពៅ នេះមិនត្រឹមតែជួយបង្កើនសមត្ថភាពបង្ហូរទឹកប៉ុណ្ណោះទេ ប៉ុន្តែថែមទាំងជួយលើកកម្ពស់សោភ័ណភាពទីក្រុង និងបរិស្ថាននៅតំបន់ជុំវិញផងដែរ។ ជាមួយគ្នានេះ អាជ្ញាធរបានអំពាវនាវដល់ប្រជាពលរដ្ឋ សូមចូលរួមថែរក្សាអនាម័យ និងកុំបោះសំរាមចូលក្នុងប្រឡាយ ដើម្បីធានាថាប្រព័ន្ធបង្ហូរទឹកអាចដំណើរការបានយ៉ាងមានប្រសិទ្ធភាពក្នុងរយៈពេលវែង៕ អត្ថបទ៖សំណាង