ទទួលទានអាហារថ្ងៃត្រង់កំលុងរោគរាតត្បាតឱ្យមានសុវត្ថិភាព ត្រូវចេះក្បាច់នេះ

ការទទួលទានអាហារថ្ងៃត្រង់ ខណៈពេលសហគមន៍កំពុងស្ថិតក្នុងវិបត្តិកូវីដ-១៩ គ្រប់គ្នាអាចប្រឈមនឹងហានិភ័យនៃការឆ្លងរោគ ជាពិសេសអ្នកធ្វើការក្រុមហ៊ុន សហគ្រាស និងរោងចក្រជាដើម។  

ក្នុងកំលុងពេលនេះ វិធានការអនាម័យ​និងគម្លាតសង្គម ពិតជារឿងដែលមិនអាចធ្វេសប្រហែសបានឡើយ។ រាល់សកម្មភាពនានាដែលតម្រូវឱ្យចេញក្រៅផ្ទះ សុទ្ធតែមានឱកាសក្នុងការឆ្លងវីរុស។ ដូចនេះ អ្នកធ្វើការដែលធ្លាប់តែទទួលទានអាហារថ្ងៃត្រង់នៅតាមហាងបាយឬកន្លែងការងារ ត្រូវបន្ថែមការប្រុងប្រយ័ត្នទ្វេរឡើង ដើម្បីបញ្ចៀសការចម្លងកូវីដ-១៩ដោយមិនដឹងខ្លួន។

ទាំងនេះជាសេចក្ដីណែនាំខ្លះៗ ទាក់ទិននឹងនឹងការបរិភោគអាហារថ្ងៃត្រង់ ក្នុងអំឡុងរោគរាតត្បាត៖

ការទទួលទានអាហារនៅខាងក្រៅ

– ពិនិត្យមើលមើលទីតាំងហាងបាយឱ្យមែនទែនពាក់ព័ន្ធនឹងអនាម័យ និងគម្លាតតុអាហារ។

– ជ្រើសរើសម៉ោងណាដែលមិនសូវមានមនុស្សចូលច្រើន ដោយអាចចេញទៅញ៉ាំមុនឬក្រោយគេបន្តិច ព្រោះកាលណាមនុស្សតិច ហានិភ័យឆ្លងក៏ទាប។

– អង្គុយនៅតុអាហារដោយរក្សាគម្លាតគ្នាយ៉ាងហោចណាស់ ១ ម៉ែត្រកន្លះ ។

– ប្រើប្រាស់អាល់កុលឬជែលលាងសម្អាតដៃ និងបាញ់អាល់កុលទៅលើកន្លែងអង្គុយជាមុនសិន មុននឹងចូលតុ ។

– មុននឹងប្រើប្រាស់ សម ចង្កឹះ និងស្លាបព្រា សូមជ្រលក់ទៅក្នុងទឹកក្ដៅសិន ឬបើគ្មានទឹកក្ដៅ អាចស្នើសុំម្ចាស់ហាង ។

ការទទួលទានអាហារនៅខាងក្នុង

ស្ថិតក្នុងស្ថានភាពនៃការរីករាលដាល បើអាចចម្អិនអាហារខ្លួនឯង ហើយខ្ចប់មកបរិភោគនៅកន្លែងការងារជាការប្រសើរជាងចេញក្រៅ។ បើពុំនោះទេ អាចកម្មង់អាហារតាមរយៈកម្មវិធីដឹកជញ្ជូនអាហារផ្សេងៗ ក៏ជាការល្អដែរ។ មួយវិញទៀត សម្រាប់អ្នកមានផ្ទះមិនឆ្ងាយពីកន្លែងធ្វើការ គួររើសយកអាហារថ្ងៃនៅផ្ទះ ជាការប្រសើរបំផុត។

ទោះយ៉ាងណា មិនថាបររិភោគអាហារនៅកន្លែងការងារ នៅតាមហាងបាយ ឬនៅផ្ទះក្ដី សូមអនុវត្តជានិច្ចនូវអនាម័យផ្ទាល់ខ្លួនដោយលាងដៃឱ្យបានខ្ជាប់ខ្ជួន ដើម្បីសុវត្ថិភាព៕

ប្រែសម្រួល៖ សន្យា

ប្រភព៖  Asiaone

ចុចអាន៖ ចេញពីធ្វើការចូលផ្ទះ កុំភ្លេចធ្វើតាមតិចនិកនេះ ចៀសវាងនាំកូវីដតាមខ្លួន

ចុចអាន៖ មនុស្ស​ចាស់​ដែល​មាន​ជំងឺ​វង្វេងវង្វាន់​ ប្រឈម​ការ​ស្លាប់​ខ្ពស់​ដោយ​កូវីដ​រហូត​ដល់ ៩០ ភាគរយ​