ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ) ភ្ជាប់ទៅផ្លូវ​​ល្បឿនលឿន​សម្រេច​​បានប្រមាណ ២៧%

មន្រ្តីក្រសួង​សាធារណការ​និងដឹកជញ្ជូន បាន​បង្ហាញវឌ្ឍនភាព​នៃ​ដំណើរការ​សាងសង់ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ) ដែល​​តភ្ជាប់ទៅផ្លូវល្បឿនលឿន​ភ្នំពេញ​បាវិត ដែល​សម្រេច​បានលទ្ធផល​​​​គ្រោងបញ្ចប់ទៅ​តាមផែនការ​គ្រោង​​ទុក។

លោក ផន រឹម មន្រ្តីអ្នកនាំពាក្យ​ក្រសួង​សាធារណការ​ និង​ដឹកជញ្ជូនបាន​ឲ្យ​ដឹង​ថា​​ គិតត្រឹមដើមខែតុលា ឆ្នាំ២០២៥ ដំណើរការ​សាងសង់ស្ពានឆ្លងកាត់ទន្លេមេគង្គ​ដីឥដ្ឋ-ថ្មគរ សម្រេចលទ្ធផល​បានប្រមាណ ២៧% ខណៈ​តាម​ផែនការ​​គ្រោង​ប្រើប្រាស់​រយៈពេល​សាងសង់​ចំនួន ៤៨ ខែ និង​បញ្ចប់នៅ​ឆ្នាំ ២០២៨។

គម្រោងសាងសង់ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ) ស្ថិតនៅក្នុងខេត្តកណ្តាល មានប្រវែងសរុប ១ ៦០០ ម៉ែត្រ និងទទឹង ២៦ ម៉ែត្រ (៤ គន្លងផ្លូវ)។ ក្នុង​គម្រោង​ក្រៅពី​ការ​សាងសង់ស្ពាន ក៏​ត្រូវ​ស្ថាបនា​ផ្លូវតភ្ជាប់ក្បាលស្ពានប្រវែង ២ ១០០ ម៉ែត្រ ទទឹងផ្លូវ ២៦ ម៉ែត្រ ក្រាល​បេតុងកៅស៊ូ (AC) និងសាងសង់ផ្លូវបង្វែរទិសចរាចរណ៍ចំនួន ៤ ខ្សែ គ្រោងបញ្ចប់ក្នុងឆ្នាំ ២០២៨។

កាលពីម្សិលមិញ​នេះ​ ថ្នាក់់ដឹកនាំ​ក្រសួងសាធារណការ​និងដឹកជញ្ជូន បាន​ដឹកនាំប្រតិភូ​និង​មន្រ្តីជំនាញ​ចុះទៅ​ពិនិត្យ​​ការដ្ឋាន​សាងសង់ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ) ដើម្បីពន្លឿនការសាងសង់ឱ្យបានឆាប់រហ័ស។

​លោក ភី សុភាត់ អនុរដ្ឋលេខាធិការ​ក្រសួងសាធារណការ​និងដឹកជញ្ជូនបាន​បញ្ជាក់​ថា ការ​ចុះ​ទៅពិនិត្យនេះ​ក្នុងគោលបំណងចំនួន​ ៤ សំខាន់ៗរួមមាន៖ ១). ការ​ពិនិត្យ​វិធានការណ៍សុវត្ថិភាពនៅផ្នែកផ្លូវក្រវាត់ក្រុងទី ៣ ដែល​បិទបណ្ដោះអាសន្ន​និងចំណុចប្រសព្វនៃផ្លូវ ១១៦ ២). ត្រួតពិនិត្យតំបន់សំណង់សសរគ្រឹះនៃស្ពានលើអាកាស​ត្រង់ PK1+540 និងយល់ដឹងអំពីវឌ្ឍនភាពសំណង់ និងការតេស្តសាកល្បងលទ្ធភាពទ្រទ្រង់របស់សសរគ្រឹះ ៣).ពិនិត្យ​រោងចក្រ​ជួសជុលដែកខាងលិចទន្លេ និងពិនិត្យការប្រតិបត្តិការលុបច្រែះដែកដោយម៉ាស៊ីនឡេស៊ែរ និង ៤). ពិនិត្យតំបន់សំណង់គ្រឹះសសរក្នុងទឹកនៅខាងលិចទន្លេ ដើម្បីយល់ដឹងអំពីបច្ចេកទេសសាងសង់សសរគ្រឹះ៕