ព័ត៌មានជាតិ

សមាជិកព្រឹទ្ធសភាថៃប្រតិកម្មចំពោះការចាក់សំឡេងរំខានពលរដ្ឋខ្មែរ

បានផុស

៩ ខែ មុន

នៅ

ថ្ងៃអាទិត្យ ១២ តុលា ២០២៥

ដោយ

សមាជិកព្រឹទ្ធសភាថៃលោកស្រី Angkhana Neelapaijit បានស្នើដល់រដ្ឋាភិបាលថៃពិនិត្យលើករណីដែលបុគ្គល កាន់ ចមផ្លាំង ប្រើប្រាស់សំឡេងប្រឆាំងពលរដ្ឋខ្មែរនៅភូមិព្រៃចាន់ ឃុំអូរបីជាន ស្រុកអូរជ្រៅ ខេត្តបន្ទាយមានជ័យ។ ការលើកឡើងនេះគឺបន្ទាប់ពីថៃបានចាក់សំឡេងរំខានដល់ដំណេករបស់ពលរដ្ឋខ្មែរចំនួន២យប់ជាប់គ្នា ទោះបីមានអ្នកសង្កេតការណ៍អន្តរកាលចុះពិនិត្យក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែតថៃ Khaosod English បានចុះផ្សាយនៅថ្ងៃទី១២ ខែតុលា នេះដោយបានដកស្រង់សំដីរបស់លោក Angkhana យកមកចុះផ្សាយថា៖ «រាជរដ្ឋាភិបាលថៃគួរតែបានដឹងថារាល់សកម្មភាពទាំងឡាយណា បង្កឱ្យមានអារម្មណ៍ភ័យខ្លាច ឬប៉ះពាល់ដល់ផ្លូវចិត្តរបស់ប្រជាជន ទោះបីអ្នកស្ថិតក្នុងស្ថានភាពជម្លោះក៏ដោយ ជាពិសេសក្រុមងាយរងគ្រោះដែលអាចជាការធ្វើទារុណកម្មផ្លូវចិត្ត ក្រោមអនុសញ្ញាប្រឆាំងទារុណកម្ម និងការប្រព្រឹត្តិមកលើខ្លួន ឬទណ្ឌកម្មឯទៀតដែលឃោឃៅ អមនុស្សធម៌ ឬបន្ថោកបន្ទាប (CAT) ដែលថៃជារដ្ឋភាគី»។

អស់រយៈពេល២យប់ហើយដែលថៃបន្តចាក់សំឡេងរំខានពលរដ្ឋខ្មែរនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បើទោះបីជាមានការចុះសង្កេតការណ៍ដោយក្រុមអ្នកអង្កេតការណ៍អន្តរកាល IOT ក៏ដោយ។ តាមរយៈបទសម្ភាសន៍ជាមួយអ្នកសារព័ត៌មានមេគំនិតនៃការចាក់សំឡេងរំខាននេះ កាន់ ចមផ្លាំង ថាការធ្វើបែបនេះគឺដើម្បីដេញពលរដ្ឋខ្មែរដែលកំពុងរស់នៅខុសច្បាប់លើដីថៃ ហើយការចាក់នេះក៏ត្រូវបានរដ្ឋបាលខេត្តស្រះកែវ និងយោធភូមិភាគ១របស់ថៃអនុញ្ញាតផងដែរ។

សសេរលើបណ្ដាញសង្គមនៅព្រឹកថ្ងៃទី១២ ខែតុលា ឆ្នាំ២០២៥នេះ អគ្គលេខាធិការនៃរាជបណ្ឌិត្យសភាកម្ពុជាលោកបណ្ឌិត យង់ ពៅ បានលើកឡើងថាការបញ្ជាឱ្យ ចមផ្លាំង ធ្វើដូច្នេះគឺថៃចង់បង្ហាញពីភាពគ្មានសីលធម៌របស់ប្រទេសខ្លួន ហើយការដែលថាខ្លួនជាជនរងគ្រោះពីកម្ពុជានោះគឺជាទ្រឹស្ដីដែលស្មោគគ្រោកប៉ុណ្ណោះ។

អ្នកកាសែតថៃលោក Pravin Rojanaphruk ក៏បានសរសេរលើបណ្ដាញសង្គមរបស់លោកដោយសំណួមពរដល់រដ្ឋាភិបាលថៃពិនិត្យឡើងវិញលើករណីនេះដោយថា «សូមកុំឱ្យថៃក្លាយជាឃ្លាំងសំណើចក្នុងកែវភ្នែកសហគមន៍អន្តរជាតិព្រោះតែមនុស្សស្អុយរលួយដែលគ្មានប្រយោជន៍មួយចំនួនឱ្យសោះ»។

គួរឱ្យដឹងផងដែរថាករណីដែលថៃចាក់សំឡេងបង្កការរំខានដល់ពលរដ្ឋខ្មែរភូមិព្រៃចាន់នេះត្រូវបានគណៈកម្មាធិការសិទ្ធិមនុស្សកម្ពុជារៀបចំលិខិតដាក់ទៅឧត្តមស្នងការសិទ្ធិមនុស្សអង្គការសហប្រជាជាតិផងដែរដោយបានអំពាវនាវដល់ស្ថាប័ននេះ ធ្វើការស៊ើបអង្កេតជាបន្ទាន់ អំពាវនាវឱ្យបញ្ឈប់គ្រប់សកម្មភាពដែលគំរាមកំហែងផ្លូវចិត្តប្រជាជនកម្ពុជា ធានាការពារនិងការផ្ដល់ជំនួយវេជ្ជសាស្ត្រនិងផ្លូវចិត្តចាំបាច់ដល់ជនរងគ្រោះ និងលើកទឹកចិត្តក្នុងការពង្រឹងកិច្ចសន្ទនាតាមព្រំដែនរវាងកម្ពុជានិងថៃ។ លោក កែវ រ៉េមី ក៏អញ្ជើញឧត្តមស្នងការសិទ្ធិមនុស្ស UN លោក Volker Turk មកពិនិត្យលើដីជាក់ស្ដែងផងដែរ៕

អត្ថបទដោយ ហ៊ុន សិរីវឌ្ឍន៍

Related Topics:ជម្លោះព្រំដែនកម្ពុជា-ថៃ ភូមិព្រៃចាន់