មន្ទីរ​រៀបចំដែនដី​ខេត្ត​រតនគិរី ចេញវិញ្ញាបនបត្រសម្គាល់កម្មសិទ្ធិសមូហភាពដីទំហំ ១.៩៨០៦ ហិកតាសម្រាប់​ប្រើប្រាស់​រួម

មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តរតនគិរី បានចេញវិញ្ញាបនបត្រសម្គាល់កម្មសិទ្ធិសមូហភាព នៅក្នុងសហគមន៍ជនជាតិដើមភាគតិច ទំពួន ក្បាលដីលេខ ០០១ មានទំហំ ១.៩៨០៦ ហិកតា ស្ថិតនៅភូមិប៉ាអរ ឃុំលុងឃុង ស្រុកបរកែវ សម្រាប់អាស្រ័យផលរួមគ្នា។

លោក ទឹម មុន្នីរ័ត្ន អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តរតនគិរី បានឱ្យដឹងថា ការចេញបណ្ណវិញ្ញាបនបត្រសម្គាល់កម្មសិទ្ធិសមូហភាព របស់ជនជាតិដើមភាគតិចនេះ ជាដំណាក់កាលចុងក្រោយ នៃនីតិវិធីវាស់វែងដីធ្លី សម្រាប់សម្គាល់ថា ដីទាំងអស់នេះមានប័ណ្ណកម្មសិទ្ធិស្របច្បាប់ ដែលសុទ្ធតែមានម្ចាស់ឈរឈ្មោះ ជាម្ចាស់ប័ណ្ណកម្មសិទ្ធិស្របច្បាប់ ដែលពុំមានក្រុមហ៊ុន ឬឯកជនណាមួយ ទៅរំលោភបំពានបានឡើយ។ លោកបន្តថា រាល់ដីសមូហភាពទាំងអស់ ដែលមានចេញវិញ្ញាបនបត្រហើយ អ្នកភូមិជនជាតិដើមភាគតិច មានសិទ្ធិគ្រប់គ្រាន់សម្រាប់ការអាស្រ័យផលរួមគ្នា នៅលើដីដែលមានប័ណ្ណកម្មសិទ្ធិ បានដឹងពីអាជ្ញាធរមូលដ្ឋាន រួមជាមួយមន្ទីរសូរិយោដីផងដែរ។

គួរបញ្ជាក់ផងដែរថា ដីសហគមន៍ជនជាតិដើមភាគតិចទំពួន ត្រូវបានចុះបញ្ជីជាកម្មសិទ្ធិសមូហភាព តាមបច្ចេកទេសសុរិយោដី និងច្បាប់ភូមិបាល ដោយក្រសួងរៀបចំដែនដី នគរូបនីយកម្ម និងសំណង់ និងកាន់កាប់ដោយប្រធានសហគមន៍ ដែលបានឈរឈ្មោះជាតំណាង ជនជាតិដើមភាគតិចទំពួន ។

គួររំលឹកថា នៅអំឡុងខែមិថុនា ឆ្នាំ២០២៥ មន្ទីរសូរិយោដី មានក្រុមការងារចុះវាស់វែងដីធ្លីនិងវិនិច្ឆ័យ ជូនជនជាតិដើមភាគតិច នៅភូមិសាស្ត្រខាងលើកបានរួចរាល់ ត្រូវចំណាយពេលវេលាធ្វើការងារនេះ រហូតទៅដល់ ៥ ខែ ទើបឈានទៅដល់ចេញបណ្ណវិញ្ញាបនបត្រសម្គាល់កម្មសិទ្ធិសមូហភាព៕

អត្ថបទ៖ ខៀវ ចាប