ឯកឧត្ដម នាយឧត្តមសេនីយ៍ គន់ គីម អញ្ជើញចុះពិនិត្យទីតាំងចាក់វ៉ាក់សាំងជូនអតីតយុទ្ធជនកម្ពុជា ខេត្តព្រៃវែង

នៅថ្ងៃទី១១ ខែមេសា ឆ្នាំ២០២១ ឯកឧត្ដម នាយឧត្តមសេនីយ៍ ទេសរដ្ឋមន្រ្តី គន់ គីម អនុប្រធាន និងជាអគ្គលេខាធិការសមាគមន៍អតីតយុទ្ធជនកម្ពុជា បានអញ្ជើញចុះត្រួតពិនិត្យទីតាំងចាក់វ៉ាក់សាំងការពារជំងឺកូវីដ-១៩ ជូនដល់អតីតយុទ្ធ​ជន​​ជាសមាជិកសមាគមន៍អតីតយុទ្ធជនកម្ពុជាខេត្តព្រៃវែង នៅមន្ទីរពេទ្យបង្អែកស្រុកកំចាយមារ។ 

យោងតាមអនុសាសន៍ណែនាំ និងបទបញ្ជាដ៍ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺតម្រូវឲ្យមានការរៀបចំកន្លែងចាក់វ៉ាកសាំងជូនសមាជិកសមាគមន៍អតីតយុទ្ធជនកម្ពុជាខេត្តព្រៃវែង ។

ឯកឧត្ដម នាយឧត្តមសេនីយ៍ ទេសរដ្ឋមន្រ្តី បានមានប្រសាសន៍ថា៖ ទាំងនេះបានគូសបញ្ជាក់ពីការយកចិត្តទុកដាក់ខ្ពស់របស់សម្តេចតេជោ ហ៊ុន សែន ក្នុងការការពារអាយុជីវិតពលរដ្ឋ និងអតីតយុទ្ធជន ដើម្បីឲ្យបានចៀសផុតពីជំងឺឆ្លង​កូវីដ១៩ ដ៏កាចសាហាវ ដែលកំពុងតែកើតមានឡើងនៅលើពិភពលោកយើង ក៏ដូចជាប្រទេសកម្ពុជាយើងផងដែរ។

ឯកឧត្ដម នាយឧត្តមសេនីយ៍ ទេសរដ្ឋមន្រ្តី បានគូសបញ្ជាក់ថា៖ អតីតយុទ្ធជនទៅចាក់វ៉ាក់សាំង សុទ្ធតែបានបង្ហាញទឹកមុខរីករាយជាមួយនឹងការទទួលបានឱកាសចាក់វ៉ាក់សាំងនេះ ព្រោះថាវ៉ាក់សាំងកូវីដ១៩មានតម្លៃណាស់សម្រាប់ការពារអាយុជីវិតរបស់ពួកគាត់ ដែលខុសគ្នាពីការធ្វើសង្រ្គាមលើសមរភូមិ ដែលយើងអាចដឹង និងមើលឃើញទីតាំងសត្រូវ។

សូមបញ្ជាក់ផងដែរថា៖ ចំពោះអតីតយុទ្ធជនដែលត្រូវចាក់វ៉ាក់សាំងទាំងអស់ទូទាំងខេត្តព្រៃវែងមានចំនួន ៣,៤០៨នាក់  ហើយនៅស្រុកកំចាយមារនេះ មានអតីតយុទ្ធជនប្រមាណជិត៧០០នាក់៕

អត្ថបទ ៖ សៅគ្រី