ព័ត៌មានជាតិ

រដ្ឋមន្ត្រីសុខាភិបាល ណែនាំថ្នាក់ដឹកនាំ បន្តចុះពង្រឹងមណ្ឌលសុខភាព និងមន្ទីរពេទ្យបង្អែក ដើម្បីផ្តល់សេវាឱ្យកាន់តែល្អប្រសើរ

បានផុស

៩ ខែ មុន

នៅ

ថ្ងៃអង្គារ ២៨ តុលា ២០២៥

ដោយ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានណែនាំដល់ថ្នាក់ដឹកនាំ បន្តចុះពង្រឹងមណ្ឌលសុខភាព និងមន្ទីរពេទ្យបង្អែកគ្រប់កម្រិត ឱ្យបានគ្រប់មូលដ្ឋានសុខាភិបាល ដើម្បីចុះពិនិត្យផ្ទៀងផ្ទាត់ និងជួយគាំទ្រផ្នែកបច្ចេកទេស និងរដ្ឋបាល សំដៅធានាបានការបម្រើសេវាជូនប្រជាពលរដ្ឋឱ្យកាន់តែល្អប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំកម្រិតថ្នាក់ដឹកនាំលើកទី ២ នៃខែតុលា ដើម្បីពិនិត្យវឌ្ឍនភាពការងារ និងលើកទិសដៅការងារបន្តកាលពីរសៀលថ្ងៃទី ២៧ តុលា លោកសាស្ត្រាចារ្យ ឈាង រ៉ា ក៏បានណែនាំដល់ថ្នាក់ដឹកនាំ និងមន្ទីរពេទ្យទាំងអស់ ត្រូវជំរុញការបម្រើសេវាសុខាភិបាលដល់ប្រជាជនឱ្យប្រកបដោយគុណភាព ប្រសិទ្ធភាព ស័ក្តិសិទ្ធិភាព និងសមធម៌។ ត្រូវណែនាំដល់មន្ត្រី បុគ្គលិកសុខាភិបាល ឱ្យមានស្មារតីរួបរួមគ្នា សហការគ្នា បុរេសកម្ម បង្កើតសកម្មភាព ដើម្បីជំរុញការងារឱ្យកាន់តែល្អប្រសើរ និងរលូនទៅមុខ ហើយត្រូវកែលម្អនូវចំណុចដែលខ្វះខាត និងមិនទាន់ល្អប្រសើរ។ ត្រូវយកចិត្តទុកដាក់ខិតខំអនុវត្តភារកិច្ចរបស់ខ្លួនឱ្យបានខ្ជាប់ខ្ជួន ស្របតាមគោលនយោបាយរាជរដ្ឋាភិបាល និងក្រសួងសុខាភិបាល។

លោកសាស្ត្រាចារ្យ រដ្ឋមន្ត្រី បានជំរុញដល់ថ្នាក់ដឹកនាំ បន្តចុះពង្រឹងមណ្ឌលសុខភាពជុំទី ២ និងមន្ទីរពេទ្យបង្អែកគ្រប់កម្រិត ឱ្យបានគ្រប់មូលដ្ឋានសុខាភិបាល ដើម្បីចុះពិនិត្យផ្ទៀងផ្ទាត់ និងជួយគាំទ្រផ្នែកបច្ចេកទេស រដ្ឋបាល សំដៅធានាបានការបម្រើសេវាឱ្យកាន់តែល្អប្រសើរ និងកាន់តែកៀកប្រជាពលរដ្ឋ។

លោកសាស្ត្រាចារ្យ បានបន្តថា «សូមចងចាំថា ការងារត្រូវបង្កើតឡើងដោយខ្លួនយើង ហើយការងារពេលនេះ នឹងត្រូវវាយតម្លៃសម្រាប់ពេលអនាគត»។

លោកសាស្ត្រាចារ្យរដ្ឋមន្ត្រី ក៏បានសង្កត់ធ្ងន់ឱ្យថ្នាក់ដឹកនាំទាំងអស់ ត្រូវបន្តយកចិត្តទុកដាក់លើសុវត្ថិភាពអ្នកជំងឺ ដែលជាកត្តាសំខាន់ក្នុងការបម្រើសេវាសុខាភិបាលជូនដល់ប្រជាជន ដោយត្រូវអនុវត្តឱ្យបានខ្ជាប់ខ្ជួន និងមានទំនួលខុសត្រូវខ្ពស់ ក្នុងនាមអ្នកវិជ្ជាជីវៈសុខាភិបាល៕

អត្ថបទ ៖ សំអឿន