វិមានឯករាជ្យក្នុងខេត្តរតនគិរី បញ្ចប់ការសាងសង់ ត្រៀមបំពាក់ភ្លើងហ្វាបំភ្លឺ

អភិបាលខេត្តរតនគិរី លោក ញ៉ែម សំអឿន បានចុះពិនិត្យវឌ្ឍនភាពនៃការសាងសង់វិមានឯករាជ្យ និងត្រៀមតុបតែងភ្លើងពណ៌ និងភ្លើងហ្វាបំភ្លឺ ដើម្បីអបអរពិធីបុណ្យឯករាជ្យជាតិ ៩ វិច្ឆិកា និងប្រែក្លាយតំបន់នេះជា​កន្លែងប្រារព្វពិធីផ្សេងៗ សួនសាធារណៈ និងកន្លែងហាត់ប្រាណជាដើម។

“វិមានឯករាជ្យនេះ ជាសមិទ្ធិផលថ្មីលើទឹកដីខេត្តរតនគិរី។យើងនឹងសាកដំឡើងភ្លើងហ្វាបំភ្លឺនៅទីនេះថាតើស្អាតប៉ុណ្ណា ។ ទីតាំងព្រលាននេះនឹងក្លាយជាកន្លែងប្រារព្ឋពិធីធំៗរបស់ជាតិ និងអន្តរជាតិ ជាកន្លែងប្រគុំតន្ត្រី និងពិធីផ្សេងៗ ជាសួនធំ ជាកន្លែងហាត់កីឡា ជារម្មណីយដ្ឋាន ជាកន្លែងជួបជុំ”។ នេះជាការលើកឡើងរបស់លោក ញ៉ែម សំអឿន ដែលបានចុះពិនិត្យវឌ្ឍនភាព កាលពីថ្ងៃទី​២៨ ខែតុលា ឆ្នាំ ២០២៥។

ក្រោយចុះពិនិត្យ រដ្ឋបាលខេត្តបានចាត់ក្រុមការងារជំនាញបំពាក់ភ្លើងបំភ្លឺលម្អនៅពេលយប់ថ្ងៃទី ២៩ ខែ តុលា ដើម្បីត្រៀមសម្រាប់ពិធី បុណ្យអុំទូក បណ្តែតប្រទីប អកអំបុក និងសំពះព្រះខែ នៅក្នុងខេត្តរតនគិរី ដែលនឹងចូលមកដល់នៅថ្ងៃ ៤-៦ ខែវិច្ឆិកា។

គួរជម្រាបថា វិមានឯករាជ្យក្នុងខេត្តរតនគិរី បានបញ្ចុះបឋមសិលាសាងសង់កាលពី ខែមករា ឆ្នាំ២០២៣ ក្រោមអធិបតីភាពលោក ជៀង អំ រដ្ឋលេខាធិការក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តរតនគិរី និងបញ្ចប់សាងសង់ក្នុងខែតុលា ឆ្នាំ ២០២៥។

លោក ញ៉ែម សំអឿន អភិបាលខេត្តរតនគិរី បានលើកឡើងថា ដំបូងឡើយ សំណង់វិមានឯករាជ្យនេះ គ្រោងចំណាយថវិកាសាងសង់ប្រមាណ៧០ម៉ឺនដុល្លារ តែមិនគ្រប់គ្រាន់ការចំណាយ ទើបមានការបន្ថែមរហូតដល់ជាង១លានដុល្លារ។ វិមានឯករាជ្យនេះ មានទំហំប្រាង្គ ៣៣ម៉ែត្រគុណ៣៣ម៉ែត្រ មានអង្កត់ផ្ចិត រង្វង់កំណោង ដាក់តំណាងផ្នូរសពបុព្វបុរសមានអង្កត់ផ្ចិត ៦៣ម៉ែត្រ និងមានកម្ពស់ប្រាង្គវិមានឯករាជ្យប្រវែង ២៣.១ម៉ែត្រ។

ខេត្តរតនគិរី ត្រូវបានបង្កើតឡើងនៅថ្ងៃទី១៧ ខែកុម្ភៈ ឆ្នាំ១៩៥៩ ដោយព្រះហស្ថលេខាដោយសម្តេច ព្រះនរោត្តម សុរាម្រិត តាមរយៈសំណើររបស់ទេសរដ្ឋមន្ត្រីទទួលបន្ទុកក្រសួងមហាផ្ទៃ ផូ ព្រឿង និងនាយករដ្ឋមន្ត្រីស្តីទី សុន សាន ដែលត្រូវបានកាត់ចេញពីខេត្តស្ទឹងត្រែង និងមានតំបន់រដ្ឋបាលនៅស្រុកអណ្តូងពេជ្រ (ស្រុកបរកែវនាពេលបច្ចុប្បន្ន) និងស្រុកលំផាត់ ដែលមានផ្ទៃដីសរុបចំនួន១០,៤៥០ គីឡូម៉ែត្រការ៉េ និងមានស្រុកចំនួន០៣ គឺស្រុកវើនសៃ ស្រុកអណ្តូងពេជ្រ និងស្រុកលំផាត់៕

ដោយ៖ ខៀវ ចាប