ព័ត៌មានជាតិ

អាជ្ញាធរសង្កាត់ភ្លើងឆេះរទេះ ឈូសឆាយផ្លូវលំ ១ ខ្សែ និងកាយដាក់ប្រព័ន្ធលូថ្មីជូនពលរដ្ឋ

បានផុស

៦ ខែ មុន

នៅ

ថ្ងៃព្រហស្បតិ៍ ៣០ តុលា ២០២៥

ដោយ

ដោយមានការយកចិត្តទុកដាក់របស់លោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល ទើបនៅព្រឹកថ្ងៃទី ៣០ ខែតុលា ឆ្នាំ ២០២៥ នេះ លោក ស៊ិន វុទ្ធី ចៅសង្កាត់ភ្លើងឆេះរទេះ បានដឹកនាំក្រុមការងារដាក់គ្រឿងចក្រឈូសឆាយផ្លូវលំ ១ ខ្សែ ចាក់ដីបំពេញជង្ហុកតូច-ធំ និងកាយរៀបចំប្រព័ន្ធលូថ្មីជូនប្រជាពលរដ្ឋក្នុងមូលដ្ឋាន ដើម្បីបញ្ចៀសការជន់លិចដោយជំនន់ទឹកភ្លៀងនារដូវវស្សា។

លោក ពៅ ប៊ុនរី មន្ត្រីសង្កាត់ភ្លើងឆេះរទេះ បានឲ្យដឹងថា ក្រោយពីមានការស្នើសុំពីប្រជាពលរដ្ឋថាទីតាំងខាងលើតែងតែជន់លិចពេលភ្លៀងមក នារដូវវស្សា ខណៈទីតាំងនោះមិនមានប្រព័ន្ធលូបង្ហូរទឹកគ្រប់គ្រាន់ និងផ្លូវទ្រុឌទ្រោមពិបាកធ្វើដំណើរ ទើបអាជ្ញាធរ លោកចៅសង្កាត់ភ្លើងឆេះរទេះ បានចុះដឹកនាំក្រុមការងារធ្វើការចាក់ដីលាយថ្មមកបំពេញជង្ហុកតូច-ធំ ដាក់គ្រឿងចក្រឈូសឆាយផ្លូវ ថែមទាំងកាយរៀបចំដាក់ប្រព័ន្ធលូថ្មីតែម្ដង។

អាជ្ញាធរ បានឲ្យដឹងដែរថា ការកាយដាក់លូជូនប្រជាពលរដ្ឋខាងលើនេះ ស្ថិតនៅក្នុងភូមិព្រៃកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ មានប្រវែងប្រហែល ២១៥ ម៉ែត្រ មុខកាត់ ១ ម៉ែត្រ។

អាជ្ញាធរ ក៏បានអំពាវនាវដល់ប្រជាពលរដ្ឋទាំងអស់ សូមមេត្តាទុកដាក់វេចខ្ចប់សំរាមក្នុងធុងសំរាមដែលអាជ្ញាធរកំណត់គោលដៅឲ្យដាក់ និងចៀសវាងបោះចោលតាមប្រឡាយ ឬចូលប្រព័ន្ធលូងាយនឹងស្ទះចរន្តទឹកហូរ៕

អត្ថបទ ៖ សុខា