ស្ថានទូតជប៉ុនរៀបចំពិធីអបអរសាទរខួប៧១ឆ្នាំការបង្កើតកងកម្លាំងស្វ័យការពារជាតិជប៉ុន

ស្ថានទូតជប៉ុនក្នុងរាជធានីភ្នំពេញ កាលពីយប់ថ្ងៃទី១៤ ខែវិច្ឆិកា ឆ្នាំ២០២៥​ បានរៀបចំពិធីអបអរសាទរខួប៧១ឆ្នាំនៃការបង្កើតកងកម្លាំងស្វ័យការពារជាតិជប៉ុន។ ពិធីអបអរសាទរនេះ គឺធ្វើឡើងក្រោមវត្តមានជាអធិបតីរវាងលោក អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា និងនាយឧត្តមសេនីយ៍ ចៅ ភិរុណ រដ្ឋលេខាធិការ តំណាងឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា ជាមួយវត្តមានចូលរួមពីសំណាក់ថ្នាក់ដឹកនាំព្រឹទ្ធសភា តំណាងរដ្ឋាភិបាល កងយោធពលខេមរភូមិន្ទ រួមទាំងបណ្ដាអង្គទូតនៅកម្ពុជា។

ឯកអគ្គរាជទូតជប៉ុន លោក អ៊ូអិណុ អាត់ស៊ូស៊ី បានថ្លែងថា កងកម្លាំងស្វ័យការពារជាតិត្រូវបានបង្កើតឡើងក្នុងឆ្នាំ១៩៥៤ ហើយឆ្នាំនេះគឺជាខួបលើកទី៧១ ក្រោយការបង្កើត។ បើតាមលោកឯកអគ្គរាជទូត កងកម្លាំងស្វ័យការពារជាតិជប៉ុនបានរួមចំណែកយ៉ាងធំធេង មិនត្រឹមតែចំពោះការការពារប្រទេសជប៉ុនខ្លួនឯងប៉ុណ្ណោះទេ ប៉ុន្តែថែមទាំងចំពោះសន្តិភាព និងស្ថិរភាពនៃតំបន់ឥណ្ឌូ-ប៉ាស៊ីហ្វិក និងនិយាយជារួម ចំពោះសន្តិភាព និងស្ថិរភាពរបស់សហគមន៍អន្តរជាតិទាំងមូល។

លោកទូតជប៉ុន ក៏បានគូសរំលេចពីការចូលរួមរបស់កងកម្លាំងស្វ័យការពារជាតិនេះ ដែលបានរួមចំណែកក្នុងបេសកកម្មអ៊ុនតាក់ នៅប្រទេសកម្ពុជា ក្នុងឆ្នាំ១៩៩២។ ក្នុងកិច្ចសហប្រតិបត្តិទ្វេភាគីជាមួយកម្ពុជានេះ លោក អ៊ូអិណុ អាត់ស៊ូស៊ី លើកឡើងថា កងកម្លាំងស្វ័យការពារជាតិបានគាំទ្រសកម្មភាពអស់រយៈពេលជាច្រើនឆ្នាំ ដោយផ្តល់ការបណ្តុះបណ្តាលផ្សេងៗដល់អង្គភាពកងកម្លាំងរក្សាសន្តិភាពរបស់កម្ពុជា។

ពីវេទិកាយប់មិញ លោកឯកអគ្គរាជទូត បានថ្លែងអំណរគុណជាថ្មីម្តងទៀតចំពោះការគាំទ្រ និងកិច្ចសហប្រតិបត្តិការក្នុងសកម្មភាពរបស់កងកម្លាំងស្វ័យការពារជាតិ ហើយរំពឹងថា កិច្ចសហប្រតិបត្តិការលើវិស័យសន្តិសុខរវាងកម្ពុជា និងជប៉ុន បន្តអភិវឌ្ឍន៍កាន់តែរឹងមាំបន្ថែមទៀត។

ជាអញ្ជើញចូលរួមក្នុងពិធីខាងលើ នាយឧត្តមសេនីយ៍ ចៅ ភិរុណ រដ្ឋលេខាធិការក្រសួងការពារជាតិ បានសម្តែងនូវការអបអរសាទរដល់ប្រទេសជប៉ុនក្នុងឱកាសរំលឹកខួបអនុស្សាវរីយ៍លើកទី៧១ នៃថ្ងៃបង្កើតកងស្វ័យការពារជាតិជប៉ុន។

នាយឧត្តមសេនីយ៍ រដ្ឋលេខាធិការ បានថ្លែងអំណរគុណចំពោះរដ្ឋាភិបាល ក្រសួងការពារជាតិ និងប្រជាជនជប៉ុន ដែលតែងតែឧបត្ថម្ភគាំទ្រដល់កម្ពុជាលើគ្រប់វិស័យ រួមទាំងវិស័យការពារជាតិ ជាពិសេសកងស្វ័យការពារជាតិជប៉ុន ដែលបានយល់ព្រមគាំទ្រក្នុងការជួយកសាងវិទ្យាស្ថានពហុជំនាញតេជោសែន លើជំនាញបញ្ជូនសារ និងគីមីសាស្ត្រ ទាំងសម្ភារៈ និងយោធាចារ្យ ដល់កងទ័ពជើងគោក នៃកងយោធពលខេមរភូមិន្ទ៕