អនុប្រធានព្រឹទ្ធសភាប្រាប់ទូតជប៉ុន ថា គោលនយោបាយអន្តរជាតិកម្ពុជា គឺកសាងមិត្ត មិនបង្កើតសត្រូវ

អនុប្រធានទី២ព្រឹទ្ធសភាកម្ពុជា លោកបណ្ឌិត ធន់ វឌ្ឍនា បានបញ្ជាក់ទៅកាន់ភាគីជប៉ុនពីគោលនយោបាយអន្តរជាតិរបស់កម្ពុជា គឺកសាងមិត្ត មិនបង្កើតសត្រូវ និងឈរលើគោលការណ៍ច្បាប់ និងភាពត្រឹមត្រូវ។

ការគូសបញ្ជាក់របស់អនុប្រធានព្រឹទ្ធសភាកម្ពុជា ធ្វើឡើងក្នុងពេលដែលលោកទទួលជួបពិភាក្សាការងារជាមួយលោក UENO Atsushi ឯកអគ្គរដ្ឋទូតជប៉ុនប្រចាំនៅកម្ពុជា រួមជាមួយលោកសាស្ត្រាចារ្យ Hosoya Yuichi អ្នកជំនាញនយោបាយអន្តរជាតិដ៏ល្បីមកពីសកលវិទ្យាល័យ Keio Tokyo។

ជំនួបនៅវិមានព្រឹទ្ធសភា កាលពីរសៀលថ្ងៃទី២៦ ខែវិច្ឆិកា លោកបណ្ឌិត ធន់ វឌ្ឍនា លើកឡើងថា គោលនយោបាយអន្តរជាតិរបស់កម្ពុជា គឺកសាងមិត្ត មិនបង្កើតសត្រូវ និងឈរលើគោលការច្បាប់ និងភាពត្រឹមត្រូវ។ តួស្ដែងចំពោះបញ្ហាជម្លោះព្រំដែនជាមួយប្រទេសជិតខាង លោកអនុប្រធានព្រឹទ្ធសភា បានបញ្ជាក់ពីការប្តេជ្ញាចិត្តរបស់កម្ពុជាចំពោះដំណោះស្រាយការទូតដោយសន្តិវិធី ដោយលោកសង្កត់ធ្ងន់ពីភាពចាំបាច់នៃការគោរពច្បាប់អន្តរជាតិ ពិសេសគឺសេចក្តីប្រកាសរួមស្តីពីសន្តិភាពកម្ពុជា និងថៃ ដែលបានចុះហត្ថលេខាកាលពីថ្ងៃទី២៦ ខែតុលាកន្លងមក។

ស្របនឹងការលើកឡើងរបស់ភាគីកម្ពុជា លោកសាស្ត្រាចារ្យ Hosoya Yuichi បានបង្ហាញនូវការមើលឃើញពីគោលនយោបាយអន្តរជាតិកម្ពុជា ដែលតែងតែឈរជាមួយគោលការណ៍ត្រឹមត្រូវ និងយុត្តិធម៌។ តបទៅនឹងគោលនយោបាយអន្តរជាតិកម្ពុជា សាស្ត្រាចារ្យជប៉ុនរូបនេះ ក៏បានលើកឡើងពីគោលនយោបាយអន្តរជាតិជប៉ុន ដែលកំពុងអនុវត្តដោយនាយករដ្ឋមន្រ្តីថ្មី លោកស្រី Sanae Takaichi ជាពិសេសតួនាទីរបស់ជប៉ុនក្នុងក្របខ័ណ្ឌសន្តិសុខ និងសក្ដានុភាពតំបន់នៅអាស៊ីបូព៌ា អាស៊ាន និងទ្វីបអាហ្រ្វិក។

សម្រាប់ទំនាក់ទំនងជាទ្វេភាគី លោកសាស្ត្រាចារ្យ ចាត់ទុកកម្ពុជា ថា ជាមិត្តល្អ និងមិត្តយូរអង្វែងរបស់ជប៉ុន ជាពិសេសកម្ពុជា គឺជាប្រទេសដំបូងបំផុតដែលប្រកាសគាំទ្រយុទ្ធសាស្រ្តឥណ្ឌូប៉ាស៊ីហ្វិកសេរី និងបើកចំហរបស់ជប៉ុន។

និយាយដល់ទំនាក់ទំនងកម្ពុជា និងជប៉ុន លោកបណ្ឌិត ធន់ វឌ្ឍនា អនុប្រធានព្រឹទ្ធសភា និងលោក អូអ៊ិណុក អាត់ស៊ូស៊ី ឯកអគ្គរដ្ឋទូតជប៉ុន បានលើកឡើងពីសារៈសំខាន់នៃកិច្ចសហប្រតិបត្តិការទ្វេភាគី ដើម្បីពង្រឹងទំនាក់ទំនងកម្ពុជា និងជប៉ុនឱ្យកាន់តែរីកចម្រើនបន្ថែមទៀត ដោយផ្តោតលើការអភិវឌ្ឍហេដ្ឋារចនាសម្ព័ន្ធសាធារណៈ ការវិនិយោគពីជប៉ុន ការបង្កើតរោងចក្រកែច្នៃ និងឥណនទានសម្បទាន ជាដើម៕