កម្ពុជា នឹងពិចារណាប្ដឹងទៅកាន់ស្ថាប័នមានសមត្ថកិច្ចអន្តរជាតិ ទាមទារឲ្យថៃទទួលខុសត្រូវចំពោះទង្វើបាញ់សម្លាប់ពលរដ្ឋខ្មែរនៅភូមិព្រៃចាន់

បន្ទាប់ពីបញ្ចប់ការស្រាវជ្រាវ ការស៊ើបអង្កេត ការប្រមូលព័ត៌មាន និងការប្រមូលភស្តុតាងគ្រប់ជ្រុងជ្រោយជាស្ថាពរ ដើម្បីកសាងសំណុំរឿងដោយឈរលើ មូលដ្ឋាននៃច្បាប់អន្តរជាតិ កម្ពុជានឹងពិចារណាប្តឹងទៅស្ថាប័នមានសមត្ថកិច្ចអន្តរជាតិ ដើម្បីទាមទារឱ្យ មានការទទួលខុសត្រូវ និង ការផ្តល់យុត្តិធម៌ ជូនដល់ប្រជាពលរដ្ឋស៊ីវិលស្លូតត្រង់របស់កម្ពុជា ដែលត្រូវបាន យោធាថៃបាញ់សម្លាប់កាលពីថ្ងៃទី១២ ខែវិច្ឆិកា។ នេះគឺជាការបញ្ជាក់របស់អ្នកនាំពាក្យក្រសួងមហាផ្ទៃកម្ពុជា តាមរយៈសេចក្ដីប្រកាសព័ត៌មានចេញនារសៀលថ្ងៃទី១២ ខែវិច្ឆិកានេះ។

បើតាមអ្នកនាំពាក្យក្រសួងមហាផ្ទៃ  ក្នុងដំណាក់កាលបច្ចុប្បន្ន សមត្ថកិច្ចបាននិង កំពុងស្រាវជ្រាវ ស៊ើបអង្កេត និងប្រមូលភស្តុតាងចំពោះករណីដែលភាគីថៃបានបើកការបាញ់សម្លាប់ប្រជាពលរដ្ឋខ្មែរនៅភូមិព្រៃចាន់ ដែលបណ្ដាលឲ្យពលរដ្ឋខ្មែរម្នាក់ស្លាប់បាត់បង់ជីវិតនៅនឹងកន្លែង និង៣នាក់ទៀតរងរបួសធ្ងន់ ដោយមានការចូលរួមពីក្រុមអ្នកសង្កេតការណ៍អាស៊ាន (AOT)និង អ្នកជំនាញបរទេស។

សូមរំលឹកថា បន្ទាប់ពីយោធាថៃដើរជាន់មីនបណ្ដាលឲ្យដាច់ជើងនិងរងរបួស នាយករដ្ឋមន្ត្រីថៃក៏ប្រកាសផ្អាកការអនុវត្តកិច្ចព្រមព្រៀងសន្តិភាព ក្រោយមកនៅវេលាម៉ោង៣:៥០នាទី ថ្ងៃទី១២ ខែវិច្ឆិកា យោធាថៃក៏បានបើកការបាញ់ប្រហារមកលើពលរដ្ឋខ្មែរស្លូតត្រង់នៅភូមិព្រៃចាន។ សកម្មភាពនេះកើតឡើងបន្ទាប់ពីយោធាថៃបានបង្កហេតុជាបន្តបន្ទាប់នៅតាមបន្ទាត់ព្រំដែនក្ដៅជាមួយកម្ពុជា ក្នុងចេតនាញុះញង់ឲ្យកងទ័ពកម្ពុជាតបត្តផ្ទុះចេញជាភ្លើងសង្គ្រាមម្ដងទៀត ប៉ុន្តែកងកម្លាំងរបស់កម្ពុជាមិនតបៗឡើយ។

ជុំវិញទង្វើយោធាថៃបាញ់សម្លាប់ពលរដ្ឋខ្មែរស្លូតត្រង់ ប្រមុខរាជរដ្ឋាភិបាល សម្ដេច ហ៊ុន ម៉ាណែត បានប្រើប្រាស់វិធីសាស្រ្តការទូតធ្វើការថ្កោលទោសនិងតវ៉ាទៅកាន់ភាគីថៃ។

ទោះបីជាយ៉ាងណារាជរដ្ឋាភិបាលទីក្រុងភ្នំពេញមិនបានជ្រើសរើសវិធីសាស្រ្តប្រើអាវុធ ឬកងកម្លាំងនិងអំពើហិង្សាឆ្លើយតបទៅកាន់ភាគីថៃវិញឡើយ ព្រោះរាជរដ្ឋាភិបាលទីក្រុងភ្នំពេញ យល់ថាការដោះស្រាយបញ្ហាដោយអំពើហឹង្សា ឬប្រើប្រាស់កម្លាំងប្រដាប់អាវុធ គឺមិនផ្តល់ផលប្រយោជន៍ណាមួយ ឬមិនបង្កលក្ខណ:វិជ្ជមានសម្រាប់ការដោះស្រាយបញ្ហា ព្រមទាំងបង្កហានិភ័យគ្រោះថ្នាក់អាយុជីវិត និងទ្រព្យសម្បត្តិរបស់ប្រជាពលរដ្ឋស៊ីវិលស្លូតត្រង់ថែមទៀត។ ចំណែកភាគីថៃបង្កហេតុជាបន្តបន្ទាប់។

នាយករដ្ឋមន្ត្រីកម្ពុជា បានទូរសព្ទទៅកាន់នាយករដ្ឋមន្ត្រីម៉ាឡេស៊ី និងប្រធានាធិបតីសហរដ្ឋអាមេរិក ដើម្បីបញ្ជាក់ពីការវិវត្តថ្មីៗនៅតាមព្រំដែននិងជំហររបស់កម្ពុជាក្នុងការដោះស្រាយបញ្ហាដោយសន្តិវិធី៕