ព័ត៌មានជាតិ

អគ្គនាយកស៊ីម៉ាក់មានការសង្ស័យលើឧបទ្ទវហេតុចិនជាន់មីននៅចំការមីនជាប់ព្រំដែនថៃ

បានផុស

៧ ខែ មុន

នៅ

ថ្ងៃអាទិត្យ ៣០ វិច្ឆិកា ២០២៥

ដោយ

អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជាលោក ហេង រតនា ថាការចោទប្រកាន់វាយប្រហារពីថៃលើកម្ពុជាករណីជនជាតិចិនជាន់មីននៅចំការមីននៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានបង្កើតជាចម្ងល់ និងភស្ភុតាងមួយចំនួន។ លោកបាននឹកឃើញដល់ព្រឹត្តិការណ៍ប្រវត្តិសាស្ត្រដែលថៃយកពលរដ្ឋខ្មែរមកចាក់ចោលនិងរុញច្រានពលរដ្ឋទាំងនោះឱ្យដើរចូលចម្ការមីន ដោយរម្លឹកពលរដ្ឋត្រូវតែចងចាំព្រឹត្តិការណ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងលើហ្វេសបុកលោកនៅថ្ងៃទី៣០ ខែវិច្ឆិកា ឆ្នាំ២០២៥នេះ លោក ហេង រតនា បានលើកឡើងថាតំបន់ដែលចិនជាន់មីននោះតំបន់ចម្ការមីនតាំងពីឆ្នាំ១៩៨០ ដែលមានទំនប់ជីក លេណដ្ឋានទ័ព របងបន្លាលួស និងព្រៃក្រាស់ខាងភាគីកម្ពុជា ដែលជាចំនោទបញ្ហា និងភស្ភុតាងមួយចំនួនដែលគួរពិចារណា។

ដោយមិនចោទប្រកាន់ថាករណីនេះអាចត្រូវបានថៃឱ្យជនជាតិចិននេះដើរចូលចម្ការមីនខ្មែរ តែលោកបានរម្លឹកដល់ព្រឹត្តិការណ៍ដែលទាហានថៃដឹកជនភៀសខ្លួនកម្ពុជាមកទម្លាក់ចោលនៅជួរភ្នំដងរែក បង្ខំឱ្យដើរកាត់ចម្ការមីនមកកម្ពុជាវិញបណ្ដាលឱ្យមនុស្សស្លាប់ជាច្រើនកាលពីឆ្នាំ១៩៧៩។

លោកថា៖ «នេះជារឿងរ៉ាវប្រវត្តិសាស្ត្រត្រូវតែរំលឹកចងចាំនិងមិនអាចបំភ្លេចបាន»។

គួរឱ្យដឹងដែរថាជនជាតិចិនឈ្មោះ SHI JINGUI ត្រូវបានសារព័ត៌មានថៃចុះផ្សាយថាបានជាន់មីនផ្ទុះដាច់ជើងនៅម៉ោង៣និង២០នាទីព្រឹកថ្ងៃទី២៩ ខែវិច្ឆិកា ឆ្នាំ២០២៥ នៅពេលដេលជនរូបនេះព្យាយាមឆ្លងដែនចេញពីកម្ពុជាទៅប្រទេសថៃដោទប្រកាន់កម្ពុជាថាមិនសហការដោះមីនតាមព្រំដែន។ ទោះជាយ៉ាងណាក្រសួងមហាផ្ទៃកម្ពុជាបានបញ្ជាក់ថាឈ្មោះខាងលើមិនមានក្នុងប្រព័ន្ធទិន្នន័យកត់ត្រារបស់អ្នកដំណើរចេញចូលកម្ពុជារបស់អគ្គនាយកដ្ឋានអន្តោប្រវេសន៍ទេ។

ក្រសួងការពារជាតិនៅថ្ងៃនេះក៏បានចេញសេចក្ដីប្រកាសព័ត៌មានមួយច្រានចោលការចោទប្រកាន់របស់ថៃ បញ្ជាក់ពីការប្ដេជ្ញាចិត្តចំពោះការងារការពារអាយុជីវិតពលរដ្ឋ និងកិច្ចសហការដោះមីនផងដែរ។ កម្ពុជាជំរុញឱ្យភាគីថៃអនុវត្តឱ្យបានម៉ឺងម៉ាត់នូវកិច្ចព្រមព្រៀងដែលភាគីទាំងពីរបានឯកភាពគ្នារួចមកហើយ ដោយការងារដោះមីនមនុស្សធម៌នៅតាមព្រំដែន ត្រូវធ្វើឡើងតាមរយៈក្រុមការងារ JCTF និងស្របតាម SOP ដែលបានឯកភាពគ្នា៕

អត្ថបទដោយ ហ៊ុន សិរីវឌ្ឍន៍