អាជ្ញាធរសង្កាត់ស្រះចក ដឹកនាំមន្រ្តីក្រោមឱវាទចុះពិនិត្យ ការស្ថាបនាប្រព័ន្ធលូ ផ្លូវបេតុងថ្មីក្នុងមូលដ្ឋាន

អាជ្ញាធរមូលដ្ឋានសង្កាត់ស្រះចក ចុះត្រួតពិនិត្យមើលគម្រោងអភិវឌ្ឍន៍ធ្វើប្រព័ន្ធលូ និងចាក់បេតុងថ្មី ដែលជាគម្រោងរបស់សាលារាជធានីភ្នំពេញ ដើម្បីសម្រួលដល់ការប្រើប្រាស់ប្រចាំថ្ងៃរបស់ពលរដ្ឋ និងលើកកម្ពស់ហេដ្ឋារចនាសម្ព័ន្ធនៅក្នុងមូលដ្ឋានសង្កាត់ផងដែរ ។

ជាក់ស្តែងនៅថ្ងៃទី០១ ខែធ្នូ ឆ្នាំ២០២៥ លោកស្រី អិន សាផន ចៅសង្កាត់ស្រះចក បានដឹកនាំមន្ត្រីក្រោមឱវាទចុះពិនិត្យគម្រោងធ្វើប្រព័ន្ធលូ និង ចាក់បេតុង នៅផ្លូវលេខ៨០ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

លោកស្រី អ៉ី លី ជា​ប្រជាពលរដ្ឋ​រស់នៅ​តំបន់​ខាងលើ បាន​សម្តែង​ការ​សាទរ​ទៅកាន់​អាជ្ញាធរ ចំពោះ​ការ​យកចិត្តទុកដាក់​មក​កាន់​ពលរដ្ឋ​រស់នៅ​មូលដ្ឋាន​សង្កាត់ ដែល​ការ​ផ្លាស់ប្ដូរ​ប្រព័ន្ធ​លូ និង​ស្ថាបនា​ផ្លូវ​បេតុង​នេះ​ឡើងវិញ ជួយ​សម្រួល​បន្ទុក​ជាច្រើន លែង​មាន​ក្លិនស្អុយ​ចេញពី​ទឹក​ដក់​លើ​ផ្លូវ ធ្វើ​ឲ្យ​ប្រព័ន្ធ​លំហូរ​ទឹក​ដំណើរការ​លឿន​ជាង​មុន។ ជាពិសេស​បាន​ផ្លូវ​បេតុង ០១ ខ្សែថ្មីទៀតឡើងវិញ ស្រួល​ធ្វើដំណើរ​ចេញចូល​ផ្ទះ និង​ទៅ​ប្រកប​ការងារ​ផង​ដែរ។

ជាមួយគ្នាផងដែរ លោកស្រី អិន សាផន ចៅសង្កាត់ស្រះចក បានប្រាប់កម្ពុជាថ្មីអោយដឹងថា គម្រោងអភិវឌ្ឍន៍នេះ ជាគម្រោងអភិវឌ្ឍន៍របស់សាលារាជធានីភ្នំពេញ ដោយដាក់ប្រព័ន្ធលូប្រវែងជាង ២០០ម៉ែត្រ មានមុខកាត់១ម៉ែត្រ ចំណែកផ្លូវបេតុងមានប្រវែងជាង២០០ម៉ែត្រ ទទឹង៨ម៉ែត្រ ។

លោកស្រីបានបន្ថែមទៀតថា អាជ្ញាធរមូលដ្ឋានក៏បានសំណូមពរប្រជាពលរដ្ឋដែលរស់នៅអមសាងខាងផ្លូវ និងប្រជាពលរដ្ឋដែលធ្វើដំណើរឆ្លងកាត់ សូមមេត្តាយោគយល់ អធ្យាស្រ័យដល់ក្រុមការងារដែលកំពុងស្ថាបនាផ្លូវនេះ សូមចូលរួមសហការគ្នា ជាមួយក្រុមការងារដែលកំពុងស្ថាបនាផ្លូវ ព្រោះជាធម្មតាការអភិវឌ្ឍតែងតែមានផលប៉ះពាល់ដល់ប្រជាពលរដ្ឋតាមដងផ្លូវ ក៏ដូចជាអ្នកធ្វើដំណើរឆ្លងកាត់ជាដើម៕