ព័ត៌មានជាតិ

អាជ្ញាធរខណ្ឌឫស្សីកែវ ចាត់វិធានការក្តៅរុះរើកាត់សំយាបរំលោភចិញ្ចើមផ្លូវ ៥៩៨ ផ្សារទំនប់

បានផុស

៧ ខែ មុន

នៅ

ថ្ងៃចន្ទ ១ ធ្នូ ២០២៥

ដោយ

ក្រោយផុតថ្ងៃឱសានវាទអំពីសេចក្ដីជូនដំណឹង រុះរើ កាត់សំយាប នៅចំណុចផ្សារទំនប់ ៥៩៨ អាជ្ញាធរខណ្ឌឫស្សីកែវ បានចុះអនុវត្តវិធានការក្តៅ រុះរើកាត់ស្លាកយីហោ សំយាប ដែលអាជីវករ និងប្រជាពលរដ្ឋសាងសង់រំលោភចិញ្ចើមផ្លូវសាធារណៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សកម្មភាពចុះរុះរើនេះកាលពីព្រឹកថ្ងៃទី ១ ខែធ្នូ ឆ្នាំ ២០២៥ នៅចំណុចផ្សារទំនប់ ហៅផ្សារ ងិន អាន ស្ថិតនៅមូលដ្ឋានសង្កាត់ទួលសង្កែទី ១ ខណ្ឌឫស្សីកែវ។

លោក គន់ សោភា ប្រធានការិយាល័យសាធារណៈខណ្ឌឫស្សីកែវ ដែលចូលរួមក្នុងសកម្មភាពខាងលើនេះ បានប្រាប់កម្ពុជាថ្មីថា មុននិងរដ្ឋបាលខណ្ឌឫស្សីកែវចាត់វិធានការក្តៅបែបនេះ អាជ្ញាធរទាំងថ្នាក់សង្កាត់ រហូតដល់ថ្នាក់ខណ្ឌ បានជូនសេចក្ដីជូនដំណឹង និងជម្រាបដោយផ្ទាល់មាត់ជាច្រើនលើកច្រើនសារួចមកហើយ។

លោក គន់ សោភា បានបន្តថា កាលពីថ្ងៃទី ២៩ ខែវិច្ឆិកា ឆ្នាំ ២០២៥ ថ្មីៗ នេះ រដ្ឋបាលសង្កាត់ទួលសង្កែទី ១ ក៏បានចុះសំពះជម្រាបជូនម្តងទៀត ជាលើកចុងក្រោយ មុនអាជ្ញាធរចាត់វិធានការក្តៅនេះផងដែរ។

រដ្ឋបាលខណ្ឌឫស្សីកែវ ជឿជាក់ថា ប្រជាពលរដ្ឋ និងអាជីវករ ក្នុងមូលដ្ឋានខណ្ឌឫស្សីកែវទាំងអស់ នឹងចូលរួមសហការយ៉ាងសកម្ម ដើម្បីរក្សាសណ្ដាប់ធ្នាប់ សោភ័ណភាព និងបរិស្ថានស្អាតល្អ។

គួរជម្រាបផងដែរថា សកម្មភាពខាងលើនេះ កម្លាំងអាជ្ញាធរខណ្ឌ បានចុះរុះរើ កាត់ស្លាកយីហោ កាត់សំយាប ដែលប្រជាពលរដ្ឋ និងអាជីវករ មិនព្រមចូលរួមសហការក្រោយជូនដំណឹងរបស់រដ្ឋបាលខណ្ឌជាច្រើនសា៕

អត្ថបទ ៖ សំណាង