លៀស២០តោនដែលឈ្មួញលួចដឹកទៅវៀតណាមល្មើសនឹងការអនុញ្ញាតត្រឹម៣តោន ត្រូវយោធាបង្ក្រាប

ក្រោយទទួលបានព័ត៌មាន និងសេចក្តីរាយការណ៍ភ្លាម, កម្លាំងយោធាយោធភូមិភាគទី៥ ឈរជើងនៅខេត្តសៀមរាប បានចេញប្រតិបត្តិការដេញឃាត់រថយន្ត១គ្រឿង ដឹកលៀស២០តោន ចេញពីសៀមរាបទៅរាជធានីភ្នំពេញ និងបន្តចេញទៅប្រទេសវៀតណាម។ ការបង្ក្រាបនេះធ្វើឡើងនៅយប់ថ្ងៃទី០៣ ខែធ្នូ ក្រោមបញ្ជាផ្ទាល់របស់ឧត្តមសេនីយ៍ទោសេង ធារិន មេបញ្ជាការរង និងជានាយសេនាធិការយោធភូមិភាគទី៥។  

យោងតាមលិខិតដឹកជញ្ជូនចេញដោយប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប និងលោក ធិននី សុទ្ធី នាយខណ្ឌរដ្ឋបាលជលផលកាលពីថ្ងៃទី២ ខែធ្នូ អនុញ្ញាតឲ្យឈ្មោះ អេង សាយ រស់នៅឃុំកំពង់ឃ្លាំង ស្រុកសូទ្រនិគម ខេត្តសៀមរាប ដឹកជញ្ជូនលៀសទម្ងន់ ៣តោន ក្នុងតម្លៃ ៩០ម៉ឺនរៀល ចេញពីភូមិព្រែកស្រមោច ឃុំកំពង់ឃ្លាំង ស្រុកសូទ្រនិគម ឆ្ពោះទៅរាជធានីភ្នំពេញ ដោយឆ្លងកាត់ខេត្តកំពង់ធំ កំពង់ចាម និងកណ្តាល។

យោងតាមមន្រ្តីយោធាដែលបានចុះបង្ក្រាបរថយន្ត១ គ្រឿងនេះ ឱ្យដឹងថា លិខិតអនុញ្ញាតរបស់ជលផលឱ្យឈ្មួញដឹកលៀសក្នុងទម្ងន់ត្រឹមតែ៣តោនទេ ប៉ុន្តែនៅពេលបង្ក្រាបជាក់ស្ដែងរកឃើញថាឈ្មួញហ៊ានលួចដឹករហូតដល់ទៅ២០តោន។

ក្រោយការឃាត់បានរថយន្តជាមួយលៀសប្រមាណ២០ តោន ក្នុងគ្រាដែលអ្នកបើកបររថយន្ត បានបើកទ្វាររត់គេចខ្លួន កម្លាំងយោធា នឹងបន្តនីតិវិធីប្រគល់ជូនរដ្ឋបាលជលផល ដើម្បីចាត់ការបន្តទៀត។

ឧត្តមសេនីយ៍ទោ សេង ធារិន បានបញ្ជាក់ថា ទោះបីកងទ័ពជាប់ដៃការពារបូរណៈភាពទឹកដី ​ប្រឆាំងការឈ្លាន ពានពីប្រទេសជិតខាងយ៉ាងណាក្តី តែដៃម្ខាងការពារទឹកដី និងដៃម្ខាងបន្តការពារធនធានធម្មជាតិ លើផ្ទៃបឹងទន្លេសាប ដោយបន្តបង្រ្កាបបទលើ្មសផ្សេងៗ ដូចជា ឆក់ក្តៅ ត្រជាក់ ដាក់របាំងស្បៃ លបបណរ៉ាវ ក្នុងតំបន់ព្រៃលិចទឹក និងការនេសាទដោយឧបករណ៍ខុសច្បាប់ជលផលផ្សេងៗទៀតជារៀងរាល់ថ្ងៃ ដោយមិនលើកលែង និងចាត់វិធានការយ៉ាងម៉ឹងម៉ាត់បំផុត ដើម្បីធានាបាននូវការការពារធនធានធម្មជាតិ ជីវចម្រុះ លើផ្ទៃបឹងទន្លេសាប ដែលជាប្រភពធនធានមច្ឆាជាតិ ក្នុងការរួមចំណែកជួយផ្គត់ផ្គង់នូវជីវភាពរស់នៅប្រចាំថ្ងៃរបស់ប្រជាពលរដ្ឋខ្មែរមួយចំណែក និងផលប្រយោជន៍សេដ្ឋកិច្ចជាតិផងដែរ៕