មុខរបរលក់លៀសហាល ដ្បិតហាលក្ដៅបន្តិច តែអាចរកចំណូលបានជិត ១០ ម៉ឺនរៀល

បច្ចុប្បន្នគេសង្កេតឃើញថា មុខរបរលក់លៀសហាល ហាក់កំពុងពេញនិយមខ្លាំង ខណៈដែលនៅតាមបណ្ដាផ្លូវស្ទើរគ្រប់ទិសទីក្នុងភូមិសាស្រ្ដរាជធានីភ្នំពេញ មិនថាទីកន្លែងណាក៏មានអាជីវករជាអ្នកលក់លៀសតាមរទេះរុញ ពិសេសនៅតាមបរិវេណមុខផ្សារជាដើម។

អ្នកស្រី កែវ ស្រីណាង អាយុ៤៥ឆ្នាំ ជាអាជីវករលក់លៀសហាលតាមរទេះ ស្ថិតនៅមុខផ្សារអូរឬស្សី រាជធានីភ្នំពេញ ប្រាប់ កម្ពុជាថ្មី ថា របរលក់លៀសហាលនេះ អ្នកស្រីបានចាប់ផ្ដើមធ្វើវាឡើងមកតាំងពីឆ្នាំ ១៩៩៧មកម្ល៉េះ។

អ្នកស្រីណាង ​បន្តថា មុខរបរលក់លៀសហាលនេះ វាមិនងាយស្រួលនោះទេ ពេលខ្លះត្រូវហាលក្ដៅ និងពេលខ្លះក៏ត្រូវទឹកភ្លៀងរហូតដល់ខាតបង់ក៏មាន។ យ៉ាងណាមិញ អ្នកស្រី ណាង អះអាងថា ក្នុង១ថ្ងៃ​ អ្នកស្រី អាចរកចំណូលបានចន្លោះពី ៦ម៉ឺនរៀល ទៅ ៨ម៉ឺនរៀល និងពេលខ្លះក៏អាចបានដល់ ១០ម៉ឺលរៀល អាស្រ័យទៅលើការលក់ជាក់ស្ដែង។

ចំពោះតម្លៃលៀសហាលវិញ កន្លែងលក់របស់អាជីវករដែលមានស្រុកកំណើតនៅឯខេត្តស្វាយរៀងរូបនេះ គឺមានចាប់ពីតម្លៃ ៥ពាន់រៀល រហូតដល់ ១ម៉ឺនរៀល ក្នុង១កំប៉ុង ពោលគឺអាស្រ័យទៅលើប្រភេទលៀស តូច ឬធំ ផងដែរ។

ក្រៅពីរបរលក់លៀសហាលនេះ អ្នកស្រី កែវ ស្រីណាង ក៏បានបន្ថែមនូវរបរថ្មីមួយទៀត គឺងាវហាលអំបិលម្ទេស ដោយលក់ក្នុងតម្លៃ ១ម៉ឺនរៀល ក្នុង១កំប៉ុង ខណៈងាវស្រស់ទិញពីផ្សារមានតម្លៃ ២ម៉ឺនរៀល ក្នុង១គីឡូក្រាម។

ដ្បិតតែអាចរកប្រាក់ចំណូលបានគួរសម ប៉ុន្តែអ្នកស្រី កែវ ស្រីណាង បានឱ្យដឹងថា អ្នកស្រីក៏នឹងត្រូវចំណាយលើថ្លៃផ្ទះជួល និងការសិក្សារបស់កូនៗ ហេតុនេះទើបអ្នកស្រីបន្តរបរនេះ និងគួបផ្សំជាមួយស្វាមីដែលមានមុខរបរជាអ្នករត់កង់បី ដើម្បីធ្វើយ៉ាងណាអាចផ្គត់ផ្គង់លើការចំណាយក្នុងគ្រួសារទាំងមូលបានរហូតមកដល់សព្វថ្ងៃនេះ៕

អត្ថបទ ៖ សួស សិត

​