សមត្ថកិច្ចជលផលបង្ក្រាបរថយន្តដឹកលៀស៤៥ ការុង​នៅខេត្តកំពង់ឆ្នាំង

សមត្ថកិច្ចខណ្ឌរដ្ឋបាលជលផលខេត្តកំពង់ឆ្នាំងបានចុះបង្ក្រាបការដឹកជញ្ជូនលៀស​តូចៗ​ ចំណីសត្វចំនួន ៤៥ការុង ដែលត្រៀមមឡើងរថយន្ត ទៅលក់នៅប្រទេសវៀតណាម។

ករណីបង្ក្រាបនេះបានធ្វើឡើង​នៅ​មាត់កំពង់ទឹក ក្នុងភូមិសេះស្លាប់ ឃុំឆ្នុកទ្រូ ស្រុកបរិបូណ៌ ខណៈ​ប្រជាពលរដ្ឋសំណូម​ពរឱ្យរដ្ឋាភិបាល​ជួយ​ទប់ស្កាត់បទល្មើសនេះផង។

លោក អ៊ូ សោភ័ណ្ឌ នាយរងខណ្ឌរដ្ឋបាលជលផលកំពង់ឆ្នាំងថ្ងៃអាទិត្យទី ១៤ ខែមករា នេះបាន​ឱ្យដឹងថា ក្រោយពីទទួលបានព័ត៌មានពីប្រជាពលរដ្ឋលោកប្រធានមន្ទីរកសិកម្មខេត្ត និងលោកនាយខណ្ឌ​រដ្ឋបាលជល​ផលកំពង់ឆ្នាំងបានបញ្ជាឲ្យលោកដឹកនាំមន្ត្រីផ្នែករដ្ឋបាលផ្សារឆ្នាំង និងមន្ត្រីសង្កាត់​ជលផល​ស្រុកបរិបូណ៌ ចុះ​ពិនិត្យបទល្មើសនេសាទ​លួច​ដឹកលៀសល្អិតៗចំណីសត្វត្រៀមឡើងរថយន្តទៅលក់​នៅប្រទេសវៀតណាម ដែលកើតមានឡើងនៅមាត់កំពង់ទឹក ក្នុងភូមិសេះស្លាប់ ឃុំឆ្នុកទ្រូ។

ពេលទៅដល់កន្លែងកើតហេតុសមត្ថកិច្ចបានពិនិត្យឃើញលៀសល្អិតៗសម្រាប់កិនធ្វើជាចំណីសត្វច្រកការុងចំនួន​៤៥​ការុងពណ៌ស រកម្ចាស់មិនឃើញសមត្ថកិច្ចក៏បានធ្វើការវះការុងលែង​លៀស​ទាំង​អស់នោះ​ចោលក្នុង​ទឹក​ទន្លេវិញ។

ជាមួយគ្នានេះដែរនៅចំណុចជិតគ្នានេះសមត្ថកិច្ចក៏បានរកឃើញលៀលធំៗដែលគេសម្រាប់ហាលលក់​ទីផ្សារ​ក្នុងស្រុកចំនួន៥០ការុងផងដែរ ដែលច្បាប់បានអនុញ្ញាតឱ្យធ្វើការនេសាទ និងលក់ដូរក្នុងស្រុក។

​ដោយឡែកមុនសមត្ថកិច្ចមកដល់នៅចំណុចមាត់កំពង់ទឹកភូមិសេះស្លាប់នេះ មានលៀសល្អិតៗប្រភេទលៀសចំណីសត្វមានចំនួន ១០០ ការុងដែលគេច្រកទុកនៅមាត់​កំពង់ទឹកត្រៀម​ឡើងរថយន្តដឹកទៅលក់នៅប្រទេសវៀតណាម។ ប៉ុន្តែមុនពេលសមត្ថកិច្ចមកដល់មានរថយន្តបែនដឹកដីពណ៌​សមួយបាន​លួចដឹកយកលៀសនេះចេញអស់៥៥ការុង ចេញទៅបាត់ហើយទើបសមត្ថកិច្ចមកដល់។

ប្រជាពលរដ្ឋនៅក្នុងភូមិសេះស្លាប់បានឱ្យដឹងថា មួយរយៈកន្លងមកនេះមានរថយន្តធុនធំ ៣គ្រឿង បានចូលមក​ដឹក​លៀស​ប្រភេទលៀសចំណីសត្វនេះ ស្ទើរតែរៀង រាល់ថ្ងៃក្នុងមួយជើងៗរាប់រយតោន យកទៅលក់នៅប្រទេសវៀតណាម ដោយគ្មានការបង្ក្រាបពីសមត្ថកិច្ចនោះឡើយ។

ប្រជាពលរដ្ឋបានរិះគន់ថា សមត្ថកិច្ចជលផលនៅក្នុងខេត្តពោធិ៍សាត់ និងខេត្តកំពង់ធំ គេមិនបង្ក្រាប​ការនេសាទ​លៀស​ចំណីសត្វនេះទេ។ ហើយអ្នកនេសាទលៀសចំណីសត្វដែលច្បាប់ហាមឃាត់នេះ តែងលួចនេសាទនិងដឹកជញ្ជូនលៀ សមកលក់ឡើងរថយន្តនៅក្នុងភូមិសាស្ត្រឃុំឆ្នុកខេត្តកំពង់ឆ្នាំងយកទៅលក់នៅប្រទេសវៀតណាម។

ប៉ុន្តែនៅតាមផ្លូវជាតិរហូតដល់ប្រទេសវៀតណាមគេមិនដែលឃើញសមត្ថកិច្ចចាប់ឃាត់រថយន្តដឹកលៀសចំណីសត្វនេះឡើយ។ ករណីនេះប្រសិនបើសមត្ថកិច្ចច្រកទ្វារព្រំដែនមិនឲ្យលៀសចំណីសត្វនេះ​ចេញទៅក្រៅបាននោះ ក៏គ្មានការនេសាទលៀសចំណីសត្វនេះនៅក្នុងបឹងទន្លេសាបយើងដែរ។

ករណីនេះប្រជាពលរដ្ឋសំណូមពរឱ្យរដ្ឋាភិបាល និងសមត្ថកិច្ចពាក់ព័ន្ធ មេត្តាជួយទប់ស្កាត់ ​និងបង្ក្រាបករណីនេះឱ្យមានប្រសិទ្ធភាពផងចុះ ទើបយើងអាចរក្សាពូជពង្សលៀសចំណីសត្វនេះ​បានគង់វង្សនៅក្នុងបឹងទន្លេសាប ព្រោះ​លៀស​ចំណីសត្វនេះមានសារៈប្រយោជន៍សំខាន់ណាស់សម្រាប់ប្រព័ន្ធអេកូឡូស៊ីនៅក្នុង​បាត​ទន្លេនៃបឹងទន្លេសាប៕

អត្ថបទ៖ ឈៀងថារិទ្ធ