ផ្លូវក្នុងក្រុងក្រចេះ​​ជាច្រើនខ្សែ ចាប់ផ្ដើមដំណើរការចាក់ក្រាលកៅស៊ូ AC

ផ្លូវតភ្ជាប់ក្នុងក្រុងក្រចេះ ស្ថិតក្នុងសង្កាត់ចំនួន ២ គឺសង្កាត់រកាកណ្ដាល និងសង្កាត់ក្រចេះ បាននឹងកំពុងដំណើរការចាក់ក្រាលថ្មម៉ិច និងចាក់ក្រាលកៅស៊ូប្រភេទ AC ដើម្បីលើកកម្ពស់កម្រិត​គុណភាពផ្លូវ។

ផ្លូវនៅក្នុងសង្កាត់រកាកណ្ដាលចាប់ពីគល់ស្ពានព្រែកតេ រហូតដល់វិមានឯករាជ្រ ក្នុងសង្កាត់ក្រចេះ ពលរដ្ឋបានលើកឡើងថា មានការចាក់ក្រាលថ្មម៉ិចកម្រាស់​ប្រហែលជា ២០ សង់ទីម៉ែត្រ ក្រាស់ជាងពេល​ធ្វើសព្វដង ខណៈ​កំពុងដំណើរការចាក់ក្រាលម៉ិចបានម្ខាង។

លោក ឈិន លាងយី ចៅសង្កាត់ក្រចេះបានឱ្យដឹងថា នៅក្នុងសង្កាត់ក្រចេះគឺមានកំណាត់ផ្លូវជាច្រើនខ្សែ ដែលស្ថិតក្នុងគម្រោងចាក់កៅស៊ូ។ ទី១ គឺកំណាត់ផ្លូវចាប់ពីវិមានឯករាជ្យមុខសាលាសង្កាត់ រហូតដល់ផ្លូវបំបែកកែងវត្តប៉ាឆា-តារាងបាល់ទាត់ខេត្ត។ ទី២ គឺកំណាត់ផ្លូវចាប់ពីរង្វង់មូលព្រាបសមកដល់ធនាគារអេស៊ីលីដា ដោយតភ្ជាប់នឹងផ្លូវកែងវត្តប៉ាឆា។ ទី៣ គឺផ្លូវចាប់ពីរង្វង់មូលព្រាបសមុខសាលាខេត្ត តភ្ជាប់ផ្លូវក្នុងសង្កាត់រកាកណ្ដាល ត្រង់ចំំណុច​ដាយមិនស៊ីធី គឺអត់ចាក់ក្រាលថ្មម៉ិចទេ ដោយអ៊ុតកៅស៊ូដំណាក់កាលចុងក្រោយ។

ក្រៅពីកំណាត់ផ្លូវដែល​លើកឡើងខាងលើនេះ ក៏មានកំណាត់ផ្លូវពីរខ្សែទៀតដែលត្រូវសាងសង់ជាផ្លូវបេតុងស្ថិតក្នុងភូមិដូនជ្រាំ សង្កាត់ក្រចេះ ដែលជាជំនួយពី ADB និងគម្រោងអភិវឌ្ឍន៍មូលនិធិឃុំ/សង្កាត់៕

អត្ថបទ៖ ប្រុញ វិធិន