ព័ត៌មានជាតិ

ស្វែងយល់ភូមិសាស្ត្រក្រុងក្រចេះជាប់ដងទន្លេមេគង្គ គោលដៅអភិវឌ្ឍតំបន់ភាគឦសាន

បានផុស

៧ ខែ មុន

នៅ

ថ្ងៃពុធ ១០ ធ្នូ ២០២៥

ដោយ

ភូមិសាស្រ្ត

ក្រុងក្រចេះ ជាក្រុងមួយក្នុងចំណោមស្រុក/ក្រុងទាំង ៧ នៃខេត្តក្រចេះ ដែលជាបណ្ដុំនៃសង្គមកិច្ច សេដ្ឋកិច្ច ទេសចរណ៍ វប្បធម៌ និងការអភិវឌ្ឍន៍។ ក្រុងក្រចេះបែងចែកជា ៥ សង្កាត់ និងភូមិចំនួន ១៩ ភូមិ។ សង្កាត់ទាំង ៥ នៃក្រុងក្រចេះរួមមាន៖ សង្កាត់ក្រចេះ សង្កាត់អូរឫស្សី សង្កាត់ក្រគរ សង្កាត់រកាកណ្ដាល និងសង្កាត់កោះទ្រង់។

ក្រុងក្រចេះ មានទំហំផ្ទៃដីសរុប ៨៩,៨៨ គីឡូម៉ែត្រការ៉េ មានព្រំប្រទល់ខាងជើង ខាងកើត និងខាងត្បូង ជាប់ជាមួយស្រុកចិត្របុរី និងខាងលិចជាប់នឹងទន្លេមេគង្គនឹងស្រុកព្រែកប្រសព្វ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាសាស្រ្ត

គិតត្រឹមថ្ងៃទី២០ ខែវិច្ឆិកា ឆ្នាំ២០២៥ ប្រជាពលរដ្ឋរស់នៅក្នុងក្រុងសរុបមានចំនួន ៣៤,២៨៤នាក់ ក្នុងនោះស្រី ១៧,៤៦៤នាក់ ស្មើនឹង ៨,៣៥៧គ្រួសារ។ គ្រួសាររស់នៅអចិន្ត្រៃយ៍មានចំនួន ៨,១១៨ គ្រួសារ គ្រួសាររស់នៅបណ្ដោះអាសន្នមានចំនួន ២៣៩ គ្រួសារ និងស្ដ្រីជាមេគ្រួសារមានចំនួន ៩៥០ គ្រួសារ កុមារអាយុក្រោម ៦ឆ្នាំ មានចំនួន ២,៦៣៤នាក់ ក្នុងនោះស្រី ១,០៧៧ នាក់ អាយុចាប់ពី ៦ឆ្នាំ ដល់ ១៨ឆ្នាំ ចំនួន ៨,៨៤៥នាក់ ក្នុងនោះស្រី ៤,៧៨៥ នាក់ និងអាយុ ១៨ ឆ្នាំឡើងទៅចំនួន ២២,៨០៥នាក់ ក្នុងនោះស្រី ១១,៦០៤នាក់ និងធ្វើចំណាកស្រុកក្នុងប្រទេស ៧១៧នាក់ និងស្រី ៣១៥នាក់ និងធ្វើចំណាកក្រៅប្រទេស ៣៣៥នាក់ ក្នុងនោះស្រី ២០៥នាក់។

ប្រជាពលរដ្ឋក្នុងក្រុងប្រមាណ ៦០,៧% ជាសេវាករ, ៣៧,៥% កសិករ និង ១,៨% ប្រកបមុខរបរសិប្បកម្ម។

ទំហំសេដ្ឋកិច្ចក្នុងខេត្ត

នៅក្នុងឆ្នាំ២០២៤ ខេត្តក្រចេះមានទំហំសេដ្ឋកិច្ច (GDP) សរុបមានចំនួន ៨៨៧ លានដុល្លាសហរដ្ឋអាមេរិក និងចំណូលសម្រាប់មនុស្សម្នាក់ (Per capita) មានចំនួន ១,៩៩៩ ដុល្លារ។ ប្រជាពលរដ្ឋភាគច្រើនមានជីវភាពបង្គួរ និងមធ្យម។

ហេដ្ឋារចនាសម្ព័ន្ធផ្លូវថ្នល់

បើតាមរបាយការណ៍ពីមន្ទីរសាធារណការ បណ្តាញផ្លូវគមនាគមន៍ក្នុងក្រុងក្រចេះមានប្រវែង ៨,៥២៣ ម៉ែត្រ ក្នុងនោះ ផ្លូវក្រាលកៅស៊ូ AC មានប្រវែង ៣,៧០៦ ម៉ែត្រ ផ្លូវក្រាល Concrete មានប្រវែង ៣,៤៧៧ ម៉ែត្រ និងផ្លូវក្រាលកៅស៊ូ DBST ប្រវែង ១,៣៤០ ម៉ែត្រ។ ស្ពានបេតុងមានចំនួន ៣ កន្លែង រួមមាន៖ ស្ពានសរ ស្ពានអណ្តែងដូន និងស្ពានក្រគរ។

ផ្សារ

ផ្សាររដ្ឋធំៗក្នុងខេត្តមានចំនួន ២ កន្លែង គឺផ្សារសាមគ្គីក្រុងក្រចេះ និងផ្សារអូរឫស្សី។

វត្តអារាម

វត្តអារាមក្នុងក្រុងមានចំនួន ១២ វត្ត ក្នុងនោះវត្តដែលមានកេរ្តិ៍ឈ្មោះល្បីដូចជា៖ វត្តក្រគរ, វត្តហុងឡាំ, វត្តអូរឫស្សី និងវត្តរកាកណ្ដាល។

សាលារៀន

ក្រុងក្រចេះ មានអនុវិទ្យាល័យសរុបចំនួន ៧ កន្លែង វិទ្យាល័យ ៣ កន្លែង និងសាកលវិទ្យល័យមួយកន្លែង។ ក្នុងនោះរួមមាន៖ អនុវិទ្យាល័យកោះទ្រង់, អនុវិទ្យាល័យនិងវិទ្យាល័យសម្តេចតេជោ ហ៊ុន សែន ក្រុងក្រចេះ, អនុវិទ្យាល័យនិងវិទ្យាល័យព្រះមហាក្សត្រីយានី កុសុមៈ, អនុវិទ្យាល័យនិងវិទ្យាល័យ ខូវ ប៊ុនស៊ុន, អនុវិទ្យាល័យ កាប៉ូ, អនុវិទ្យាល័យរកាកណ្ដាល, អនុវិទ្យាល័យក្រគរ និងសាកលវិទ្យាល័យក្រចេះ។

សេវាស្នាក់នៅ

ក្រុងក្រចេះមានសណ្ឋាគារ ១២ កន្លែង រួមមាន៖ លីជឺ, ហ៊រ ប៊ុន្នី, មេគង្គដូលហ្វីន, ឧត្តមសម្បត្តិ៍, ឡាក់ឡាយវើ, ឆ្នេរ, មហាឧត្តម, រីវើល៍ដូហ្វី, មុំប្រជាប្រិយ, ផ្សោត, សន្តិភាព និងសណ្ឋាគារជ័យសម្បត្តិ៍។ ផ្ទះសំណាក់ ១៩ កន្លែង ភោជនីយដ្ឋាន និងអាហារដ្ឋានសរុប ៤៤ កន្លែង ខារ៉ាអូខេ ៦ កន្លែង និងម៉ាស្សា ១០ កន្លែង។