ពលរដ្ឋខ្មែរនៅប្រទេសកូរ៉េខាងត្បូង ជួបជុំសម្តែង​មតិ និងថ្កោលទោសយោធាថៃដែលឈ្លានពានជាថ្មីមកលើដែនអធិបតេយ្យភាពកម្ពុជា

ប្រជាពលរដ្ឋខ្មែររស់នៅតំបន់ហ្វាសង់ នៃប្រទេសកូរ៉េខាងត្បូង បានរៀបចំការជួបជុំសម្តែងមតិ និងថ្កោលទោសយ៉ាងដាច់អហង្ការចំពោះទង្វើដ៏ឃោរឃៅ និងអមនុស្សធម៌របស់យោធាថៃ ដែលបានធ្វើការឈ្លានពានជាថ្មី មកលើដែនអធិបតេយ្យភាពរបស់កម្ពុជា។

ការជួបជុំសម្ដែងមតិ និងថ្កោលទោសនេះ គឺបន្ទាប់ពីយោធាថៃ បានធ្វើការឈ្លានពានសារជាថ្មី មកលើដែនអធិបតេយ្យរបស់កម្ពុជា ចាប់ពីរសៀលថ្ងៃទី៧ ខែធ្នូ ឆ្នាំ២០២៥មក ដោយបានប្រើប្រាស់អាវុធធុនតូច និងធុនធំ ដោយកំរោល និងមិនរើសគោលដៅយ៉ាងសាហាវព្រៃផ្សៃ ដែលបានធ្វើឱ្យប្រជាជនស៊ីវិលកម្ពុជាមួយចំនួនបានស្លាប់ និងរងរបួស ផ្ទះសម្បែងជាច្រើនខ្នងត្រូវបានបំផ្លាញ សិស្សសាលា ក្មេងចាស់ ប្រុសស្រី ត្រូវបង្ខំចិត្តភៀសខ្លួនរកទីកន្លែងសុវត្ថិភាពបណ្តោះអាសន្នភ្លាមៗ។

ពិធីជួបជុំសម្ដែងមតិនេះ បានធ្វើឡើងចាប់ពី៩ ដល់ថ្ងៃទី១០ ខែធ្នូ ឆ្នាំ២០២៥នេះ ដោយមានគោលបំណងចម្បង គឺថ្កោលទោសយ៉ាងធ្ងន់ធ្ងរចំពោះទង្វើឈ្លានពានពីសំណាក់កងកម្លាំងថៃ មកលើដែនអធិបតេយ្យភាព និងពលរដ្ឋជាជនស៊ីវិលកម្ពុជា ព្រមទាំងអំពាវនាវដល់សហគមន៍អន្តរជាតិ ថ្កោលទោស និងដាក់កំហិតលើប្រទេសថៃ ឱ្យគោរពបូរណភាពទឹកដីរបស់កម្ពុជា ស្របតាមច្បាប់អន្តរជាតិ ក៏ដូចជាងាកមកគោរពសេចក្តីថ្លែងការណ៍រួម ស្តីពី កិច្ចព្រមព្រៀងសន្តិភាពរវាងកម្ពុជា និងថៃ ដែលមានសហរដ្ឋអាម៉េរិក និងម៉ាឡេស៊ីជាសាក្សី។

នៅក្នុងពិធីជួបជុំនេះ អ្នកចូលរួមទាំងអស់បានស្រែកពាក្យស្លោក និងកាន់បដាដែលបង្ហាញពីការគាំទ្រពេញទំហឹងចំពោះចំណាត់ការរបស់រាជរដ្ឋាភិបាលកម្ពុជា ក្នុងការការពារទឹកដីដូនតា និងអាយុជីវិតពលរដ្ឋស្លូតត្រង់។

ការជួបជុំនៅតំបន់ហ្វាសង់នេះ គឺជាការបង្ហាញនូវស្មារតីស្នេហាជាតិ និងការរួបរួមរបស់ជនរួមជាតិខ្មែរនៅឯក្រៅប្រទេស ជាពិសេសនៅប្រទេសកូរ៉េខាងត្បូង ក្នុងការការពារផលប្រយោជន៍ជាតិ និងការទាមទារឱ្យមានយុត្តិធម៌ ចំពោះអំពើឈ្លានពានដែលបានកើតឡើងម្តងហើយម្តងទៀត ពីសំណាក់យោធាថៃ៕