ព័ត៌មានជាតិ

ថៃបង្កទង្វើអាក្រក់ សួរអ្នកដំណើរអឺរ៉ុបរាប់ម៉ោង ពេលធ្វើដំណើរឆ្លងកាត់ព្រលានថៃចូលប្រទេសកម្ពុជា

បានផុស

៧ ខែ មុន

នៅ

ថ្ងៃព្រហស្បតិ៍ ១៨ ធ្នូ ២០២៥

ដោយ

ស្ថានឯកអគ្គរាជទូតកម្ពុជាប្រចាំប្រទេសបារាំងបង្ហាញពីទង្វើអាក្រក់របស់ប្រទេសថៃ ដែលបង្កបញ្ហាធ្ងន់ធ្ងរចំពោះអ្នកដំណើរមកពីអឺរ៉ុប ដែលធ្វើដំណើរឆ្លងកាត់ព្រលានយន្តហោះថៃចូលមកប្រទេសកម្ពុជា។

ស្ថានឯកអគ្គរាជទូតកម្ពុជា ប្រចាំប្រទេសបារាំងបានផ្តល់ព័ត៌មានថា អ្នកដំណើរមកពីអឺរ៉ុបមួយចំនួនដែលបានធ្វើដំណើរទៅប្រទេសកម្ពុជាបានជួបប្រទះបញ្ហាធ្ងន់ធ្ងរ ពេលឆ្លងកាត់ (transit) នៅអាកាសយានដ្ឋានទីក្រុងបាងកក ប្រទេសថៃមានដូចជា៖

-ការសួរសំណួររាប់ម៉ោង
-ការទាមទារហួសហេតុឱ្យបង្ហាញឯកសារបញ្ជាក់ធនធានហិរញ្ញវត្ថុ
-ការត្រួតពិនិត្យឯកសារកក់សណ្ឋាគារនៅកម្ពុជា
-បរិយាកាសថប់បារម្ភ និងរងការសង្ស័យដោយមិនសមហេតុផល
-នៅក្នុងករណីខ្លះ អ្នកដំណើរបានបាត់វ៉ាលីថែមទៀត ពេលទៅដល់ទីក្រុងភ្នំពេញ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមឯកអគ្គរាជទូតកម្ពុជា បញ្ហាទាំងនេះកើតឡើងនៅក្រៅទឹកដីរបស់កម្ពុជាក៏ពិតមែន ប៉ុន្តែអាចប៉ះពាល់ដល់បទពិសោធន៍នៃការធ្វើដំណើរ។

ដើម្បីជាការប្រុងប្រយ័ត្ន ស្ថានឯកអគ្គរាជទូតកម្ពុជាប្រចាំប្រទេសបារាំងបានស្នើឲ្យអ្នកដំណើរជៀសវាងការធ្វើដំណើរឆ្លងកាត់ប្រទេសថៃ និងការប្រើប្រាស់ក្រុមហ៊ុនអាកាសចរណ៍ថៃនៅពេលធ្វើដំណើរទៅកម្ពុជា។

ស្ថានឯកអគ្គរាជទូតកម្ពុជាណែនាំដល់អ្នកដំណើរអាចជ្រើសរើសក្រុមហ៊ុនអាកាសចរណ៍ និងផ្លូវហោះហើរអន្តរជាតិផ្សេងទៀត ដែលផ្តល់សេវាកម្មល្អប្រសើរនិងការឆ្លងកាត់ (transit) ដោយពុំមានការរើសអើងនិងគោរពដល់អ្នកដំណើរ។

ពាក់ព័ន្ធបញ្ហានេះដែរ លោក ស៊ីន ចាន់សិរីវុត្ថា មន្រ្តីអ្នកនាំពាក្យឲ្យអាកាសចរណ៍ស៊ីវិលបានប្រាប់កម្ពុជាថ្មីនៅព្រឹកនេះ ទាក់ទងនឹងព័ត៌មានមានការរិតបន្តឹងអ្នកដំណើរនៅព្រលានយន្តហោះប្រទេសថៃចូលប្រទេសកម្ពុជា លោកមិនទាន់ច្បាស់ពីគោលដៅកើតឡើងចំពោះអ្នកដំណើរទូទៅ ឬកើតឡើងទៅលើអ្នកធ្វើដំណើរមួយចំនួនតូចនោះទេ។

ទោះជាយ៉ាងណាក៏ដោយ លោកថា ជើងហោះហើររវាងប្រទេសថៃ និងកម្ពុជា តាមរយៈច្រកអាកាសយានដ្ឋានអន្តរជាតិតេជោភ្នំពេញ គឺរក្សានៅបានភាពធម្មតានិងស្ថិរភាព គឺអត់មានអ្វីប្រែប្រួលឬផ្លាស់ប្តូរទេ។

ខណៈដែលស្ថានភាពជម្លោះតាមព្រំដែនបង្កឡើងដោយការឈ្លានពានពីប្រទេសថៃមិនទាន់ស្ងប់ស្ងាត់ មន្រ្តីអាកាសចរណ៍ស៊ីវិលណែនាំឲ្យអ្នកធ្វើដំណើរត្រូវតែតាមដានឲ្យបានជាប់លាប់នូវព័ត៌មានបច្ចុប្បន្នចុងក្រោយ ហើយរាល់ការធ្វើដំណើរ ត្រូវធានាឯកសារទាំងលិខិតឆ្លងដែន សំបុត្រយន្តហោះ ឈ្មោះ និងអ្វីៗផ្សេងទៀតគឺអត់មានបញ្ហាខុសឆ្គង។

បន្ថែមពីនេះ ក្នុងស្ថានភាពដ៏លំបាកនេះ លោកក្រើនរំលឹកអ្នកដែលចង់ធ្វើដំណើរទៅប្រទេសថៃបើមិនចាំបាច់កុំទៅ ហើយបើចាំបាច់ខានមិនបានចាំទៅ៕