ព័ត៌មានជាតិ

កាកបាទក្រហមបញ្ចេញអង្ករ១០០តោននិងភេសជ្ជៈ២ពាន់កេសដើម្បីចែកដល់ជនភៀសសឹកទាំង៥ខេត្ត

បានផុស

៧ ខែ មុន

នៅ

ថ្ងៃអង្គារ ២៣ ធ្នូ ២០២៥

ដោយ

កាកបាទក្រហមកម្ពុជាបានបញ្ចេញអង្ករ១០០តោន ទឹកបរិសុទ្ធ ១០០០កេស និងភេសជ្ជៈផ្អែម ១០០០កេស ដើម្បីយកទៅចែកជូនប្រជាជនភៀសសឹកនៅតាមជំរំសុវត្ថិភាពនៅតាមខេត្តឧត្តរមានជ័យ ព្រះវិហារ សៀមរាប ពោធិ៍សាត់ និងបន្ទាយមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួយនេះត្រូវបែងចែកទៅតាមសាខាកាកបាទក្រហមប្រចាំខេត្តទាំង៥ ដោយ១ខេត្តទទួលបានអង្ករ ១០០តោន ទឹកសុទ្ធ ២០០កេស និងភេសជ្ជៈផ្អែម២០០កេស។

នេះជាការអន្តរាគមន៍លើកទី២ហើយរបស់កាកបាទក្រហមបន្ទាប់ពីមានការឈ្លានពានពីថៃដោយនៅថ្ងៃទី១៥ ខែធ្នូ កាកបាទក្រហមបានផ្ដល់ថវិកា ២១ម៉ឺនដុល្លារដល់គណៈកម្មាធិការគ្រប់គ្រងគ្រោះមហន្តរាយដើម្បីយកទៅរៀបចំទីជម្រកនៅមណ្ឌលសុវត្ថិភាពនានាដែលមានខ្វះខាត ហើយនៅថ្ងៃទី១៧ ខែធ្នូ កាកបាទក្រហមបានសម្រេចផ្ដល់តង់ចំនួន៧ពាន់នៅតាមមណ្ឌលសុវត្ថិភាពខេត្តបាត់ដំបង បន្ទាយមានជ័យ និងឧត្តរមានជ័យ។

ចាប់តាំងពីមានការឈ្លានពានពីប្រទេសថៃតាំងពីថ្ងៃទី៧ ខែធ្នូមកបានធ្វើឱ្យពលរដ្ឋខ្មែរ២១នាក់បានស្លាប់ និងរបួស៨៣នាក់ និងជនភៀសសឹកជាង៥៤ម៉ឺននាក់ ស្ត្រីជិត៣០ម៉ឺននាក់ និងកុមារជាង១៧ម៉ឺននាក់។ កាកបាទក្រហមកម្ពុជាក្រៅពីបានបញ្ជូនក្រុមប្រតិបត្តិ អ្នកស្ម័គ្រចិត្តទៅជួយនៅតាមមណ្ឌលភៀសសឹក និងអប់រំនៅតាមមណ្ឌលភៀសសឹក ព្រមទាំងផ្ដល់នូវគ្រឿងឧបភោគបរិភោគតាមរយៈសាខាកាកបាទក្រហមជាបន្តបន្ទាប់ផងដែរ៕