រដ្ឋមន្ត្រីក្រសួងអប់រំ អំពាវនាវដល់គ្រឹះស្ថានឧត្តមសិក្សា បន្តពង្រឹងអភិបាលកិច្ចឱ្យមានភាពរឹងមាំ

លោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអំពាវនាវដល់គ្រឹះស្ថានឧត្តមសិក្សាបន្តធ្វើកំណែទម្រង់ឧត្តមសិក្សា ដោយត្រូវបន្តពង្រឹងអភិបាលកិច្ចនៅតាមគ្រឹះស្ថានឧត្តមសិក្សាឱ្យមានភាពរឹងមាំ។ ការអំពាវនាវនេះធ្វើឡើង ក្នុងឱកាសលោកអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការអគារសិក្សាថ្មី និងពិធីប្រគល់សញ្ញាបត្រជូនដល់និស្សិតជ័យលាភីនៃសាកលវិទ្យាល័យស្វាយរៀង នាព្រឹកថ្ងៃទី៥ ខែមករា ឆ្នាំ២០២៦។

បន្ថែមពីនេះ លោកឧបនាយករដ្ឋមន្ត្រី ហង់ជួន ណារ៉ុន​ បានណែនាំដល់គ្រឹះស្ថាននីមួយៗត្រូវមានក្រុមប្រឹក្សាភិបាលដែលមានសមត្ថភាពដឹកនាំច្បាស់លាស់ ឬការប្រែក្លាយជា គ្រឹះស្ថានសាធារណៈរដ្ឋបាល។ លោកថា ការរៀបចំនេះ ត្រូវភ្ជាប់មកជាមួយនូវចក្ខុវិស័យ និងបេសកកម្មច្បាស់លាស់។ សាកលវិទ្យាល័យត្រូវរៀបចំកម្មវិធីសិក្សា និងឯកសារបង្រៀនឡើងវិញឱ្យមានលក្ខណៈទំនើប ដោយផ្លាស់ប្តូរពីការបង្រៀនតាមបែបទ្រឹស្តីសុទ្ធសាធ មកជាការអប់រំផ្ដោតលើលទ្ធផល (Outcome Based Education) ដើម្បីធានាថា និស្សិតទទួលបាននូវសមត្ថភាពពិតប្រាកដ អាចយកទៅអនុវត្តបានក្នុងទីផ្សារការងារ។ ទន្ទឹមនឹងនេះ ត្រូវលើកកម្ពស់ការរៀនភាសាបរទេស និងជំនាញវិទ្យាសាស្ត្រ បច្ចេកវិទ្យា (STEM) ដើម្បីឱ្យនិស្សិតអាចសិក្សាស្រាវជ្រាវក្នុងកម្រិតសកលបាន។

លោកឧបនាយករដ្ឋមន្ត្រី ថា «គុណភាពអប់រំ ចាប់ផ្តើមពីគុណភាពសាស្ត្រាចារ្យ»។ ដូច្នេះ ត្រូវបន្តពង្រឹង លើកទឹកចិត្ត និងផ្ដល់ឱកាសដល់សាស្ត្រាចារ្យឱ្យបន្តការសិក្សាថ្នាក់បណ្ឌិតឱ្យបានកាន់តែច្រើន និងជំរុញឱ្យមានការសិក្សាស្រាវជ្រាវបែបវិទ្យាសាស្ត្រ។ លោកថា ក្នុងយុគសម័យឌីជីថល ការប្រើប្រាស់ បញ្ញាសិប្បនិម្មិត (AI) គឺជាឧបករណ៍ដ៏មានសក្ដានុពល ដែលនឹងជួយដល់អ្នកប្រើប្រាស់ ជាពិសេសសាស្រ្តាចារ្យ និងនិស្សិត ឱ្យទទួលបាននូវចំណេះដឹងទូលំទូលាយ និងបង្កើនប្រសិទ្ធភាពនៃការសិក្សា។ ហេតុនេះ គ្រឹះស្ថានសិក្សាត្រូវតែរៀបចំឱ្យមាន បន្ទប់ឌីជីថលដើម្បីផ្ដល់ឱកាសឱ្យនិស្សិតបានអនុវត្តជាក់ស្តែង ឆ្លើយតបទៅនឹងនិន្នាការការងារថ្មីៗ។

លើសពីនេះ លោកក៏បានណែនាំឱ្យសាកលវិទ្យាល័យស្វាយរៀង ក៏ដូចជាគ្រឹះស្ថានឧត្តមសិក្សាផ្សេងទៀត រៀបចំជាអង្គសិក្ខាសាលារួមគ្នា ដើម្បីផ្លាស់ប្តូរបទពិសោធ និងមតិយោបល់លើសមិទ្ធផលនៃកំណែទម្រង់ដែលបានអនុវត្តកន្លងមក។ បន្ថែមលើកិច្ចសហការក្នុងស្រុក គ្រឹះស្ថានសិក្សាត្រូវពង្រីកវិសាលភាពទៅកាន់កម្រិតតំបន់ និងសកលលោក តាមរយៈការចងសម្ព័ន្ធភាពជាមួយសាកលវិទ្យាល័យអន្តរជាតិ ដើម្បីបង្កើតកម្មវិធីផ្លាស់ប្ដូរនិស្សិត ការធ្វើស្រាវជ្រាវរួមគ្នា និងការតម្រឹមកម្មវិធីសិក្សាឱ្យស្របតាមស្តង់ដាអន្តរជាតិ។

ជាមួយគ្នានេះ លោកឧបនាយករដ្ឋមន្ត្រី បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ សាស្ត្រាចារ្យ មន្ត្រីរាជការ និងបុគ្គលិកអប់រំនៃសាកលវិទ្យាល័យស្វាយរៀងដែលបានយកអស់ពេលវេលា កម្លាំងកាយចិត្ត និងប្រាជ្ញាស្មារតីចូលរួមចំណែកក្នុងការអនុវត្តកំណែទម្រង់វិស័យឧត្តមសិក្សា ជាពិសេសការអនុវត្តកំណែទម្រង់ក្នុងសាកលវិទ្យាល័យស្វាយរៀង បានចូលរួមចំណែកក្នុងការកែលម្អកម្មវិធីសិក្សា លើកកម្ពស់គុណភាពអប់រំនៅសាកលវិទ្យាល័យ ឆ្លើយតបនឹងចក្ខុវិស័យរបស់រាជរដ្ឋាភិបាល ក្នុងការអភិវឌ្ឍមូលធនមនុស្ស និងការលើកកម្ពស់ផ្នែកវិទ្យាសាស្ត្រ និងបច្ចេកវិទ្យា៕