កសិករ​​តាមព្រំដែន​អះអាង​ថា ដំឡូងស្រស់និងដំឡូងស្ងួត មានតម្លៃខ្ពស់ជាងឆ្នាំមុន ទោះបី​ថៃ​បិទ​ព្រំដែន

ពលរដ្ឋនៅតាមបណ្ដាស្រុកជាប់ព្រំដែនថៃបានអះអាងថា ឆ្នាំនេះទាំងដំឡូងស្ងួត និងដំឡូងស្រស់ មានហាងឆេងខ្ពស់ជាងឆ្នាំមុន បើទោះបីជាសភាពការណ៍ព្រំដែនមិនអាចនាំដំឡូងចូលទៅប្រទេសថៃបានក៏ដោយ។

លោក សោ សមាគម ជាប្រជាកសិករ ព្រោះនៅភូមិលំផាត់ ឃុំអូដា ស្រុកកំរៀង ខេត្តបាត់ដំបង បានបញ្ជាក់យ៉ាងច្បាស់ថា ថ្វីត្បិតតែឆ្នាំនេះកើតសង្គ្រាមនៅតាមបន្ទាត់ព្រំដែនថៃក៏ដោយ ក៏ទីផ្សាររបស់ដំឡូងមីនៅតែឈរខ្ពស់លើទីផ្សារដដែល ហើយឆ្នាំនេះគឺអាចមានតម្លៃខ្ពស់ជាងឆ្នាំមុនបន្តិចទាំងដំឡូងស្រស់និងដំឡូងស្ងួត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងបែបនេះគឺដោយសារតែបច្ចុប្បន្នបណ្ដាសាយឡូជាច្រើន ដែលស្ថិតនៅតាមបណ្ដោយព្រំដែនកម្ពុជាថៃ បានចុះទិញទាំងដំឡូងស្រស់និងដំឡូងស្ងួត តែគេអាចសន្និដ្ឋានថា ដំឡូងទាំងនេះគេអាចនាំចេញទៅប្រទេសផ្សេងឬក៏យកទៅផលិតជាចំណីសត្វ ដល់ឆ្នាំនេះដំឡូងសើម គឺថ្លឹងនៅពេលដែលប្រជាកសិករដកភ្លាមៗដោយក្នុងមួយគីឡូក្រាមបានតម្លៃចាប់ពី ១៩០ ដល់ ២១០ រៀល។ ដោយឡែកសម្រាប់ដំឡូងស្ងួតដែលប្រជាកសិករកាប់ហាលគឺបានតម្លៃចាប់ពី ៤៩០ ដល់ ៥០០ រៀលក្នុងមួយគីឡូក្រាម ហើយសម្រាប់ដំឡូងស្ងួតនេះបើសៃឡូនៅខាងខេត្តប៉ៃលិន អាចចេញពីប្រជាកសិកររហូតដល់ ៦១០ រៀលក្នុងមួយគីឡូក្រាម។

លោក សោ សមាគម ក៏បានសង្កត់ធ្ងន់ថា បើទោះបីជាទីផ្សារថៃត្រូវបានបិទទាំងស្រុងក៏ដោយ ក៏កម្ពុជាមិនខ្វះទីផ្សារនោះឡើយ ហើយតម្លៃកាន់តែបានខ្ពស់ជាងឆ្នាំមុន ដូច្នេះប្រជាកសិករនៅតែមិនបោះបង់ការដាំដំណាំទាំងនេះឡើយ ព្រោះយ៉ាងហោចណាស់ក៏កម្ពុជាអាចនាំយកទៅផលិតជាចំណីសត្វដើម្បីចែកចាយក្នុងស្រុកវិញបានដែរ ដោយមិនចាំបាច់ពឹងផ្អែកទៅលើប្រទេសជិតខាងឡើយ៕

អត្ថបទ៖ សោ និយមរ័ត្ន