គ្រាប់បែកចង្កោម M46 ផ្ទុះអំឡុងពេលកម្លាំង CMAC ប្រតិបត្តិការ ប៉ុន្តែមិនបង្កគ្រោះថ្នាក់

លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានឲ្យដឹងថា នៅថ្ងៃទី២៨ ខែមករា ឆ្នាំ២០២៦ កម្លាំង CMAC បានអនុវត្តប្រតិបត្តិការប្រើប្រាស់បច្ចេកទេសគ្រឿងចក្រស្រូបឆក់ ដើម្បីបោសសម្អាតសំណល់គ្រាប់មិនទាន់ផ្ទុះ ដែលជាគ្រាប់បែកចង្កោមរបស់សៀមឈ្លានពាន ស្ថិតនៅភូមិចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ។

ក្នុងប្រតិបត្តិការនេះ កម្លាំង CMAC បានរកឃើញគ្រាប់បែកចង្កោមប្រភេទ M46 ចំនួន ១០គ្រាប់ ដែលអាចស្រូបឆក់ និងបន្សាបបានដោយសុវត្ថិភាពចំនួន ៩គ្រាប់។ ទោះជាយ៉ាងណា មានគ្រាប់បែកចង្កោមចំនួន ១គ្រាប់បានផ្ទុះឡើង ក្នុងអំឡុងពេលប្រតិបត្តិការស្រូបឆក់។

លោក ហេង រតនា បានបញ្ជាក់ថា ករណីផ្ទុះនេះ មិនបង្កឲ្យមានគ្រោះថ្នាក់ដល់កម្លាំងប្រតិបត្តិការ និងមិនបណ្តាលឲ្យមានការខូចខាតដល់គ្រឿងចក្រនោះឡើយ។

តាមរយៈឱកាសនេះ អគ្គនាយក CMAC បានអំពាវនាវដល់ប្រជាពលរដ្ឋភៀសសឹកទាំងអស់ ដែលបានវិលត្រឡប់ចូលលំនៅដ្ឋានវិញ នៅតាមតំបន់ដែលរងផលប៉ះពាល់ដោយសារគ្រាប់ផ្លោងរបស់សៀមឈ្លានពាន សូមមេត្តាប្រុងប្រយ័ត្នខ្ពស់បំផុត ចំពោះសំណល់យុទ្ធភណ្ឌមិនទាន់ផ្ទុះ ដែលអាចនៅរាយប៉ាយតាមភូមិឋាន ស្រែចម្ការ និងតំបន់រស់នៅ។
ក្នុងករណីជួបប្រទះគ្រាប់មិនទាន់ផ្ទុះ សូមកុំប៉ះពាល់ ឬរំកិល និងសូមរាយការណ៍ជាបន្ទាន់ទៅអាជ្ញាធរមូលដ្ឋាន កម្លាំងនគរបាលមូលដ្ឋាន ឬកម្លាំង CMAC ដែលនៅជិតបំផុត ដើម្បីចាត់វិធានការដោះស្រាយដោយសុវត្ថិភាព៕