រដ្ឋបាលរាជធានីនឹងដាក់ឱ្យប្រើប្រាស់បន្ទប់ទឹកសាធារណៈផ្លូវថ្មើរជើង ដោយឥតគិតថ្លៃចាប់ពីថ្ងៃស្អែកតទៅ

រដ្ឋបាលរាជធានីភ្នំពេញដាក់ឱ្យប្រើប្រាស់បន្ទប់ទឹកសាធារណៈផ្លូវថ្មើរជើង នៅសួនច្បារមាត់ទន្លេ ចាប់ពីថ្ងៃស្អែកទី៣០ ខែមករា វេលាម៉ោង ៧និង០០ព្រឹកនេះតទៅដោយឥតគិតថ្លៃ។

អនុវត្តតាមការណែនាំពីលោកឃួង ស្រេង អភិបាលនៃគណៈអភិបាលរាជធានីភ្នំពេញ រដ្ឋបាលរាជធានីភ្នំពេញនឹងដាក់ឱ្យដំណើរការប្រើប្រាស់បន្ទប់ទឹកសាធារណៈមួយកន្លែងនៅផ្លូវថ្មើរជើងចតុមុខនាសួនច្បារមាត់ទន្លេ ដោយឥតគិតថ្លៃ ចាប់ពីថ្ងៃស្អែកទី៣០ ខែមករា ឆ្នាំ២០២៦ វេលាម៉ោង ៧និង០០ព្រឹកនេះតទៅ។

មន្ត្រីនៃមន្ទីរសាធារណការនិងដឹកជញ្ជូន រាជធានីភ្នំពេញឱ្យដឹងនាថ្ងៃ២៩មករានេះថា បន្ទប់ទឹកទំនើបមួយកន្លែងនេះ សម្រាប់ប្រជាពលរដ្ឋមកកំសាន្តសប្បាយនៅសួនច្បារនិង ផ្លូវថ្មើរជើងមាត់ទន្លេ ដែលក្នុងនោះមានបង្គន់បុរស-នារីចំនួន ២៥បន្ទប់ បង្គន់សម្រាប់ជនពិការចំនួន ១បន្ទប់ កន្ថោរនោមចំនួន ១៦កំប្លេរ និងឡាវ៉ាបូលាងដៃចំនួន ១០កំប្លេរ។

មន្ត្រីដដែល ក៏បានសូមអំពាវនាវដល់បងប្អូនប្រជាពលរដ្ឋក៏ដូចភ្ញៀវទេសចរណ៍ជាតិ និងអន្តរជាតិ ទាំងអស់ដែលប្រើប្រាស់បន្ទប់ទឹកនេះ សូមចូលរួមថែរក្សាអនាម័យ ដើម្បីសុខភាពល្អ និងបរិស្ថានល្អ ទាំងអស់គ្នា៕

ដោយ ៖ ស្រីរ័ត្ន