រដ្ឋបាលខេត្តសៀមរាប ជំរុញរដ្ឋបាលក្រុងស្រុកទាំង១៣ ស្រង់ស្ថិតិឱ្យបានច្បាស់ពីជនភៀសសឹកកំពុងស្នាក់នៅមូលដ្ឋានរបស់ខ្លួន

ខណៈពេលដែលស្ថានភាពព្រំដែនមិនទាន់មានសុវត្ថិភាព ដោយសារលំនៅឋានប្រជាពលរដ្ឋកម្ពុជាមួយចំនួន ត្រូវបានហ៊ុមព័ទ្ធដោយយោធាថៃ តំបន់ខ្លះមានគ្រាប់យុទ្ធភណ្ឌមិនទាន់ផ្ទុះ លំនៅឋានរងការខូចខាត អារម្មណ៍ភ័យខ្លាចផ្ទុះសារជាថ្មី ទើបប្រជាពលរដ្ឋខ្លះត្រូវបន្តស្នាក់នៅតាមទីតាំងសុវត្ថិភាព។ បញ្ហានេះរដ្ឋបាលខេត្តសៀមរាប បានណែនាំដល់រដ្ឋបាលក្រុងស្រុកទាំង១៣ ត្រូវស្រង់ស្ថិតិប្រជាពលរដ្ឋភៀសសឹកដែលស្នាក់នៅតាមមណ្ឌលសុវត្ថិភាព និងតាមខ្នងផ្ទះបងប្អូន ឱ្យបានច្បាស់ពីមូលហេតុដែលពួកគាត់មិនទាន់ត្រឡប់ទៅផ្ទះវិញ ដើម្បីដាក់ជូនថ្នាក់ដឹកនាំដាក់ចេញនូវការអនុវត្ដគោលនយោបាយថ្នាក់ជាតិ ក្នុងការជួយដល់ជនភៀសសឹក។

ក្នុងឱកាសដឹកនាំកិច្ចប្រជុំពិនិត្យ និងពិភាក្សាការធ្វើបច្ចុប្បន្នភាពស្ថិតិគ្រួសារប្រជាពលរដ្ឋភៀសសឹក ដែលកំពុងស្នាក់នៅទីតាំងសុវត្ថិភាព ឬលំនៅឋានរបស់បងប្អូន តាមបណ្ដាក្រុងស្រុក ក្នុងខេត្តសៀមរាប នៅរសៀលថ្ងៃទី៩ ខែមីនា ឆ្នាំ២០២៦ លោក អ៊ឹង គឹម លាង អភិបាលរងខេត្ដសៀមរាប បានឱ្យដឹងថា គិតត្រឹមថ្ងៃទី៩ ខែមីនា ក្នុងភូមិសាស្ត្រខេត្ដ មានជនភៀសសឹកបន្តស្នាក់នៅសរុប ៣ ៩៧២គ្រួសារ ស្មើនឹង ១២ ៧៣៤នាក់។ ក្នុងនោះអ្នកស្នាក់នៅតាមខ្នងផ្ទះមាន ១ ៤០៥គ្រួសារ ស្មើនឹង ៤ ៧០៣នាក់ ដែលរដ្ឋបាលក្រុងស្រុកទាំង១៣ ត្រូវចុះស្រង់ស្ថិតិឱ្យបានច្បាស់អំពីស្ថានភាពផ្ទះសម្បែង និងទីកន្លែងរបស់ពួកគាត់ តើបច្ចុប្បន្នមានស្ថានភាពបែបណា ដើម្បីធ្វើជារបាយការណ៍ដាក់ជូនរដ្ឋបាលខេត្ដ និងផ្ញើជូនបន្ដទៅថ្នាក់ជាតិ។     

លោកបន្ថែមថា សម្រាប់ជនភៀសសឹកដែលផ្ទះសម្បែងត្រូវបានថៃបំផ្លិចបំផ្លាញ រាជរដ្ឋាភិបាលបានដោះស្រាយជូនពួកគាត់រួចរាល់ហើយ ហើយចំណុចដែលនៅជាប់ព្រំដែន រាជរដ្ឋាភិបាលក៏បានធ្វើការសម្របសម្រួលហើយដែរ។ ដូច្នេះអ្វីដែលត្រូវធ្វើ គឺការផ្ទៀងផ្ទាត់ ពីការបាត់បង់ និងខូចខាតទ្រព្យសម្បត្តិ និងផ្ទះសម្បែងរបស់ពួកគាត់។ ទន្ទឹមនេះ រាជរដ្ឋាភិបាលបានផ្ដល់នូវទំហំដី ២ហិកតា ដើម្បីធ្វើផ្ទះសម្បែង និងធ្វើកសិកម្មជូនពួកគាត់ផងដែរ៕

ដោយ៖ គឿនវេត