ព័ត៌មានជាតិ

ការលែងសត្វសុនកពាសវាលពាសកាលក្នុងក្រុងបានលុងបានកាត់បន្ថយ ក្រោយដាក់ចេញវិធានការគ្រប់គ្រងយ៉ាងមានប្រសិទ្ធភាព

បានផុស

៤ ខែ មុន

នៅ

ថ្ងៃអាទិត្យ ១៥ មីនា ២០២៦

ដោយ

ការលែងសត្វសុនកពាសវាលពាសកាលក្នុងក្រុងបានលុងត្រូវបានកាត់បន្ថយ ក្រោយការដាក់ចេញវិធានការរឹតបន្តឹងពីអាជ្ញាធរ បើទោះបីមិនទាន់សម្រេចតាមការចង់បាន ១០០% ក៏ដោយ។

លោក ញែម សំអឿន អភិបាលខេត្តរតនគិរីបានគូសបញ្ជាក់ថា បច្ចុប្បន្នស្ថានភាពមានភាពល្អប្រសើរដោយសារមិនសូវមានសត្វសុនកដើរពាសវាលពាសកាលដូចមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា កន្លងទៅសត្វសុនកបានបង្កការរំខានដោយការបន្ទោរបង់នៅតាមទីសាធារណៈ និងបង្កការលំបាកយ៉ាងខ្លាំងដល់ពលរដ្ឋក្នុងក្រុង ដោយពេលខ្លះបានកាយកាកសំណល់ និងសម្រាមចេញពីធុងសម្រាម ដែលធ្វើឱ្យសម្រាមធ្លាក់រាយប៉ាយ និងមានក្លិនស្អុយ។

លោកអភិបាលខេត្តបានលើកឡើងករណីកាន់តែធ្ងន់ធ្ងរ គឺសត្វសុនកដេញព្រុះនិងខាំ ដែលធ្វើឲ្យពលរដ្ឋមានការភ័យខ្លាច។

លោក ញ៉ែម សំអឿន បានមើលឃើញភាពប្រសើរឡើងនៃការយល់ដឹងរបស់ពលរដ្ឋលើការគ្រប់គ្រងការចិញ្ចឹមសត្វសុនកក្នុងក្រុង ក្រោយដាក់ចេញវិធានការរបស់អាជ្ញាធរ បើទោះលទ្ធផលមិនបានសម្រេចគោលដៅ ១០០% ប៉ុន្តែក៏កាត់បន្ថយបានច្រើន។

លោកបានជំរុញឱ្យពលរដ្ឋទុកដាក់សត្វនៅក្នុងរបងផ្ទះឱ្យបានត្រឹមត្រូវ។ ការនាំសត្វដើរហើរនៅទីសាធារណៈគួរតែមានខ្សែចង និងមានស្បោងសម្រាប់ប្រមូលកាកសំណល់សត្វ ដូចតាមបណ្តាប្រទេសជឿនលឿនផ្សេងៗ។

លោកក៏អំពាវនាវឱ្យប្រជាពលរដ្ឋ ឈប់ប្រើប្រាស់សត្វឆ្កែជាកងការពារ សន្តិសុខទៀត មូលហេតុគឺដោយសារបច្ចុប្បន្ននៅក្នុងក្រុងមានដាក់កម្លាំងប្រជាការពារ និងកម្លាំងអន្តរាគមន៍ ដើម្បីពង្រឹងសុវត្ថិភាពភូមិឃុំ និងទប់ស្កាត់ចោរកម្មរួចហើយ។

ជាមួយគ្នានេះ លោកបានស្នើដល់អាជ្ញាធរឱ្យបន្តផ្សព្វផ្សាយជ្រួបជ្រាតដល់ប្រជាពលរដ្ឋ ព្រោះថាការចិញ្ចឹមសត្វដោយមានការទទួលខុសត្រូវគឺជាកាតព្វកិច្ចរបស់ម្ចាស់សត្វគ្រប់រូប៕