ព័ត៌មានជាតិ

តាមរយៈកិច្ចសហការគ្នា ទំនិញពីកម្ពុជាអាចដឹកទៅប្រទេសចិនតាមឡាវឆ្លងកាត់ខេត្តស្ទឹងត្រែង

បានផុស

៤ ខែ មុន

នៅ

ថ្ងៃពុធ ២៥ មីនា ២០២៦

ដោយ

តាមរយៈគោលនយោបាយដឹកនាំរបស់ប្រមុខរាជរដ្ឋាភិបាល កម្ពុជាបានបើកចំហសម្រាប់ការដឹកជញ្ជូនទំនិញទៅកាន់ប្រទេសចិនដោយផ្ទាល់ ដែលជាចំណុចយុទ្ធសាស្ត្រដ៏សំខាន់ក្នុងការពង្រីកលទ្ធភាពការនាំទំនិញរបស់កម្ពុជាទៅទីផ្សារប្រទេសមហាយក្សនៅអាស៊ី។

លោក សរ សុពុត្រា អភិបាលខេត្តស្ទឹងត្រែងបានថ្លែងថា តាមរយៈគោលនយោបាយរបស់ប្រមុខរដ្ឋាភិបាលជាមួយថ្នាក់ដឹកនាំប្រទេសឡាវ បានបើកផ្លូវឲ្យមានការដឹកជញ្ជូនទំនិញពីកម្ពុជាទៅកាន់ប្រទេសចិនដោយឆ្លងកាត់ប្រទេសឡាវតាមច្រកខេត្តស្ទឹងត្រែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«ការសម្របសម្រួលការដឹកជញ្ជូនទំនិញពីកម្ពុជាទៅកាន់ប្រទេសចិននេះ ជាចំណុចយុទ្ធសាស្រ្តដ៏សំខាន់មួយដែលនឹងជំរុញការអភិវឌ្ឍសេដ្ឋកិច្ចក្នុងខេត្តស្ទឹងត្រែង ក្នុងការទាក់ទាញការវិនិយោគជាពិសេសលើវិស័យកសិកម្ម»។ លោក សរ សុពុត្រា អះអាងមុនលោកបន្តថា ខេត្តស្ទឹងត្រែងគឺជាខេត្តដែលមានផ្ទៃដីធំធេង ប៉ុន្តែមានប្រជាជនរស់នៅតិច ដែលអំណោយផលខ្លាំងដល់ការបង្កបង្កើតផលកសិកម្ម។

លោក សរ សុពុត្រា បានបន្ថែមថា «ផ្ទៃដីដ៏ធំនេះអាចប្រើប្រាស់សម្រាប់ធ្វើជាមជ្ឈមណ្ឌលកសិកម្មឬការបង្កើតរោងចក្រផ្សេងៗ ដែលជាឱកាសសម្រាប់អ្នកវិនិយោគទុន»។

លោក សរ សុពុត្រា ក៏បានលើកឡើងពីកិច្ចគាំទ្រដល់អ្នកវិនិយោគ ដោយអាជ្ញាធរខេត្តបានត្រៀមខ្លួនរួចជាស្រេចក្នុងការទទួលស្វាគមន៍ និងសម្របសម្រួលដល់អ្នកវិនិយោគទាំងអស់ ដោយនឹងជូនទៅសិក្សាទីតាំងផ្ទាល់និងសិក្សាអំពីផ្លូវច្បាប់ដើម្បីប្រែក្លាយតំបន់ទាំងនោះឱ្យទៅជាតំបន់ដែលមានសក្ដានុពលខ្លាំង។

ពាក់ព័ន្ធការដាក់ចេញផែនការជំរុញការវិនិយោគនៅខេត្តភាគឦសានរបស់រដ្ឋាភិបាល អភិបាលខេត្តស្ទឹងត្រែងក៏មើលឃើញថានឹងនាំផលចំណេញជួយធ្វើឱ្យប្រជាពលរដ្ឋនៅក្នុងខេត្តស្ទឹងត្រែងកាន់តែមានជីវភាពធូរធារ និងទទួលបានផលប្រយោជន៍ពិតប្រាកដពីការអភិវឌ្ឍន៍៕