ឧបនាយករដ្ឋមន្ត្រី វង្សី វិស្សុត បញ្ជាក់ពីតួនាទីដ៏សំខាន់របស់ចិនក្នុងការជួយគាំទ្រគ្រប់បែបយ៉ាងដល់កម្ពុជា

ឧបនាយករដ្ឋមន្ត្រីកម្ពុជា លោក វង្សី វិស្សុត បានបញ្ជាក់ឡើងវិញអំពីតួនាទីដ៏សំខាន់របស់មហាអំណាចចិន ក្នុងការជួយទំនុកបម្រុងនិងគាំទ្រគ្រប់បែបយ៉ាងដល់ដំណើរការអភិវឌ្ឍន៍ប្រទេសកម្ពុជា ដោយលោកអះអាងថា វិបុលភាព វឌ្ឍនភាព និងការអភិវឌ្ឍសង្គម-សេដ្ឋកិច្ចរបស់កម្ពុជា គឺមិនអាចកាត់ផ្តាច់ពីកិច្ចសហប្រតិបត្តិការរបស់ភាគីចិនបានឡើយ។

លោក វង្សី វិស្សុត ក៏បានលើកឡើងអំពីតួនាទីដ៏សំខាន់របស់ចិន ក្នុងការគាំទ្រសន្តិភាព និងឯករាជ្យភាពរបស់កម្ពុជា រួមទាំងការជួយសម្របសម្រួលកិច្ចសន្ទនារវាងកម្ពុជា-ថៃ ដើម្បីបន្ថយកម្ដៅនៃជម្លោះ និងទទួលបានបទឈប់បាញ់ ហើយព្រមទាំងការផ្តល់ជំនួយមនុស្សធម៌ ដើម្បីគាំទ្រដល់ការកសាងឡើងវិញ និងការស្តារជីវភាពសហគមន៍ ដែលរងផលប៉ះពាល់។

លោកឧបនាយករដ្ឋមន្ត្រីប្រចាំការ ថា ក្រោមការជួយគាំទ្ររបស់ភាគីចិន កម្ពុជានៅតែបន្តរីកស្គុសស្គាយ និងរឹងមាំ ព្រមទាំងនឹងសម្រេចបានសមិទ្ធផលឥតឈប់ឈរលើគ្រប់វិស័យនៅពេលអនាគតថែមទៀតស្របតាមការកសាងសហគមន៍វាសនារួមរវាងកម្ពុជា-ចិន គ្រប់រដូវកាលក្នុងយុគសម័យថ្មី។ លោក ជឿជាក់ថា ចិននឹងបន្តផ្តល់ការគាំទ្រ និងរួមចំណែកក្នុងមាគ៌ានៃដំណើរអភិវឌ្ឍន៍របស់កម្ពុជា ដោយរួមទាំងការជួយធ្វើទំនើបកម្ម និងអភិវឌ្ឍន៍សមត្ថភាពកម្ពុជា ជាពិសេសនៅក្នុងបរិបទដែលសណ្ដាប់ធ្នាប់ពិភពលោកកំពុងបែកខ្ញែក និងអានុភាពនៃយន្តការ និងច្បាប់អន្តរជាតិចុះខ្សោយ។

ការលើកឡើងខាងលើរបស់លោក វង្សី វិស្សុត បានធ្វើឡើងនៅចំពោះមុខលោក វ៉ាង វិនពីន ឯកអគ្គរដ្ឋទូតចិនប្រចាំនៅកម្ពុជា ក្នុងពិធីចុះហត្ថលេខាប្រគល់-ទទួលបញ្ចប់គម្រោងជួសជុលកែលម្អអគារមិត្តភាពនៃទីស្តីការគណៈរដ្ឋមន្ត្រី កាលពីព្រឹកថ្ងៃទី២៧ ខែមីនា ឆ្នាំ២០២៦។ គម្រោងជួសជុលកែលម្អអគារមិត្តភាពនៃទីស្តីការគណៈរដ្ឋមន្ត្រី គឺក្នុងតម្លៃចំណាយប្រមាណ ៧លានដុល្លារអាម៉េរិក ក្រោមហិរញ្ញប្បទានឥតសំណងរបស់រដ្ឋាភិបាលចិន។

លោក វ៉ាង វិនពីន ឯកអគ្គរដ្ឋទូតចិនប្រចាំនៅកម្ពុជា បានលើកឡើងថា គម្រោងជួសជុលកែលម្អអគារមិត្តភាព នឹងធានាមុខងារប្រើពេញលេញ និងរួមចំណែកក្នុងសកម្មភាពការងាររបស់ទីស្ដីការគណៈរដ្ឋមន្ត្រី ព្រមទាំងជាគម្រោងនិមិត្តរូបមួយ ក្នុងចំណោមគម្រោងជាច្រើនទៀត ដែលរដ្ឋាភិបាលចិនបានផ្ដល់ការគាំទ្រដល់កម្ពុជា។ លោក ក៏បានបញ្ជាក់ពីចំណងមិត្តភាពរឹងមាំរវាងចិន និងកម្ពុជា ដែលជាមិត្តទុកចិត្តគ្នា ទោះក្នុងស្ថានការណ៍ប្រែប្រួលនៃសាកលលោក ហើយនឹងអនុវត្តរួមគ្នានូវគំនិតផ្តួចផ្តើមខ្សែក្រវាត់និងផ្លូវ ជាមួយនឹងយុទ្ធសាស្ត្រ បញ្ចកោណដំណាក់កាលទី១ របស់កម្ពុជា។

លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានអរគុណភាគីចិន ដែលបានផ្តល់ហិរញ្ញប្បទានឥតសំណងគាំទ្រដល់គម្រោងជួសជុលកែលម្អអគារមិត្តភាព នៃទីស្តីការគណៈរដ្ឋមន្ត្រី ព្រោះលោក ថា គម្រោងនេះមិនត្រឹមតែបានធ្វើឱ្យអគារប្រវត្តិសាស្ត្រជានិមិត្តរូបតំណាងឱ្យចំណងមិត្តភាពកម្ពុជា-ចិនដ៏ស្កឹមស្កៃ អាចរក្សាបាននូវស្តង់ដាសុវត្ថិភាព សោភណភាព ផាសុខភាព និងភាពស្រស់បំព្រងឡើងវិញប៉ុណ្ណោះទេ តែក៏ជាតម្រូវការចាំបាច់របស់ទីស្តីការគណៈរដ្ឋមន្រ្តី និងជួយបង្កើនផលិតភាពការងារដល់ដឹកនាំ មន្ត្រី និងបុគ្គលិកផ្សេងទៀតដែលបំពេញការងារក្នុងអគារមិត្តភាពផងដែរ៕