ព័ត៌មានជាតិ

ច្បាប់ថ្មីអនុញ្ញាតឱ្យអាចរឹបអូសយកទីតាំងដែលមានប្រតិបត្តិការបោកប្រាស់អនឡាញយកមកធ្វើជាសម្បត្តិរដ្ឋបាន

បានផុស

៣ ខែ មុន

នៅ

ថ្ងៃពុធ ១ មេសា ២០២៦

ដោយ

សេចក្ដីព្រាងច្បាប់ប្រឆាំងការឆបោកតាមប្រព័ន្ធបច្ចេកវិទ្យាដែលកំពុងពិនិត្យនៅព្រឹទ្ធសភា បានអនុញ្ញាតឱ្យរដ្ឋអាចរឹបអូសយកអាគារដែលមានប្រតិបត្តិការបោកប្រាសអនឡាញយកមកធ្វើជាសម្បត្តិរដ្ឋបាន ប្រសិនជាម្ចាស់ទីតាំងពុំមានភស្តុតាងគ្រប់គ្រាន់បញ្ជាក់ពីភាពស្អាតស្អំរបស់ខ្លួនលើការជួលអាគារ។

សមត្ថកិច្ចចុះបង្ក្រាបករណី Scam Online មួយកន្លែងនៅវីឡាភូមិគ្រឹះក្នុងសង្កាត់លេខ៤ ក្រុងព្រះសីហនុ ខេត្តព្រះសីហនុ ថ្ងៃទី២៦ ខែមីនា ឆ្នាំ២០២៦

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្ដីថ្លែងហេតុដែលអានដោយរដ្ឋមន្ត្រីយុត្តិធម៌នៅក្នុងកិច្ចប្រជុំសភាកាលពីថ្ងៃទី៣០ ខែមីនា លោកឧបនាយករដ្ឋមន្ត្រី កើត រិទ្ធ បានលើកឡើងថា៖ «ទីកន្លែងដែលត្រូវបានយកទៅប្រើប្រាស់សម្រាប់រៀបចំជាមជ្ឈមណ្ឌល ឬទីតាំងប្រព្រឹត្តិបទល្មើសឆបោកតាមប្រព័ន្ធបច្ចេកវិទ្យាក៏ជាកម្មវត្ថុក្នុងការរឹបអូសផងដែរ លើកលែងតែក្នុងករណីម្ចាស់ទីតាំងមានភស្ភុតាងបញ្ជាក់ថា ខ្លួនពុំបានសមគំនិត ឬពុំបានដឹងថាទីតាំងនោះត្រូវបានយកទៅប្រើប្រាស់សម្រាប់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាទេ»។

ក្រៅពីនេះរាល់ឧបករណ៍ សម្ភារ មូលនិធិ ផលទុន ឬទ្រព្យសម្បត្តិដែលជាមធ្យោបាយប្រព្រឹត្តិបទល្មើស ទីតាំងប្រព្រឹត្តិបទល្មើស ឬផលនៃបទល្មើស ក៏អាចនឹងត្រូវរឹបអូសដើម្បីទុកជាសម្បត្តិរដ្ឋផងដែរទោះបីជាមិនមានការផ្ដន្ទាទោសជនល្មើសដោយមួលហេតុអត្តសញ្ញាណជនល្មើសមិនអាចត្រូវបានកំណត់ ឬមរណភាពរបស់ជនល្មើស។

លោក កើត រិទ្ធ បានបញ្ជាក់ថា វិធានការទាំងនេះក៏រួមចំណែកដល់ការបង្ការទប់ស្កាត់ដែរ ដែលនឹងធ្វើឱ្យអ្នកជួលទីតាំងទាំងឡាយមានការប្រុងប្រយ័ត្នចំពោះការជួលជាងមុនព្រោះទីតាំងរបស់ពួកគេអាចនឹងក្លាយជាកម្មវត្ថុនៃការរឹបអូស។

គួរឱ្យដឹងផងដែរថាសេចក្ដីព្រាងច្បាប់ស្ដីពីការប្រឆាំងការឆបោកបច្ចេកវិទ្យា ត្រូវបានសមាជិកសភាកម្ពុជាអនុម័តនៅព្រឹកថ្ងៃទី៣០ ខែមីនា ឆ្នាំ២០២៦ ក្នុងសំឡេង១១២សំឡេង បច្ចុប្បន្នកំពុងស្ថិតនៅការពិភាក្សានៅព្រឹទ្ធសភា។ ច្បាប់នេះមាន៥ជំពូក និង២៤មាត្រា បានបង្កើតនូវបទល្មើសព្រហ្មទណ្ឌពិសេសចំនួន៥ ដើម្បីពង្រឹងនូវប្រសិទ្ធភាពប្រឆាំងការឆបោក និងបង្ហាញឆន្ទៈរបស់រដ្ឋាភិបាលក្នុងការប្រឆាំងការសម្អាតប្រាក់ផងដែរ៕