ក្រុមហ៊ុនវិស្វកម្មរបស់ចិន CCCC បង្ហាញបំណងពង្រីកការវិនិយោគបន្ថែមនៅកម្ពុជា

ក្រុមហ៊ុនចិន China Communication Construction Company (CCCC) បានបង្ហាញបំណងពង្រីកការវិនិយោគរបស់ខ្លួនបន្ថែមទៀតនៅក្នុងប្រទេសកម្ពុជា។ បំណងនេះ ត្រូវបានបង្ហាញឡើងដោយប្រធានក្រុមហ៊ុន លោក Song Hailiang នៅក្នុងជំនួបសម្ដែងការគួរសមជាមួយនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត នាព្រឹកថ្ងៃទី១០ ខែមេសា ឆ្នាំ២០២៦ នៅវិមានសន្តិភាព។

គួរឱ្យដឹងថា ក្រុមហ៊ុន CCCC គឺជាក្រុមហ៊ុនខ្នាតយក្សរបស់ប្រទេសចិន ក្នុងវិស័យវិស្វកម្ម និងហេដ្ឋារចនាសម្ព័ន្ធ ដោយក្រុមហ៊ុននេះមានឯកទេសខ្ពស់លើការសិក្សាប្លង់រចនា និងការសាងសង់ស្មុគស្មាញ ជាអាទិ៍ ផ្លូវថ្នល់ ស្ពាន កំពង់ផែទឹកជ្រៅ និងផ្លូវរថភ្លើងល្បឿនលឿន។

លោក Song Hailiang បានជម្រាបសម្ដេចធិបតីពីប្រតិបត្តិការអាជីវកម្មរបស់ក្រុមហ៊ុន ទាំងនៅកម្ពុជា និងលើសកលលោក។ លោកបានថ្លែងអំណរគុណដល់រាជរដ្ឋាភិបាល ក៏ដូចជាក្រសួងស្ថាប័នពាក់ព័ន្ធ ដែលតែងតែផ្តល់ការគាំទ្រ និងកិច្ចសហប្រតិបត្តិការយ៉ាងល្អប្រសើរ​ ធ្វើឱ្យគម្រោងនានារបស់ក្រុមហ៊ុននៅកម្ពុជាសម្រេចបានជោគជ័យ។

លោក បានបញ្ជាក់ពីការប្ដេជ្ញាចិត្តថា ក្រុមហ៊ុនរបស់លោកនឹងបន្តអនុវត្តគម្រោងនានានៅកម្ពុជាឱ្យសម្រេចបានជោគជ័យតាម​ផែនការដែលបាន​គ្រោងទុក​ ដោយធានាបាននូវគុណភាព ជាមួយនឹងការទទួលខុសត្រូវចំពោះបរិស្ថាន និងសង្គម។ តាមការបញ្ជាក់របស់លោក Song Hailiang ក្រុមហ៊ុនកំពុងស្វែងរកឱកាសវិនិយោគលើវិស័យមួយចំនួនបន្ថែមទៀត ដែលក្រុមហ៊ុនសម្លឹងឃើញនោះ គឺវិស័យថាមពលស្អាត ការគ្រប់គ្រង និងកែច្នៃសំណល់ជាថាមពលអគ្គិសនី ការអភិវឌ្ឍប្រព័ន្ធចម្រោះទឹកស្អាត ការកសាងប្រព័ន្ធអេកូស៊ីឌីជីថល (Digital Ecosystem) ជាដេីម។

លើកឡើងក្នុងជំនួបខាងលើ សម្ដេចធិបតី ហ៊ុន ម៉ាណែត បាន​វាយតម្លៃខ្ពស់ចំពោះភាពជោគជ័យរបស់ក្រុមហ៊ុន​ ដែលបានរួមចំណែកយ៉ាងសំខាន់ក្នុងការអភិវឌ្ឍវិស័យហេដ្ឋារចនាសម្ព័ន្ធនៅកម្ពុជា។

សម្ដេចធិបតី បញ្ជាក់ថា ការអភិវឌ្ឍហេដ្ឋារចនាសម្ព័ន្ធ ដែលជាឆ្អឹងខ្នងនៃកំណើនសេដ្ឋកិច្ចជាតិ ហើយក៏ជាអាទិភាពរបស់រាជរដ្ឋាភិបាលកម្ពុជា តាមរយៈការដាក់ចេញនូវគោលនយោបាយជាច្រើន ដើម្បីជំរុញការអភិវឌ្ឍហេដ្ឋារចនាសម្ព័ន្ធជាតិ។ ក្នុងន័យនេះ សម្ដេចនាយករដ្ឋមន្ត្រីបានស្វាគមន៍ចំពោះចំណាប់អារម្មណ៍របស់ក្រុមហ៊ុនក្នុងការស្វែងរកនូវ​កាលានុវត្តភាពក្នុងការពង្រីកការវិនិយោគថ្មីៗលើវិស័យនានានៅកម្ពុជា។

សម្ដេចបានលើកទឹកចិត្តឱ្យក្រុមហ៊ុនបន្តយកចិត្តទុកដាក់អនុវត្តគម្រោងដែលកំពុងមានឱ្យសម្រេចបានតាមផែនការគ្រោងទុក ដើម្បីរួមចំណែកបន្ថែមទៀតដល់ការអភិវឌ្ឍសង្គម-សេដ្ឋកិច្ចកម្ពុជា៕