ព័ត៌មានជាតិ

លោក ជិន ម៉ាលីន ពន្យល់ក្រុមសង្គមស៊ីវីលចំនួន១៣ ដែលចង់ធ្វើយុទ្ធនាការតាមការលើកកម្ពស់សេរីភាពសារព័ត៌មាន

បានផុស

៥ years មុន

នៅ

ថ្ងៃព្រហស្បតិ៍ ២៩ មេសា ២០២១

ដោយ

លោក ជិន ម៉ាលីន អនុប្រធាន និងជាអ្នកនាំពាក្យគណៈកម្មាធិការសិទ្ធិមនុស្សកម្ពុជា នៅថ្ងៃទី២៩ ខែមេសា នេះ បានលើកឡើង៣ ចំណុច ដើម្បីពន្យល់ក្រុមសង្គមស៊ីវីលចំនួន១៣ ដែលគ្រោងធ្វើយុទ្ធនាការរយៈពេលពីរសប្តាហ៍ ក្នុងគោលបំណង ឆ្លុះបញ្ចាំងពីសារៈសំខាន់ និងជំរុញឲ្យមានការចូលរួមពីសាធារណជន ក្នុងការលើកកម្ពស់សេរីភាពសារព័ត៌មាន។

ឆ្លើយតបយុទ្ធនាការនេះ លោក ជិន ម៉ាលីន បានលើកឡើង៣ ចំណុចគឺ ទី១. បើជ្រុលជាធ្វើយុទ្ធនាការបែបនេះហើយ គួរតែផ្តោតផងដែរ លើការលើកស្ទួយ និងពង្រឹងវិជ្ជាជីវៈអ្នកសារព័ត៌មាន ដើម្បីពួកគេអាចពង្រឹងបាននូវសមត្ថភាពរបស់ខ្លួន ប្រកាន់ខ្ជាប់នូវក្រមសីលធម៌វិជ្ជាជីវៈ និងអនុវត្តបានត្រឹមត្រូវតាមបញ្ញត្តិច្បាប់ ដែលមានជាធរមាន ជៀសវាងនូវការផ្សព្វផ្សាយព័ត៌មានមិនពិត បំពានសិទ្ធិសេរីភាពអ្នកដទៃ និងប៉ះពាល់ដល់សន្តិសុខសង្គម និងសណ្តាប់ធ្នាប់សាធារណៈ ដែលអាចនាំឲ្យមានការទទួលខុសត្រូវតាមផ្លូវច្បាប់ជាយថាហេតុណាមួយ។

ទី២. ការពង្រឹងនូវសមត្ថភាព ក្រមសីលធម៌វិជ្ជាជីវៈ និងអនុវត្តបានត្រឹមត្រូវតាមបញ្ញត្តិច្បាប់ របស់អ្នកសារព័ត៌មាន គឺជាផ្នែកមួយនៃការលើកកម្ពស់សេរីភាពសារព័ត៌មាន។

ទី៣. អ្នកសារព័ត៌មានមិនមានអភ័យឯកសិទ្ធិដូចសមាជិកសភានោះទេ ពោលគឺ បើមានកំហុសខាងវិជ្ជាជីវៈ ត្រូវទទួលខុសត្រូវតាមច្បាប់ ស្តីពីរបបសារព័ត៌មាន តែបើប្រព្រឹត្តបទល្មើសព្រហ្មទណ្ឌ ត្រូវទួលខុសត្រូវតាមច្បាប់ព្រហ្មទណ្ឌ ដែលមានជាធរមានដូចពលរដ្ឋដទៃទៀតដែរ។

សូមបញ្ជាក់ថា ក្រុមការងារដើម្បីសេរីភាពសារព័ត៌មាន ដែលមានសមាគមអ្នកសារព័ត៌មាន និងអង្គការសង្គមស៊ីវិលសរុបចំនួន១៣ ស្ថាប័ន បានរួមគ្នារៀបចំជាយុទ្ធនាការតាមបណ្តាញសង្គមរយៈពេលពីរសប្តាហ៍ក្នុងគោលបំណង ឆ្លុះបញ្ចាំងពីសារៈសំខាន់ និងជំរុញឱ្យមានការចូលរួមពីសាធារណជន ក្នុងការលើកកម្ពស់សេរីភាពសារព័ត៌មាន ដែលយុទ្ធនាការនេះ នឹងចាប់ផ្ដើមពីថ្ងៃទី២៦ ខែមេសា ដល់ថ្ងៃទី១០ ខែឧសភា ឆ្នាំ២០២១ ដើម្បីចូលរួមប្រារព្ធទិវាសេរីភាពសារព័ត៌មានពិភពលោកឆ្នាំ ២០២១ ក្រោមប្រធានបទរួម “ព័ត៌មានដែលជាប្រយោជន៍សាធារណៈ”៕

ដោយ ៖ កោះកែវ