ឯកឧត្តម ឌី វិជ្ជា និង លោកជំទាវ ហ៊ុន ម៉ាណា ឧបត្ថម្ភអំណោយមនុស្សធម៌ជូនរដ្ឋបាលខណ្ឌមានជ័យ

នៅព្រឹកថ្ងៃទី០៤ ខែឧសភា ឆ្នាំ២០២១នេះ ឯកឧត្តម ឆារស៏ វ៉ាន់ ឯកឧត្តម សៅ ភិរុន និង លោក ជិន ប៊ុនធឿន បានអញ្ជើញសំណេះសំណាល និងនាំយកអំណោយរបស់ឯកឧត្តម ឌី វិជ្ជា និងលោកជំទាវ ហ៊ុន ម៉ាណា មានជាស្បៀង គ្រឿងឧបភោគ-បរិភោគ  ផ្តល់ជូនរដ្ឋបាលខណ្ឌមានជ័យ រាជធានីភ្នំពេញ។

ប្រតិភូតំណាងបានមានប្រសាសន៍សំណេះសំណាល និងពាំនាំបណ្តាំសួរសុខទុក្ខជូនដល់ថ្នាក់ដឹកនាំខណ្ឌ និងបងប្អូនកងកំលាំងថា ឯកឧត្តម ឌី វិជ្ជា និងលោកជំទាវ ហ៊ុន ម៉ាណា បាន យល់ពីសុខទុក្ខ និងការលំបាកបងប្អូនដែលបានប្រចាំការនាពេលកន្លងមក ហើយការនាំយកអំណោយទាំងនេះមកគឺដើម្បីចូលរួមចែករំលែកភាពនឿយហត់របស់បងប្អូនដែលឈរជើងប្រចាំការក្នុងភូមិសាស្ត្រខណ្ឌ  ពិសេសក្នុងតំបន់ដែលអនុវត្តនូវការបិទខ្ទប់របស់រាជរដ្ឋាភិបាលនៅតំបន់មួយចំនួននៃរាជធានីភ្នំពេញ និងក្រុងតាខ្មៅ ខេត្តកណ្តាល ដោយមិនអោយមានការរីករាលដាលបន្តនូវជំងឺកូវីដ-១៩ ប្រកបដោយប្រសិទ្ធិភាពខ្ពស់។

អំណោយមនុស្សធម៌ ដែលផ្តល់ជូនរួមមាន៖

១-អង្ករ ០២ តោន

២-ត្រីខ ១០កេស ស្មើ ១០០០កំប៉ុង

៣-មី ១០កេសធំ ស្មើ ៦០កេសតូច

៤-ភេសជ្ជប៉ូវកំលាំង carabao ១០០កេស

៥-ប៊ីចេង ០១បេ (មាន ២៥គីឡូ)

៦-អំបិល ០១បេ (មាន ២៥គីឡូ)

៧-ទឹកត្រី ១០យួរ ស្មើ ៦០ដប

៨- ទឹកស៊ីអុីវ ១០យួរ ស្មើ ៦០ដប

៩-ទឹកសុទ្ធ ARUNA ២០០កេស

១០-អាល់កុល ១៥០ លីត្រ

១១-ម៉ាស់ ០២កេសធំ មាន ១០០ប្រអប់ ស្មើ ៥០០០ម៉ាស់

លោក ពេជ្រ កែវមុនី អភិបាលខណ្ឌមានជ័យ បានមានប្រសាសន៍ថា ក្នុងនាមថ្នាក់ដឹកនាំនិងមន្ត្រីរដ្ឋបាលខណ្ឌទាំងអស់ រីករាយស្វាគមន៍ទទួលអំណោយដ៏ថ្លៃថ្លានេះណាស់ ហើយសូមគោរពថ្លែង អំណរគុណយ៉ាងជ្រាលជ្រៅបំផុតជូនចំពោះ  ឯកឧត្តម ឌី វីជ្ជា និង លោកជំទាវ ហ៊ុន ម៉ាណា ដែលតែងតែគិតគូរពីសុខទុក្ខ របស់បងប្អូនកងកំលាំងគ្រប់លំដាប់ថ្នាក់ ព្រមទាំងបានឧបត្ថម្ភជាអំណោយដ៏សែនសប្បុរសនៅពេលនេះ។