ព័ត៌មានជាតិ

គ្រូពេទ្យចុះយកសំណាកមនុស្ស១៥នាក់ក្នុងផ្ទះអ្នកលក់សាច់គោនៅផ្សារចាមដែលស្លាប់ដោយជំងឺកូវិត១៩

បានផុស

៥ years មុន

នៅ

ថ្ងៃសៅរ៍ ៨ ឧសភា ២០២១

ដោយ

ភ្នំពេញ ៖ កាលពីរសៀលថ្ងៃទី៨ ខែឧសភានេះ ក្រុមគ្រូពេទ្យបង្អែកខណ្ឌច្បារអំពៅ បានចុះទៅយកសំណាករបស់មនុស្ស ១៥នាក់ ក្នុងនោះមានស្រី៨នាក់ ពាក់ព័ន្ធនឹងស្ត្រីលក់សាច់គោ នៅផ្សារចាមដែលបានស្លាប់ដោយសារជំងឺកូវីត១៩។

យោងតាមប្រភពពីលោក យូសុះ អាប់ឌុលឡោះ ចៅរងទី២ សង្កាត់ព្រែកប្រា បានឲ្យដឹងថា កាលពីរសៀលថ្ងៃទី៨ ខែឧសភានេះ ក្រុមគ្រូពេទ្យបង្អែកខណ្ឌច្បារអំពៅ បានចុះទៅយកសំណាកក្រុមគ្រួសាររបស់សពស្ត្រី ជនជាតិខ្មែរឥស្លាម ឈ្មោះ ម៉ីត សៃម៉ាស់ អាយុ៥៣ឆ្នាំ ជាអ្នកលក់សាច់គោនៅផ្សារចាម ដែលបានស្លាប់កាលពីព្រឹកថ្ងៃទី៧ ខែឧសភា ដោយជំងឺកូវីត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពពីលោក យូសុះ អាប់ឌុលឡោះ បានបញ្ជាក់ទៀតថា អ្នកពាក់ព័ន្ធនឹងសពស្ត្រីលក់សាច់គោខាងលើ មានរហូតដល់ ១៥នាក់ ក្នុងនោះមានស្រី ៨នាក់ ដែលសុទ្ធសឹងជាអ្នកពាក់ព័ន្ធនឹងសពស្ត្រីខាងលើផ្ទាល់ ដោយពុំទាន់គិត អ្នកដែលទៅទិញសាច់គោពីស្ត្រីរងគ្រោះ ទាំងបោះដុំនិងរាយ។ ហើយអាចនៅសល់អ្នកពាក់ព័ន្ធជាច្រើនទៀត ហើយក្នុងនោះ គ្រូពេទ្យសម្រេចយកតែអ្នកពាក់ព័ន្ធផ្ទាល់ប៉ុណ្ណោះ។

គួរបញ្ជាក់ថា ស្ត្រីជនជាតិខ្មែរឥស្លាម ដែលបានស្លាប់កាលពីព្រឹកថ្ងៃទី៧ ខែឧសភា កន្លងទៅនេះ គឺស្លាប់នៅក្នុងផ្ទះ ស្ថិតនៅចំណុចផ្សារចាម នៅក្នុងភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ ខណៈពេលដែលក្រុមគ្រួសារពុំបានដឹងថា ជនរងគ្រោះបានស្លាប់ដោយសារជំងឺកូវីត១៩ នោះឡើយ។

បើតាមការបញ្ជាក់ពីក្រុមគ្រួសារសពបានឲ្យគ្រូពេទ្យដឹងថា ជនរងគ្រោះពុំមានអាការៈដែលសង្ស័យថា មានជំងឺកូវីត១៩ បន្តិចឡើយ ព្រោះជនរងគ្រោះនៅលក់ដូរជាធម្មតា៕

ដោយ ៖ នរា