អាជ្ញាធរ​ចាប់ផ្តើម​ជួសជុល​ផ្លូវ​ក្នុង​ក្រុង​បានលុងឡើង​វិញ

ខេត្តរតនគិរី÷ ដោយសារសោភ័ណ្ឌភាព និងមើលឃើញពីទុក្ខលំបាកបងប្អូនប្រជាពលរដ្ឋនៅក្នុងខេត្តរតនគិរីដែលជួបផលលំបាកក្នុងការធ្វើដំណើរប្រកបមុខរបរប្រចាំថ្ងៃអាជ្ញាធរខេត្តរតនគិរីបាននិងកំពុងមមាញឹកក្នុងការស្ថាបនាសាងសង់និងជួសជុលផ្លូវមួយចំនួនដែលទទួលរងការខូចខាតនារដូវភ្លៀងកន្លងមក។

ជាក់ស្ដែងផ្លូវកៅស៊ូដែលកំពុងជួសជុលនាពេលនេះ មាន​ជា​ច្រើនខ្សែដែលខាងអាជ្ញាធរកំពុងតែជួសជុលជាបន្តបន្ទាប់ហើយមានផ្លូវខ្លះក៏បានរួចរាល់ជាស្ថាពរនិងផ្លូវខ្លះកំពុងតែជួសជុលផងដែរ។

ទាក់ទងទៅនឹងការជួសជុលនិងសាងសង់ផ្លូវក្នុងក្រុងបានលុង លោក ម៉ង ទែក ប្រធានអង្គភាពលទ្ធកម្មសាខាខេត្តរតនគិរីបានឲ្យដឹងនៅថ្ងៃទី១៦ ខែវិច្ឆិកា ឆ្នាំ២០២០នេះ ថា ផ្លូដែលជួសជុលជាប្រភេទ DBST ក្នុងឆ្នាំ២០២០ បានរួចរាល់មួយចំនួនហើយផ្លូវមួយចំនួនទៀតកំពុងតែសម្រុកជួសជុលនិងពង្រីកបន្ថែម។

លោកប្រធានអង្គភាពលទ្ធកម្មសាខាខេត្តរូបនេះបានបន្តទៀតថា នៅក្នុងការសាងសង់ជួសជុលផ្លូវក្នុងក្រុងបានលុងមានក្រុមហ៊ុនចំនួនពីរដែលទទួលម៉ៅគឺក្រុមហ៊ុនបានលុងនិងក្រុមហ៊ុនជុំមរកត ឌីវេឡុបមេន។

លោកថា ផ្លូវដែលកំពុងតែមមាញឹកនឹងការជួសជុលសាងសង់ពង្រីកថែមនិងដាក់ប្រព័ន្ធលូនាពេលនេះមាន ផ្លូវលេខ ៥០៣ មានទទឹង ៧ម៉ែត្រប្រវែង ៩៣០ ម៉ែត្រស្ថិតនៅក្នុងសង្កាត់ឡាបានសៀកនិងផ្លូវលេខ ៤៦ មានទទឹង ១០ម៉ែត្រ ប្រវែង ៧២៦ម៉ែត្រ ស្ថិត​នៅក្នុងសង្កាត់បឹងកន្សែងហើយផ្លូវទាំងពីរនេះទទួលសាងសង់ដល់ក្រុមហ៊ុន បានលុង។

ដោយឡែកផ្លូវដែលទទួលម៉ៅការដាក់ប្រព័ន្ធលូនិងក្រាលការ៉ូឡាអមសងខាងផ្លូវគឺជាការទទួលសាងសង់ដោយក្រុមហ៊ុនជុំមរកតឌីវេឡុបមេនដែលមាន ផ្លូវលេខ ៤៦ ផ្លូវលេខ ៧៨និងផ្លូលេខ ៥១។

លោកបានបញ្ជាក់បន្ថែមថា ផ្លូវទាំង ៣ ខ្សែដែលក្រុមហ៊ុនជុំមរកតឌីវេឡុបមេនកំពុងមមាញឹកនាពេលនេះគឺសុទ្ធតែដាក់លូផ្លូវនិងក្រាលការ៉ូឡាដូចៗគ្នា ហើយចំពោះផ្លូវដែលកំពុងសាងសង់នេះក៏ស្ថិតនៅក្នុងគម្រោងសាងសង់ក្នុងឆ្នាំ២០២០ និងឆ្នាំ២០២១ផងដែរ៕

អត្ថបទ៖ អ៊ុច សាវុទ្ធ