សមត្ថកិច្ចបង្ហាញមុខ​ក្រុមជនទុច្ចរិត​ក្លែងបន្លំជាប៉ូលិសជំរិត​យកលុយពីពលរដ្ឋនៅរាជធានីភ្នំពេញ

សមត្ថកិច្ចជំនាញ នៃមន្ទីរប្រឆាំងបទល្មើសគ្រឿងញៀន បានបង្ហាញមុខក្រុមជនទុច្ចរិតក្លែងបន្លំជាមន្ត្រីនគរបាល នៃមន្ទីរប្រឆាំងបទល្មើសគ្រឿងញៀន ហើយលួចធ្វើសកម្មភាពចាប់ប្រជាពលរដ្ឋ ជំរិតយកប្រាក់នៅក្នុងភូមិសាស្ត្ររាជធានីភ្នំពេញ ដែលទើបបង្រ្កាបបាននាពេលថ្មីៗនេះ។

សមត្ថកិច្ចជំនាញ បានឲ្យដឹងនៅថ្ងៃទី២០ ខែមិថុនា ឆ្នាំ២០២១នេះ ថា បន្ទាប់ពីបានទទួលព័ត៌មានជាបន្តបន្ទាប់ពីប្រជាពលរដ្ឋ និងកម្លាំងសមត្ថកិច្ច នៃអធិការដ្ឋាននគរបាលខណ្ឌដង្កោ រាជធានីភ្នំពេញ អំពីជនសង្ស័យមួយក្រុម បង្ហាញអត្តសញ្ញាណជាសមត្ថកិច្ចនគរបាលប្រឆាំងគ្រឿងញៀន ប្រើមធ្យោបាយ រថយន្ត ម៉ូតូ ធ្វើសកម្មភាពចាប់ប្រជាពលរដ្ឋសម្លុតយកប្រាក៎ជាថ្នូរ នៃការដោះលែងវិញ។

កាលពីថ្ងៃទី១៧ ខែមិថុនា ឆ្នាំ ២០២១ វេលាម៉ោង២៤៖០០នាទី នៅចំណុច ភូមិកំរៀង សង្កាត់ព្រៃវែង ខណ្ឌដង្កោ រាជធានីភ្នំពេញ កម្លាំងជំនាញ នៃមន្ទីរប្រឆាំងបទល្មើសគ្រឿងញៀន(ក៤) ដឹកនាំដោយលោកឧត្តមសេនីយ៍ទោ ឃឹង សារ៉ាត់ នាយករងមន្ទីរ សហការជាមួយកម្លាំងជំនាញ នៃអធិការដ្ឋាននគរបាលខណ្ឌដង្កោ បានសហការស្រាវជ្រាវឈានទៅបង្រ្កាបជាក់ស្តែងក្រុមក្លែងខ្លួនជាសមត្ថកិច្ចនគរបាល នៃមន្ទីរប្រឆាំងបទល្មើសគ្រឿងញៀន ធ្វើសកម្មភាពចាប់ប្រជាពលរដ្ឋសម្លុតយកប្រាក់ជាច្រើនលើកនៅភូមិសាស្ត្ររាជធានីភ្នំពេញ នាពេលកន្លងមក។

ក្នុងប្រតិបត្តិការសមត្ថកិច្ចជំនាញឃាត់ខ្លួនបានជនសង្ស័យចំនួន ០៤នាក់៖១-ឈ្មោះ កេត វីរីយ៉ា ភេទប្រុស អាយុ ៣៥ឆ្នាំ ជនជាតិ ខ្មែរ(មេក្លោងផ្តើមគំនិត)២-ឈ្មោះ សយ តុលា ភេទប្រុស អាយុ ៣២ឆ្នាំ ជនជាតិ ខ្មែរ(អ្នកសមគំនិត)៣-ឈ្មោះ ផាន់ វីរ:ភក្តី ភេទប្រុស អាយុ ៣១ឆ្នាំ ជនជាតិខ្មែរ(អ្នកសមគំនិត) ៤-ឈ្មោះ សល់ ភារៈ ភេទប្រុស អាយុ ៣១ឆ្នាំ ជនជាតិ ខ្មែរ(អ្នកសមគំនិត)

ក្នុងនោះរួមទាំងវត្ថុតាងចាប់យកចំនួនរួមមាន៖ រថយន្ត ១គ្រឿង ម៉ូតូ ២គ្រឿង អាវុធខ្លី(ជ័រ) ១ដើម វិទ្យុទាក់ទង ម៉ាក់មូតូរ៉ូឡា ១គ្រឿង ឯកសណ្ឋាននគរបាល ២កំប្លេ និងមួកនគរបាល កាតនគរបាលក្លែងក្លាយ ចំនួន ៣សន្លឹក និងសម្ភារកក្លែងបន្លំមួយចំនួនទៀត។

បច្ចុប្បន្នជនសង្ស័យទាំង ៤នាក់ រួមនឹងវត្ថុតាងខាងលើ សមត្ថកិច្ចជំនាញ នៃមន្ទីរប្រឆាំងបទល្មើសគ្រឿងញៀន បានកសាងសំណុំរឿងតាមនីតិវិធីបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមច្បាប់៕ អត្ថបទ៖សំអឿន