សោភ័ណភាព​នៅបរិវេណមុខព្រះលានជល់ដំរី​ចាប់ផ្តើមប្លែកភ្នែកបណ្ដើរៗ

បច្ចុប្បន្នបរិវេណមុខព្រះលានជល់ដំរី កំពុងចាប់ផ្តើមប្រែមុខមាត់ថ្មី បន្ទាប់ពីអាជ្ញាធរជាតិអប្សរា កំពុងដំណើរការរៀបចំក្រាលថ្មបាយក្រៀមសម្រាប់ផ្លូវថ្មើរជើង សួនស្មៅ ដាំដើមឈើ។

ការកែលម្អ​នេះ គឺឱ្យស្របទៅលំនាំប្រាសាទបុរាណដើម្បីលើកតម្លៃវប្បធម៌ ធ្វើយ៉ាងណា​ឱ្យ​ខាងមុខ​ព្រះ​លានជល់ដំរី​នេះមាន​ទេស​ភាពល្អ និង​សោ​ភ័ណភាព​បៃតងទាក់ទាញអ្នកទេសចរជាតិ និង​អន្ដរជាតិ​ទៅ​ទស្សនា​ក្រោយ​បញ្ចប់​ជំងឺ​កូ​វីដ​-១៩​នាពេលខាងមុខ​។ 

លោកឡុងកុសល អ្នកនាំពាក្សអាជ្ញាធរអប្សរា បានបញ្ចាក់ឲ្យដឹងថាការរៀបចំ លែងឱ្យមានចរាចរណ៍យានយន្តលើគន្លងផ្លូវចាស់ ដោយជំនួសផ្លូវវាងថ្មីនេះ បានរួមចំណែកសំខាន់ក្នុងការបញ្ជៀសកុំឱ្យប៉ះពាល់ដល់ប្រាសាទបុរាណ ដោយ​សារ​តែ​ភាពរំ​ញ័រ​នៃ​គ្រឿងយន្ដ ហេតុដូច្នេះទើប​អាជ្ញាធរ​ជាតិ​អប្សរា កែលម្អ​ឡើងវិញ ដោយ​ធ្វើ​ផ្លូវ​ថ្មើរជើង​សម្រាប់​ដើរ​ទស្សនា​ប្រាសាទ និងដើម្បី​លើកតម្កើង ថែរក្សា អភិរក្ស​វប្បធម៌​ជាតិ​។

លោកអ្នកអាចឃើញ​នូវទស្សនីយភាពថ្មី ប្លែកភ្នែក ពេលមកទស្សនាក្រុងអង្គរធំ ក្រោយពីទីតាំងនេះមានការអភិវឌ្ឍន៍ជាបន្តបន្ទាប់ពីសំណាក់អាជ្ញាធរជាតិអប្សរា៕

អត្ថបទ៖ គឿនវេត