ឃាត់ខ្លួនជនជាតិថៃ២នាក់ លួចឆ្លងដែនចូលមកកម្ពុជា បម្រុង​រកការងារធ្វើ នៅក្រុងប៉ោយប៉ែត

(បន្ទាយមានជ័យ)៖ ជនជាតិថៃប្រុស-ស្រី២នាក់ លួចឆ្លងដែនចូលមកប្រទេសកម្ពុជា ដោយជិះម៉ូតូឌុបបម្រុងចូលមករកការងារធ្វើ នៅក្រុងប៉ោយប៉ែត ខេត្តបន្ទាយមានជ័យ ត្រូវកម្លាំងប៉ុស្តិ៍១ក្រុម ដឹកនាំដោយលោកវរៈសេនីយ៍ត្រី ប៉ាក់ សារ៉ាត់ នាយប៉ុស្តិ៍ សហការជាមួយកម្លាំងយោធាចុះល្បាតតាមព្រំដែនឃាត់ខ្លួន ជាមួយវត្ថុតាងម៉ូតូចំនួន១គ្រឿង។ ចំណែកម្ចាស់ម៉ូតូឌុប ឃើញសភាពការណ៍មិនស្រួល បានរត់គេចខ្លួនចាត់។

ហេតុការណ៍ឃាត់ខ្លួនជនជាតិថៃខាងលើនេះ គឺនៅវេលាម៉ោង១០ព្រឹក ថ្ងៃទី១១ ខែកក្កដា ឆ្នាំ២០២១ម្សិលមិញ នៅចំណុចត្រួតពិនិត្យទប់ស្កាត់ប្រជាពលរដ្ឋ លួចឆ្លងដែនខុសច្បាប់មុខប៉ុស្តិ៍ ស្ថិតនៅភូមិសិលាខ្មែរ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

លោកវរៈសេនីយ៍ត្រី ប៉ាក់ សារ៉ាត់ បានបញ្ជាក់ឲ្យដឹងបន្តទៀតថា ជនជាតិថៃដែលកម្លាំងចម្រុះឃាត់ខ្លួនបាននោះ ទី១.ឈ្មោៈ ណាធី ហុងវៀងចាន់ ភេទប្រុស អាយុ២៧ឆ្នាំ។ ទី២. ឈ្មោៈ ចុងវ៉ាន់ វ៉ាន់ណាវ៉ាត់ ភេទស្រី អាយុ១៨ឆ្នាំ រស់នៅខេត្តស្រះកែវ។

លោក វរៈសេនីយ៍ត្រី ប៉ាក់ សារ៉ាត់ បានបញ្ជាក់ទៀតថា តាមការសាកសួររបស់សមត្ថកិច្ច បានឲ្យដឹងថា គោលបំ​ណងជនជាតិថៃទាំង២នាក់ លួចឆ្លងដែនដោយខុសច្បាប់ ចូលមកប្រទេសកម្ពុជា ដើម្បីទៅក្រុងប៉ោយប៉ែត ខេត្តបន្ទា​យ​មានជ័យ រកការងារធ្វើ។

ក្រោយពីសួរនាំរួចរាល់ ដោយទទួលតាមបទបញ្ជា ពីលោកមេបញ្ជាការយោធាជួរមុខ គឺជនជាតិថៃទាំង២នាក់នេះ បានធ្វើការប្រគល់ជូនក្រុមការងារចម្រុះ ស្នាក់ការត្រួតពិនិត្យសុខភាពច្រកអូរបីជាន់ និងចាត់ការទៅតាមនិតិវិធីច្បាប់​៕ (ដោយ)៖ វ៉ាន់ ណាង

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត