ជនជាតិចិនចាប់ជនជាតិចិនដូចគ្នា សមត្ថកិច្ចឃាត់បាន៤នាក់ និងរំដោះជនរងគ្រោះបានម្នាក់

កម្លាំងនគរបាល នៃស្នងការដ្ឋាននគរបាលខេត្តព្រះសីហនុ បានបើកប្រតិបត្តិការចុះបង្ក្រាបនិងឃាត់​ខ្លួន​ជន​សង្ស័យ​ជាជនជាតិចិនចំនួន៤នាក់ ក្នុងករណីចាប់បុរសជនជាតិចិនដូចគ្នាចូលក្នុងរថយន្ដ ហើយកម្លាំង​សមត្ថកិច្ចក៏បានរំដោះជនរងគ្រោះឲ្យមានសុវត្តិភាពវិញផងដែរ។

ប្រតិបត្តិការនេះ បានធ្វើឡើងកាលពីថ្ងៃទី​២១ ខែកក្កដា ឆ្នាំ​២០២១ វេលា​ម៉ោង១៦​និង​៤០​នាទី ក្រោយពី​ទទួលបាន​ព័​ត៌​មាន​ថា មាន​ជនជាតិ​ចិន​មួយក្រុមចាប់​ជនជាតិ​ចិន​ម្នាក់ ភេទ​ប្រុស ចូល​រថយន្ត១​គ្រឿង ម៉ាកLAND CRUISER PRADO ពណ៌​ស ស្លា​កលេ​ខ ភ្នំពេញ 2AZ-9381 នៅ​ចំណុច​លើផ្លូវ​ក្បែរ​កាស៊ីណូ ប៉ាវ​ទូ ស្ថិតនៅ ភូមិ​២ សង្កាត់​២ ក្រុងព្រះសីហនុ រួច​ជិះ​ឆ្ពោះទៅ​រង្វង់​មូល​ត្រី​ដូ​ហ្វី​ន ។ បន្ទាប់ពី​ទទួលបាន​ព័​ត៍​មាន​នេះ​ភ្លាម កម្លាំង​ជំនាញ​នៃ​ស្នងការដ្ឋាន​នគរបាល​ខេត្ត​ព្រះសីហនុ បាន​សហការគ្នាដេញតាម​ចាប់​ជ​នស​ង្ស័យរហូតដល់​ចំណុច​ផ្លូវ​បុរី​គុជ​អាស៊ី ស្ថិតនៅ​ភូមិ​១ សង្កាត់​៣ ក្រុងព្រះសីហនុ ទើប​ឃាត់​បាន​រថយន្ត​ខាងលើ ព្រមទាំង​ធ្វើការ​ឃាត់ខ្លួន​បាន​ជនសង្ស័យ​ជា​ជន​ជាតិចិន​០៤​នាក់ និង​រំដោះ​បាន​ជនរងគ្រោះ​០១​នាក់ ជា​ជន​ជាតិចិន ភេទ​ប្រុស ។

ជនរងគ្រោះ​ឈ្មោះ ZHANG TAO ភេទ​ប្រុស អាយុ ២៨​ឆ្នាំ ជនជាតិ​ចិន មុខរបរ បើកកន្លែង​ផលិតទឹក​បរិសុទ្ធ ស្នាក់នៅភូមិ​៤ សង្កាត់​៤ ក្រុងព្រះសីហនុ ។ ចំណែក​ជនសង្ស័យ​ទាំង​០៤​នាក់ មានឈ្មោះ​

១-​ឈ្មោះ LAI XING YONG ភេទ​ប្រុស អាយុ៣២​ឆ្នាំ ជនជាតិ​ចិន មុខរបរអ្នក​នាំ​ភ្ញៀវ​លេង​កាស៊ីណូ លិខិត​ឆ្លងដែន (​មិន​យក​ជាប់​ខ្លួន​) ស្នាក់នៅភូមិ​១ សង្កាត់​៣ ក្រុងព្រះសីហនុ ។​

២-​ឈ្មោះ JIA YONG SHENG ភេទ​ប្រុស អាយុ៤៥​ឆ្នាំ ជនជាតិ​ចិន មុខរបរមិន​ពិត​ប្រា​ដក លិខិតឆ្លងដែន (​មិន​យក​ជាប់​ខ្លួន​) ស្នាក់នៅភូមិ​៥ សង្កាត់​៤ ក្រុងព្រះសីហនុ ។​

៣-​ឈ្មោះ HUANG YOU TAO ភេទ​ប្រុស អាយុ ២៧​ឆ្នាំ ជនជាតិ​ចិន មុខរបរមិន​ពិតប្រាកដ លិខិតឆ្លង​ដែន (​មិន​យក​ជាប់​ខ្លួន​) ស្នាក់នៅភូមិ​១ សង្កាត់​៣ ក្រុងព្រះសីហនុ ។​

៤-​ឈ្មោះ ZHANG KE WEI ភេទ​ប្រុស អាយុ៣៦​ឆ្នាំ ជនជាតិ​ចិន មុខរបរមិន​ពិតប្រាកដ លិខិតឆ្លងដែន (​មិន​យក​ជាប់​ខ្លួន​) ស្នាក់នៅភូមិ​៣ សង្កាត់​៣ ក្រុងព្រះសីហនុ ។​

​ក្រោយពីធ្វើការបង្ក្រាប សមត្ថកិច្ចបានដកហូតរថយន្ត​០១​គ្រឿង ម៉ាក LAND CRUISER PRADO ពណ៌​ស ស្លា​កលេ​ខ ភ្នំពេញ 2AZ-9381 ។​

ចំពោះ​ករណីនេះ នគរបាល​កំពុង​បន្ត​នីតិវិធី តាមផ្លូវ​ច្បាប់ ៕​