ខ្លាចប៉ះម៉ូតូ រថយន្តដឹកស្រូវរេចង្កូតបុកបង្កាន់ដៃស្ពានទៅមុខលែងរួច

ខេត្តកណ្ដាល៖ រថយន្តធុនធំដឹកស្រូវបើកគេចពីម៉ូតូបានជ្រុលចង្កូតទៅបុកបង្កាន់ដៃស្ពានគៀបជាប់ទៅមុខលែងរួច។ ហេតុការណ៍នេះកើតឡើងកាលពីវេលាម៉ោង១០ និង៥០នាទី ព្រឹកថ្ងៃទី២៨ ខែកក្កដា ឆ្នាំ២០២១ ស្ថិតនៅលើផ្លូវលេខ១១០ ក្នុងភូមិព្រែកស្វាយ ឃុំឈើទាល ស្រុកកៀនស្វាយ ខេត្តកណ្តាល។

ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ មានរថយន្តមួយគ្រឿងម៉ាក HYUNDAI ពណ៌ស ពាក់ស្លាកលេខ កំពង់ចាម 4A.0552 បើកបរដោយឈ្មោះ ហាប់ ប្រុស អាយុ៣០ឆ្នាំ មុខរបរបើកឡានដឹកស្រូវ មានទីលំនៅភូមិបឹងក្រោម ឃុំខ្ពបអាទាវ ស្រុកលើកដែក ខេត្តកណ្តាល បើកបរក្នុងទិសដៅពីកើតទៅលិច (ស្អាង-ភ្នំពេញ) ពេលបើកមកដល់ចំណុចកើតហេតុក៏បានគេចម៉ូតូមួយគ្រឿងម៉ាក Honda Dream ពណ៌ខ្មៅ មិនចាំស្លាកលេខដែលបើកបរក្នុងទិសដៅបញ្ច្រាសគ្នា (ភ្នំពេញ-ស្អាង) រួចក៏បានរេចង្កូតជ្រុលទៅបុកនឹងបង្កាន់ដៃស្ពាន បណ្តាលឱ្យបាក់បង្កាន់ដៃស្ពានគៀបជាប់ទៅមុខលែងរួច តែមិនបណ្តាលឱ្យមានគ្រោះថ្នាក់ដល់ជីវិតមនុស្សឡើយ។ ចំណែកអ្នកបើកម៉ូតូបានបន្ថែមល្បឿនគេចខ្លួនបាត់។

បន្ទាប់ពីកើតហេតុសមត្ថកិច្ចបានចុះទៅដល់ ហើយបានយករថយន្តបង្កទៅរក្សាទុកនៅអធិការដ្ឋាននគរបាលស្រុកកៀនស្វាយ រង់ចាំដោះស្រាយគ្នានៅពេលក្រោយ៕

អត្ថបទ៖ ឧត្តរ៉ា