សម្តេចតេជោព្រមានអ្នកបំពានវិធានការសុខាភិបាលនឹងត្រូវរងពិន័យ ឬអាចជាប់ពន្ធនាគារ

ក្នុងពិធីបើកយុទ្ធនាការចាក់វ៉ាក់សាំងនាព្រឹកថ្ងៃទី០១ ខែសីហា ឆ្នាំ ២០២១ នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានព្រមានចំពោះអ្នកដែលបំពានវិធានសុខាភិបាល  ដោយបញ្ជាក់ថា នឹងត្រូវទទួលរងការពិន័យ ហើយអាចឈានដល់ការជាប់ពន្ធនាគារផងដែរ ពីព្រោះមិនអាចទុកឲ្យបុគ្គលម្នាក់ធ្វើឲ្យប៉ះពាល់ដល់មនុស្សច្រើននាក់នោះទេ។ 

បើតាមសម្តេចតេជោ ហ៊ុន សែន បានបង្កើតអនុគណៈកម្មការ ដើម្បីដឹកនាំអនុវត្តច្បាប់រួចហើយ ចំពោះអ្នកដែលបំពានវិធានសុខាភិបាល ល្មើសបម្រាមគោចរក្នុងការទប់ស្កាត់ការរីករាលដាលជំងឺកូវីដ-១៩ ត្រូវតែមានទោសទណ្ឌ ដូចជាការផាកពិន័យតិច ឬច្រើន នឹងឈានទៅផ្តន្ទាទោសដាក់ពន្ធនាគារផងដែរ។

សម្តេចបន្តថា ការជួបជុំគ្នាដោយខុសនឹងវិធានសុខាភិបាល ត្រូវតែផាកពិន័យ និងផ្តន្ទាទោសតាមច្បាប់ ពីព្រោះបើសិនជាគោរពសិទ្ធិបុគ្គលម្នាក់ វានឹងធ្វើឲ្យប៉ះពាល់ការឆ្លងរាលដាល និងការស្លាប់ដោយសារជំងឺកូវីដ-១៩ ដល់មនុស្សជាច្រើននាក់។ 

សម្តេចតេជោ ហ៊ុន សែន បានបន្ថែមទៀតថា យើងមិនអាចបញ្ចប់បានទេ ក្នុងការទប់ស្កាត់ការឆ្លងរាលដាលជំងឺកូវីដ-១៩ ហើយបរិបទនេះ យើងត្រូវរៀនរស់ជាមួយនឹងជំងឺកូវីដ-១៩ ដោយត្រូវអនុវត្តវិធានការសុខាភិបាលឲ្យបានជាប់ជាប្រចាំ។

សូមបញ្ជាក់ថា ដើម្បីទប់ទល់ជាមួយនឹងការរីករាលដាលនៃជំងឺនេះ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានសម្រេចឲ្យមានការចាក់វ៉ាក់សាំងជូនប្រជាពលរដ្ឋសម្រាប់ដូសទី៣  ហើយសម្រាប់អ្នកធ្លាប់បានចាក់វ៉ាក់សាំងសុីណូហ្វាម និងសុីណូវ៉ាក់ទាំង២ដូសរួចហើយ ត្រូវយកវ៉ាក់សាំង AstraZeneca ជាដូសទី៣។

សម្តេចតេជោហ៊ុន សែន បញ្ជាក់ទៀតថា ការចាក់វ៉ាក់សាំងសម្រាប់ដូសទី៣ នឹងបញ្ចូលជាបន្ទាន់ ដើម្បីអនុវត្តនៅខ្សែត្រៀមជួរមុខ ពិសេសនៅតាមព្រំដែនកម្ពុជា-ថៃ៕

អត្ថបទ៖ កោះកែវ

ចុចអាន៖ វ៉ាក់សាំង Johnson & Johnson ត្រូវបញ្ជូនទៅចាក់ឱ្យប្រជាពល​រដ្ឋ​ជនជាតិដើមភាគតិច

ចុចអាន៖ សម្ដេចតេជោ សម្រេចឱ្យចាក់​ដូស​​ទី៣ យកវ៉ាក់សាំង​AstraZenica ទៅចាក់